Жогорку Кеңештин депутаттары арасынан коронавирус табылгандары төртөө. Соңку маалымат ушундай экенин 25-июнда парламенттин басма сөз катчысы Ибраим Нуракун уулу билдирди.
Ал "Фейсбуктагы" жеке баракчасына жазганына караганда, Жогорку Кеңеш аппаратынын төрт кызматкери да учурда вирустан дарыланып жатат:
"Дагы эки ЖК депутатынан COVID-19 аныкталды. Баары төрт депутат, төрт аппарат кызматкери дарыланууда. ПЦР-тест тапшыруу иштери уланууда".
Төрт депутат ким экени айтылган жок. Бирок өткөн аптада Бейшеналы Нурдиновдон бул илдет аныкталганы белгилүү болгон. Бакыт Төрөбаев да жуктуруп алганы айтылган, бирок маалымат расмий тастыкталган эмес.
Ибраим Нуракун уулу өзү да коронавирустан дарыланып, Чүйдөгү ооруканада жатат.
Парламент жана президенттик аппарат орун алган имаратта 20-июнда дезинфекциялоо иштери жүргүзүлгөн. Парламенттеги аппарат кызматкерлери, басма сөз кызматында иштегендердин баары жана Жогорку Кеңештин депутаттары анализ тапшырышкан.
Имаратты карантинге жабуу маселесин комиссия чечерин 25-июнда саламаттык сактоо министринин орун басары Мадамин Каратаев билдирди.
Москвага барып келген расмий делегациянын курамындагы эки адамдан коронавирус тастыкталды, президенттин анализи таза чыкты. Бул тууралуу 25-июнда мамлекет башчынын маалымат кызматы кабарлады.
Маалыматка караганда, 24-июнда Москвадан келери менен баары тең кайрадан тест тапшырышты:
“Мамлекет башчынын анализинин жыйынтыгы таза чыкты. Президент Сооронбай Жээнбеков обочолонууну улантат жана ишин аралыктан жүргүзөт. Президенттин аппаратынын тышкы саясат бөлүмүнүн башчысы Данияр Сыдыковдон жана күзөт кызматкеринен коронавирус инфекциясы тастыкталды. Аларда илдет белгилери жок өтүп жаткандыктан бүгүнтөн тарта үйдө обочолонуу шартында дарыланышат”.
Делегациянын калган мүчөлөрүнүн жана аларды коштоп баргандардын кайрадан тапшырган анализи таза чыкты. Алар да обочолонуу шартында болууда.
Саламаттык сактоо министринин орун басары Мадамин Каратаев 25-июндагы онлайн брифингде Москвадан кайткан экөө ооруканага жаткырылганын айткан:
“Диагнозу тастыкталган экөө Республикалык клиникалык жугуштуу оорулар ооруканасына жаткырылды. Калгандарын обсервацияга алдык. Оорунун инкубациялык мөөнөтү 14 күн. Делегациянын мүчөлөрү үч күн обочолонууда болот. Клиникалык белгилерине карап, кайра анализ тапшырат. Таза болсо, жумушка чыгат”.
“Азаттык” маалыматты тактоо үчүн президенттик аппаратка кайрылып, Сыдыков жана күзөт офицери ооруканада эмес, үй шартында дарыланып жатышканын билди.
23-июнда президент Жээнбеков баштаган расмий делегация Орусиянын борбору Москвага Улуу Жеңиштин 75 жылдыгына карата майрамдык парадга катышуу үчүн барган. Бирок делегация курамындагы эки адамдан коронавирус табылып, мамлекет башчысы майрамдык иш-чараларга катышпай калган.
Президенттин кеңсеси жана парламент жайгашкан имаратты карантинге жабуу маселесин комиссия чечет. Бул тууралуу 25-июнда саламаттык сактоо министринин орун басары Мадамин Каратаев билдирди.
Онлайн брифинг учурунда журналисттердин суроолоруна жооп берип жатып ал:
“Бүгүнкү күндө жалаң гана Ак үйдө эмес, башка мекемелерде да илдет тастыкталган учурлар катталып жатат. Ошондуктан санитардык нормаларды туура сактап, мамлекеттик кызматкерлер аралыктан иштөөгө өтүүдө. Ак үйдү карантинге жабуу тууралуу чечимди пленардык отурумда комиссия карайт”.
24-июнда президенттик аппаратта иштеген эки адамдан коронавирус табылганы алар Москвага мамлекет башчысы Сооронбай Жээнбековду коштоп барганда аныкталды. Ага чейин Жогорку Кеңештин эки депутатынан жана төрт кызматкеринен вирус табылган.
Жалпысынан 18-марттан 25-июнга чейин өлкөдө коронавирус 3954 адамдан табылды, алардын ичинен 43 бейтап кайтыш болду, 2112 бейтап айыгып кетти.
Кыргызстанда коронавирус эпидемиясы башталгандан бери бул илдетке чалдыккандардын эң көп саны - 228 адам катталды. Саламаттык сактоо министринин орун басары Мадамин Каратаев 25-июнда билдиргендей, бир суткада 4160 кишинин анализи текшерилип, анын 228инен коронавирус табылды.
Алардын эң көбү Бишкек шаарында - 113 адам. Ош шаарында 32, Ош облусунда 31, Чүй облусунда 24, Ысык-Көл облусунда 12, Жалал-Абад облусунда 10, Талас облусунда үч, Баткен облусунда эки жана Нарын облусунда бир адам.
Коронавирус илдетинен дарыланып жаткан 30 бейтап айыгып, акыркы сутка ичинде үйүнө чыкты.
Саламаттык сактоо министринин орун басары Мадамин Каратаев бүгүнкү күндө коронавируска чалдыгып, ооруканага түшкөндөрдүн 42синин абалы оор экенин билдирди. Анын айтымында, 12 бейтап реанимацияда жатат:
"Бүгүнкү күндө стационарда 635 бейтап дарыланууда. Анын 42си оор абалда, 12си жандандыруу бөлүмүндө. 213ү орточо абалда. 380инин абалы канааттандырарлык".
Ошону менен катар оорунун белгилери байкалбаган 1164 адам үй шартында обочолонууда.
Соңку бир сутка ичинде коронавирустан Кыргызстанда дагы бир адам каза болуп, бул көрсөткүч 43кө жетти. Жаңы катталгандар – 228 адам.
Жалпысынан 18-марттан 25-июнга чейин өлкөдө коронавирус 3954 адамдан табылды, алардын ичинен 43 бейтап кайтыш болду, 2112 бейтап айыгып кетти.