АКШ Сенатындагы Республикачылар пандемияга байланыштуу америкалыктарга 1 триллион долларлык жардам көрсөтүүнү сунуштады.
Муну менен алар жумушсуздуктан жапа чеккен жана пандемиянын кедергисин тарткан америкалыктарга жардам берүүнү көздөп жатышат.
Сенаттагы көпчүлүктүн лидери Митч Макконнелл өлкө пандемиядан толугу менен чыга элек маалда америкалыктар жардамга муктаж экенин айтты.
Республикачылар бул боюнча Ак үй менен макулдашууга жетишти, эми демократтар менен компромисс табышы керек.
Кошмо Штаттарда миллиондогон адамдар ушу тапта жумушсуздук боюнча кошумча жөлөк пул алат. 5-апрелден бери ишсиз калгандарга жумасына кошумча 600 доллардан төлөнүп жатат. Анын мөөнөтү 31-июлда аяктайт. Жаңы планга ылайык, жарандар мурдагыдай жумасына 600 доллардан эмес, 200 доллардан алышат.
Республикачылардын бул планын демократтар «жетишсиз» деп сындап чыгышты. Сенаттагы Демократиялык партиянын лидери Чак Шумер «Республикачылардын планы мала чыккан чайдай, биздин маселелер күчтүүрөөк ичимдиктерге муктаж» деп айтты.
Кошмо Штаттар пандемиянын экономикалык кесепеттерин жумшартууга буга чейин 3,7 триллион доллар коротту. Анын алкагында ар бир салык төлөөчүгө 1200 доллардан жардам берилди.
Кыргызстанда бир сутка ичинде сегиз медициналык кызматкер коронавирус жугузуп алганы аныкталды. Бул тууралуу 28-июлдагы брифингде Саламаттык сактоо министрлигинин өкүлү Айнура Акматова билдирди.
Маалыматка караганда, алардын үчөө Ош шаарында, бирөө Ош облусунда, үчөө Жалал-Абад дубанында, дагы бири Талас аймагында катталды.
Соңку бир күндө COVID-19 диагнозу менен ооруканаларда жаткан сегиз медициналык кызматкер айыгып, үйүнө чыкты.
Жалпысынан республика боюнча коронавирус жугузуп алган медкызматкерлердин саны 2691ге жетти, алардын 1520сы айыкты.
28-июлга карата Кыргызстанда коронавирустан жалпы 1329 киши каза болду. Өлкө боюнча илдет жугузуп алгандардын жалпы саны 33844кө жетти.
Кыргызстан 17-июлдан тартып пневмонияны да коронавируска кошуп каттай баштаган.
Бир сутка ичинде Кыргызстандын ооруканаларында COVID-19 илдетинен 28 бейтап каза болду. Бул тууралуу 28-июлдагы брифингде Саламаттык сактоо министрлигинин өкүлү Айнура Акматова билдирди.
Анын маалыматына караганда, COVID-19 илдетинен каза болгондордун ону Бишкекте, тогузу Жалал-Абад облусунда, экөө Нарында, экөө Ысык-Көлдө, экөө Чүй облусунда, бирөө Ош облусунда, дагы бири Ош шаарында, бирөө Талас аймагында. Кыргызстанда пандемия башталгандан бери коронавирустан каза болгондордун саны 1329га жетти.
Бир сутка ичинде коронавирус 548 кишиден жаңы аныкталды. Муну менен өлкө боюнча илдет жугузуп алгандардын жалпы саны 33844 кишини түздү.
- Бишкек 15 000
- Чүй облусу 4552
- Жалал-Абад 2743
- Ош облусу 2510
- Ош шаары 2882
- Ысык-Көл 2282
- Нарын 1423
- Баткен 1411
- Талас 1041
1091 бейтап айыкты.
17-июлдан тартып Кыргызстан пневмонияны да коронавирус катары каттай баштаган.
Кыргызстанда коронавирустан дагы үч медицина кызматкери каза болду. Бул тууралуу "Азаттык" радиосуна алардын жакындары жана кесиптештери кабарлашты.
25-июлда 64 жашында Бишкектин №1 шаардык клиникалык ооруканасынын дарыгери Бегайым Исакова көз жумду. Ал 1956-жылдын 6-июнунда Бишкекте туулган. Медицина академиясын 1979-жылы аяктаган. Кесиптештеринин айтымында, эмгек жолун ушул ооруканада терапевт дарыгер болуп баштаган. 1996-жылдан тартып өмүрүнүн акыркы күндөрүнө чейин бул медициналык жайдын чукул терапия бөлүмүн башкарып турган.
26-июлда 67 жашында коронавирустан Чүй райондук Үй-бүлөлүк медицина борборунун директорунун орун басары Гүлжамал Жумубаева көз жумду. Кесиптештери "Азаттыкка" кабарлашкандай, Жумабаева 1953-жылдын 25-майында Кеминде туулган. 1976-жылы Медициналык академияны аяктаган. Чүй райондук ооруканасында алгач бөлүм башчы, кийин директордун орун басары болуп иштеп келген.
Бүгүн, 27-июлда 70 жаш курагында Ысык-Көл райондук ооруканасынын реаниматологу Сарбагыш Иманалиев көз жумду. Маркумдун уулу Төлөгөн Сарбагыш уулу «Азаттыкка» билдиргендей, ал өпкөсүнөн кагынып ооруп жаткан. Абалы оңолбогондуктан реанимобил менен Бишкекке жеткирилген. Иманалиев 1960-жылы 15-августта туулган. 1984-жылы Медициналык академияны аяктап, 1985-жылы Ысык-Көл райондук ооруканасында биринчи реаниматолог болуп иштей баштаган. Бул ооруканада өмүрүнүн акыркы күндөрүнө чейин башкы реаниматолог болуп эмгектенген.
Саламаттык сактоо министрлиги буга чейин сегиз медицина кызматкери каза болгонун кабарлаган.
Расмий эмес эсеп боюнча, кайтыш болгондордун саны 60ка чукулдады.
Дарыгерлер жетишсиз болуп жаткандыктан, премьер-министр Кубатбек Боронов медициналык билими бар бардык кыргызстандыктарга кайрылган жана эмгек өргүүсүндө жүргөндөрдү ишке чыгууга чакырган.
Өкмөттүн чечимине ылайык, вирус жуккан медицина кызматкерлерине 200 миң сом, каза болгондоруна бир миллион сом кенемте төлөнүп берилиши керек.