Дүйнөдө COVID-19 илдетинен 300 миңден ашун киши каза болду
Жон Хопкинс университетинин маалыматына ылайык, дүйнө жүзүндө коронавирус жуккан 300 миңден ашуун бейтап каза болду. 1 млн. 500 миңден ашык киши бул илдетти жеңип чыкты. Ал эми жалпы коронавирусту жуктуруп алгандардын саны 4,5 миллионго чамалады.
Илдет көп аныкталгандардын сап башында АКШ турат. Бул мамлекетте 1 млн. 400 миң кишиден коронавирус аныкталып, 85 миң бейтап көз жумду. Расмий маалымат боюнча 250 миңден ашык кишиден COVID-19 вирусу табылып, Орусия экинчи орунда турат. Орусияда 2500 киши каза болду. Үчүнчү орунда Британия. Бул мамлекетте 230 адам аталган вирусту жуктуруп алганы аныкталып, 33 миң бейтап жарык дүйнө менен кош айтышты.
Коронавирустун жаңы түрү 2019-жылдын аягында алгач Кытайдан аныкталып, кийин дүйнө жүзүнө тараган. АКШ Кытайды илдеттин жөнүндө убагында маалымат берген эмес деп айыптоодо. Бээжин айыптоону четке какты.
Ошко Орусияда коронавирустан каза болгон жарандын сөөгү жеткирилди
Бул тууралуу Ош облустук ички иштер башкармалыгынын басма сөз катчысы Жеңиш Аширбаев билдирди. Анын айтымында, акыркы 10 күн ичинде Орусиядан үч кыргызстандыктын сөөгү алынып келген.
«Бүгүн, 14-майда келген киши коронавирустан каза болгон. Буга чейин келген экөөнүн бирөө операциядан чыкпай калган, дагы бирөөнүн жүрөгү кармап калган. Алардын сөөгү үч кабат табытка салынып келген. Аны ачтырбай эле туугандарына түшүндүрүп көмдүрүп жатабыз», - деди Аширбаев.
Кыргызстандыктардын сөөгүн алып келген жакындары дароо обсервацияга жаткырылган.
14-майга карата өлкө аймагында СOVID-19га чалдыккандар 1082 адамга жетти. Анын ичинен 181и Ош облусунда, 114ү Ош шаарында.
- автор Элеонора Бейшенбек кызы
ДССУ: Коронавирустан арылуу оңой эмес
Дүйнөлүк саламаттык сактоо уюмунун (ДССУ) жогорку даражалуу өкүлү дүйнө жаңы коронавирустан "эч качан кутулбай калышы ыктымал" экенин эскертти.
ДССУнун Чукул кырдаалдар боюнча программасынын башчысы Майк Раян адамзаты COVID-19дан эч качан арылбай калышы ыктымалдыгын айтты. Ал мындай жагдайда ВИЧти мисал келтирди.
Майк Раян адамзаты ВИЧ менен жашаганга үйрөнгөнүн, бул илдетти дарылап, алдын алуунун ыкмаларын тапканын, ВИЧ жугузуп алган бир топ адам кадимкидей жашап жатканын белгиледи:
"Адамзатына тараган жаңы вирус биринчи жолу пайда болду, ошондуктан биз аны качан жеңе аларыбызды айтуу кыйын. Бул вирус биздин коомубуздагы эндемикалык вирустардын бири болуп калышы ыктымал жана биз андан эч качан арылбашыбыз мүмкүн".
Майк Раян өпкөнү сезгенткен жаңы вируска каршы вакцина табылган күндө деле бул илдет менен күрөш оңой-олтоң болбосун эскертти.
Ушул тушта COVID-19ду жугузуп алгандардын саны дүйнө жүзүндө 4,3 миллион адамдан ашты. Илдеттен көз жумгандардын саны 300 миңге чукулдап калды.
Испан өкмөтү 13-майда коронавирус элдин 5 пайызына, тагырагы, эки миллиондон ашык адамга жукканы тууралуу иликтөө жарыялады. Расмий статистикага ылайык, бул өлкөдө ооруга 228 миңден көп киши кабылган жана 27 миңден көп киши көз жумган.
Оорунун кайра жайылып кетүү коркунучу сакталып турганына карабай Европа Комиссиясы Еврошаркетке мүчө мамлекеттерди жайкы туризмди сактап калуу максатында ички чек араларды өз ара макулдашып, акырындык менен ача берүүнү сунуш кылды.
Британия 13-майда Франция, Италия жана Испания сымал карантин чараларын азайтууга киришти.
Австрия Германия менен чек арасын 15-июндан тартып ачарын жарыялады. Немис бийлиги эмки айдын ортосунан тартып чек араларда жүргүнчүлөрдү коронавирус боюнча текшерүүнү токтото турганын айтты.
Европада ооругандар жана илдеттен ажал тапкандар азайып жаткан маалда дүйнөнүн башка өлкөлөрүндө коронавирустун жайылышы күчөшү мүмкүн деген кооптонуу жаралды.
Орусияда эки аптага жакын убакыттан бери жаңы коронавирусту жугузуп алгандардын саны 10 миңден ашып жатат. Орус бийлиги оору жугузгандардын көбөйгөнүн тестирлөө менен түшүндүрүп келет. Ага ылайык, бүгүнкү күнгө карата 5,8 миллион тест алынды. Бирок айрым сынчылар Орусияда ооруган жана ажал тапкан адамдардын саны мындан дагы көп болушу ыктымалдыгын айтып жатышат.
Бразилия 13-майда ооруган жарандардын саны боюнча Францияны басып өтүп, дүйнөдөгү алтынчы өлкө болуп калды. Латын Америкасында экономикасы күчтүү бул өлкөдө COVID-19ду 190 миңге чукул адам жуктуруп алды жана 13 миңден ашык киши көз жумду. Бирок президент Жаир Болсонару пандемия коркунучун кенебей, карантин чараларын алууну талап кылып келатат.
СOVID-19 биринчи жолу катталган, 11 миллион адам жашаган Кытайдын Ухань шаарында бийлик тургундардын баарынан коронавируска жапырт тест ала баштады. Буга чейин жапырт тест 10 күндүн ичинде ишке ашары айтылган. Ушул дүйшөмбүдө Уханда соңку бир айдан ашык убакыттан бери алгачкы жолу коронавирус жугузуп алган беш адам аныкталган.
АКШда штаттардын теңинен көбүнүн губернаторлору оорунун жайылышы дагы күчөшү ыктымал деген эскертүүлөргө карабай карантин эрежелерин жумшартып жатат. Президент Дональд Трамптын администрациясы коронавирус пандемиясы маалында оор абалга кабылган экономиканы мүмкүн болушунча тезирек жандантуу керектигин айтып келет.
Нарында коронавирус ымыркайларга жукту
Кыргызстанда коронавирус жуккандардын арасында бир жашка толо элек 12 ымыркай бар. Бул тууралуу 14-майда онлайн брифингде саламаттык сактоо министринин орун басары Мадамин Каратаев билдирди.
Анын айтымында, балдар бул илдетти чоңдордон жугузган, себеби айрым учурда коронавирус менен ооруган адам клиникалык белгилери байкалбай жүрө бериши ыктымал. Ошондуктан балдарга карата көзөмөлдү күчөтүү зарыл экени айтылды.
Ал эми Нарын шаарында соңку бир суткада коронавирус аныкталган 15 адамдын сегизи - жаңы төрөгөн келиндер экени белгилүү болду.
Коронавируска каршы республикалык ыкчам штаб кабарлашынча, 15 бейтаптын баары облустук ооруканага жаткырылды, алардын бирөө медицина кызматкери, сегизи жаңы көз жарган келиндер жана алтоо алар менен контакт болгон жакындары.
Баарынын абалын дарыгерлер канааттандырарлык деп мүнөздөп жатышат.
Мындан тышкары, облустук оорукананын төрөт бөлүмүндө ымыркайлары менен сегиз келин, кош бойлуу жети келин байкоо алдында жатат.
Ал эми коронавирус жуккан медицина кызматкерлеринин жалпы саны бул бөлүмдө 11 адам. Алар – акушерлер, медайымдар жана санитарлар.
14-майга карата республика боюнча оору 1082 адамдан табылса, алардын ичинен 152 бейтап Нарын облусунда. Көбү Ат-Башы районунда – 77 киши, Нарын шаарында 58 киши, Жумгал районунда 14 киши жана Кочкор районунда үчөө.
Алгачкы жолу Нарын облустук төрөт үйүндө иштеген алты кызматкердин анализинен коронавирус табылганда Саламаттык сактоо министрлиги буга «коргонуу чаралары сакталбаганы, этибар албаган мамиле» себеп болгонун билдирген.
Мындан тышкары Нарын жергесинде 14 милиция кызматкеринин анализинен коронавирус чыккан.
Кырдаалга байланыштуу Саламаттык сактоо министрлиги Нарын облусуна медицина кызматкерлеринин кезектеги, үчүнчү тобун жөнөттү. 14-майда Бишкектен Нарынга жети ыктыярчы дарыгер жөнөп кетти.
Алардын үчөө – акушер-гинеколог менен реаниматолог он күн бою аймактагы кесиптештерине жардам берип иштейт. Эки акушер-гинеколог Нарын облустук ооруканасына, дагы бирөө жана бир реаниматолог Ат-Башы районуна жөнөтүлөт.
Министрлик кабарлагандай, ар бир кызматкер тийиштүү медициналык каражаттар менен камсыз болду, аларга кошумча маяна мыйзамга ылайык төлөнүп берилет.
Жалпысынан буга чейин Бишкектен аймактарга дарыгерлердин дагы сегиз тобу жөнөтүлгөн болчу.