Кыргызстанда коронавирустун жайылышы басаңдай элек. Бир апта ичинде вирус 80ден ашык кишинин өмүрүн алды. Өлкөдө вируска каршы эмдөө мажбурлоо жолу менен жүргүзүлүп жатат деген нааразылык чыкты.
Кыргызстанда жарандар 22-июлдан тарта коронавируска каршы AstraZeneca вакцинасы менен да эмделе баштайт. Европа өндүрүшүндөгү препараттын 40 миң дозасын Азербайжан гуманитардык жардам катары берген. Июлдун соңунда эл аралык COVAX программасынын алкагында дагы 220 миң доза келет. Бул тууралуу “Азаттыкка” Республикалык иммунопрофилактика борборунун жетекчиси Гүлбара Ишенапысова билдирди.
Буга чейин кыргызстандыктар Кытайдын Sinopharm, Орусиянын Sputnik-V вакциналары менен эмделип жаткан.
Учурда Кыргызстанда жалпы вакцинанын 1 миллион 128 миңден көбүрөөк запасы бар. 29-марттан 21-июлга чейин 391 миңден ашуун адам эмделди. Алардын 100 миңден көбү вакцинанын эки дозасын тең алышты.
Кыргызстанда коронавируска каршы вакцина алган жарандардын саны 394 932ге жетти. Алардын 101 миңден ашууну эки дозаны тең сайдырышты. Учурда өлкөдө вакциналардын 1 миллион 125 миңден көбүрөөк запасы бар. Бул 22-июль, таңкы саат сегизге карата маалымат.
Эмделгендердин эсеби Саламаттык сактоо жана социалдык өнүктүрүү министрлигинин Электрондук саламаттык борборунун маалымат базасында күнү-түнү жаңыртылууда.
Тажикстандын маалымат каражаттары президент Эмомали Рахмондун карындашы коронавирустан көз жумганын жазып чыгышты. Ал эми мамлекеттик агенттиктер 64 жаштагы Курбонби Рахмонованын өлүмүнө эмне себеп болгонун кабарлашкан жок. Борбор Азиядагы башка мамлекеттерде да абал жакшы эмес.
