Орусияда туткунда жаткан 200дөн ашык аскерлер, көпчүлүгү Мариуполдогу "Азовсталь" заводун бошотууга катышкандар бошотулду. Алардын ичинде “Азов” полкунун командири Денис Прокопенко жана анын орун басары Святослав Паламар, заводдун ичинен тартылган сүрөттөрү менен таанылган жоокер Дмитрий Козацкий, Мариуполдун патрулдук полициясынын башчысы Михаил Вершинин жана башкалар бар.
Москва шаарында мобилизацияга каршы акция учурунда кармалгандардын айрымдарына полициянын бөлүмдөрүндө аскердик комиссариаттарга чакыруулар берилди. Бул тууралуу кармалгандар "ОВД-Инфо"укук коргоо борборуна кабарлашты.
Бурятияда резервдеги адамдарга 22-сентябрга караган түнү массалык түрдө аскерге чакыруу таратылып, көпчүлүгү түз эле комиссариаттарга алынып кетти. Бул тууралуу “Эркин Европа\ Азаттык радиосунун” “Север.Реалии” долбоору кабарлады.
Орусиянын коңшу мамлекеттер менен чек арасындагы автомобилдик өткөрмө бекеттерде узун тыгындар пайда болду. "Яндекс.Карта" сервисиндеги маалыматтарга ылайык, Казакстан, Грузия, Беларус жана Финляндия менен чектешкен жерлерде машинелер кезекте турганы көрүнүп турат.