Ирандын Кызыл Чырым коомунун басма сөз катчысы АКШ жана Израилдин соккуларынан 20 провинция жабыркаганын маалымдады.
Можтаба Халеди куткаруучулар Минабдагы мектепке болгон чабуулдан кийин жараат алгандарды ооруканаларга жектирип, урандыларды тазалап жатышканын айтты.
Ал элди сокку урулган жерлерден “100 метр алыс” турууга жана өз коопсуздугу үчүн ал жактарда чогулбоого чакырды.
Анын алдында өлкөнүн түштүгүндөгү Хормозган провинциясындагы Минаб шаарында кыздар окуган мектепте 40 өлүм катталып, 48 адам жараат алганын жергиликтүү губернатор билдирген.
"Эркин Европа/Азаттык" радиосу азырынча бул маалыматтын аныктыгын көз карандысыз булактардан ырастай элек.
Ирандын башкы дипломаты аятолла Хаменеи да, президент Пезешкиан да аман экенин айтты
Ирандын тышкы иштер министри Аббас Аракчи АКШнын жана Израилдин соңку соккуларынан улам өлкөнүн жогорку бийлик башчыларынын абалы тууралуу маалымат берип, "дээрлик баары аман-эсен" экенин билдирди. Бул тууралуу ал 28-февралда NBC телеканалына маалымат берип жатып айтты.
Ал, балким, офицерлер арасында жоготуу болушу ыктымал экенин кабарлап, "Бир же эки командирибизден айрылган болушубуз мүмкүн. Бирок бул чоң проблема эмес. Биз кырдаалды көзөмөлдөп турабыз" деди.
Жакынкы Чыгыштагы айрым өлкөлөрдүн аймагына жасалып жаткан Ирандын соккулары тууралуу Аракчи ирандыктардын жаңжалды ырбатуу ниети жоктугун билдирди жана "Биздин аларга кол салуу ниетибиз жок, биз өзүбүздү коргоо максатында америкалык базаларды бутага алып жатабыз" деп айтты.
Ошону менен катар Ирандын башкы дипломаты өлкөнүн өзөктүк программасы боюнча сүйлөшүүлөр эң маанилүү жерине келген учурда сокку урулганын айыптады.
Өлкөнүн жогорку руханий лидери аятолла Али Хаменеинин жана президент Масуд Пезешкиандын тагдыры эмне болгону тууралуу түз суроого ал: «Менин билишимче, ооба, алар аман. Сот бийлигинин башчысы [Голам Хоссейн Мохсени-Эжеи] да, парламент спикери [Мохаммад Багер Калибаф] да. Жогорку кызматтагы жетекчилердин баары аман. Улуттук коопсуздук кеңешинин катчысы [Али Ларижани] дагы. Баары ордунда, биз кырдаалды жөнгө салуу боюнча иштеп жатабыз" деп жооп берди.
The New York Times басылмасы буга чейин АКШ менен Израилдин Иранга каршы бүгүнкү соккуларынын биринчи толкунунун максаты ислам жумуриятынын лидерлерин жок кылуу болгонун өз булактарына таянып жазган. Бул тууралуу басылмага Израилдин коопсуздук күчтөрүндөгү кеминде үч булак да билдиргени маалымдалган.
Ирандын коргоо министри жана Ислам революциясынын сакчылар корпусунун командири жок кылынганы кабарланды
Reuters агенттигинин маалыматына караганда, Ирандын коргоо министри Амир Насирзаде жана Ислам революциясынын сакчылар корпусунун командачысы Мохаммед Пакпур Израилдин соңку соккуларынын кесепетинде жок кылынган болушу ыктымал.
Бул тууралуу Израилдин аскердик операциясы тууралуу кабардар болгон кеминде эки адам, мындан тышкары аймактагы дагы бир булак маалымат беришкени айтылды.
The Times of Israel басылмасы Пакпур, Насирзаде жана Ирандын чалгын мекемесинин башчысы жок кылынган болушу мүмкүн экенин израилдик аскер кызматкерлеринин айтканына таянып жазган болчу.
БУУнун Коопсуздук Кеңеши кезексиз жыйынга чогулат
Бириккен Улуттар Уюмунун (БУУ) Коопсуздук Кеңеши 28-февралда Нью-Йорк убактысы боюнча саат 16:00дө (Бишкек боюнча 1-март, түнкү саат 03:00) Жакынкы Чыгыштагы кырдаалды талкуулоо үчүн кезексиз жыйынга чогулганы жатат.
Чукул жыйын өткөрүүнү Франция, Бахрейн, Колумбия, Кытай жана Орусия сунушташты.
Коопсуздук Кеңешинин кезексиз жыйыны жарыяланганга чейин БУУнун башкы катчысы Антониу Гутерриш Жакынкы Чыгыштагы кырдаалдын курчушун айыптаган.
"АКШ менен Израилдин Иранга каршы күч колдонуусу жана Ирандын андан кийинки аймак боюнча жооп кайтаруу соккулары эл аралык тынчтыктын жана коопсуздуктун пайдубалын бузат", - деди ал.
Шерине