Президент Сооронбай Жээнбеков баштаган делегация 24-июнда Орусиянын Москва шаарынан кайтып келди. Бул тууралуу президенттин басма сөз кызматы маалымдады.
Санитардык-эпидемиологиялык алгоритмге ылайык, делегация мүчөлөрү коронавирус инфекциясына кайрадан анализ тапшырышты. Президент баш болуп алардын бардыгынын анализдери чыкканга чейин үч күн өз алдынча обочолонууда болушат. Анализинен илдет аныкталгандар 14 күн обочолонууга алынды.
24-июнда Москвада Улуу Жеңиштин 75 жылдыгына арналган майрамдык парад өттү. Ага катышуу үчүн Бишкектен президент баштаган делегация жөнөп кеткен. Параддан Кыргызстандын Куралдуу күчтөрүнүн өкүлдөрү планга ылайык өтүштү, бирок Жээнбеков ардактуу конок катары бул иш-чарага катышкан жок.
Себеби, Москвадан текшерилгенде президенттик аппараттын эл аралык бөлүмүнүн башчысы Данияр Сыдыковдон жана бир жансакчыдан коронавирус табылганы расмий айтылды.
“О” уюлдук операторунун сайтында ишкананын коронавирус аныкталган төрт кызматкери обочолонууга алынганын жазды.
Саламаттык сактоо министрлигинин талабына ылайык, илдет аныкталгандар менен байланышта болгон кызматкерлер анализ тапшырып жатышат.
Компаниянын сайтында жазылган маалыматка ылайык, ишкананын көпчүлүк кызматкерлери аралыктан иштеп жатышкан. “Нур Телеком” компаниясы кардарларды тейлөөчү бардык бөлүмдөрдө санитардык эрежелер сакталганын кабарлады. Буга чейин үйдөн иштеп жаткан компаниянын бир кызматкеринен коронавирус аныкталган. Учурда ал бейтап сакайып кеткени айтылды.
Июнь айынын ортосунда “Мегаком” жана “Билайн” компанияларынын кызматкерлеринен коронавирус чыккан.
Омбудсмен аппаратынын дагы бир кызматкеринен COVID-19 илдети аныкталганын басма сөз кызматы маалымдады. Учурда илдет жуктуруп алган инспектор обочолонууга кетти.
Маалыматка караганда, буга чейин аппараттын бөлүм башчыларынын биринен коронавирус аныкталган. Тазалык жана коопсуздук чаралары көрүлгөн. Айрым кызматкерлер аралыктан иштеп атышат.
"Кыргыз Респубикасынын омбудсмени жөнүндө" мыйзамга ылайык, Акыйкатчы институту өзгөчө абал же аскердик абал жарыяланган учурда деле ишти токтотпойт. Омбудсменге арыз-муң менен кайрылчу кишилер 115 ыкчам номуруна байланышса болот.
Соңку күндөрү өлкөдө парламент, президенттик аппарат баштаган бир нече мамлекеттин органдардын кызматкерлеринен коронавирус аныкталды.
АКШ өкмөтүнүн жогорку даражалуу өкүлдөрү өлкөнүн бардык аймагында коронавирус кеңири жайылып жатканынан улам тынчсыздануусун билдиришүүдө.
Аллергия жана инфекциялык оорулар боюнча улуттук институттун жетекчиси Энтони Фаучи эпидемияны ооздуктоо үчүн алдыдагы эки жумада болгон аракет көрүлүшү керектигин белгиледи. Ал өлкө коронавирустун алгачкы толкунан чыга электигин эскертти.
АКШда ушул тапта күн сайын оору жуккан 30 миңдей учур катталып жатат. Карантин чаралары киргизилген маалда бул көрсөткүч 20 миңге чейин төмөндөгөн.
Шаршембиге карай Кошмо Штаттарда коронавирусту 2 миллион 347 миңден көп киши жугузуп алды, COVID-19дан каза болгондордун саны 121 миңден ашты.
Жон Хопкинс университетинин эсебинде, дүйнө жүзүндө коронавируска кабылгандар 9,2 миллион адамдан көп, илдет 474 миңден ашык бейтаптын өмүрүн кыйды.
Европада бул оорудан көз жумгандардын саны 193 миңдей адамды түзөт жана өлкөлөр биренин аркасынан бири карантин чараларын жумшартып жатат.
Ал арада "New York Times" гезити Еврошаркет АКШдан келген-кеткендерди чектеши мүмкүн экенин жазды.
Ушу тушта илдеттин очогуна айланган Бразилияда коронавирус жугузуп алгандар 1,1 миллион адамдан ашты, бул илдеттен 51 миңден көп бейтап өлдү. Өлкөнүн федералдык соту бардык расмий адамдарды, анын ичинде президент Жаир Болсонаруну коомдук жайларда беткап кийүүгө милдеттендирди.
Коронавирус пандемиясынан улам эл жыш жашаган Индия менен Пакистанда да жагдай оор. Бул мамлекеттерде ооруканаларга бейтаптар батпай, саламаттык сактоо тармагында олуттуу кыйынчылыктар жаралды.