Линктер

ЧУКУЛ КАБАР!
19-Июнь, 2021 ишемби, Бишкек убактысы 05:55

Талап-тоноого жол бербеген элдик кошуун


Бишкек. Элдик кошуундун ыктыярчылары.

Бишкекте ыктыярдуу элдик кошуундун өкүлдөрү борбор шаардагы муниципалдык жана мамлекеттик ишканаларды, кафе-ресторандарды, соода борборлорун кайтарууда.

8-октябрда активисттер баштаган ыктыярдуу топ КТРК, өкмөт үйү, Мамлекеттик резиденция, Башкы прокуратура, мейманканалар, ири соода борборлору жана башка жайларды кайтарууга алышты.

Түнү менен көчөдөн мамлекеттик номуру жок машинелерди текшерип өткөрүп жатышты.

"Түн абдан тынчсыз болду. Үшүп тоңуп калсак да, бирге шаарыбызды сактап кала алдык! Жаш дружинниктерине рахматымды айтам, чогуу шаарыбызды сактап кала алдык!", - деп жазды Элдик кошуундун мүчөсү Урмат Насыкулов.

Блогер Азим Азимовдун "Твиттер" баракчасынан Элдик кошуундун ыктыярчылары шаардык мэриянын имаратын коргоп турганын көрүүгө болот.

Элдик ыктыярчылар кайтарган Башкы прокуратуранын имараты жана мүлкү өз ордунда экенин аталган органдын басма сөз кызматы "Азаттыкка" кабарлады.

Мекеме прокурорлордун ишине тоскоолдуктар болуп, прокуратура кызматкерлери кызматтык имараттар менен документтерди өз күчү менен кайтарып жатканын билдирди. Кол кабыш кылган ыктыярчыларга ыраазычылык билдирген.

Бишкектеги айрым кафе-ресторандар ыктыярчыларды ысык тамак, суу менен камсыздап турушту.

Иликтөөчү журналист Болот Темиров элдик кошуунга шаар тургундары да тамак-аштан жардам берип жатканын жазды.

Коронавирус пандемиясына байланыштуу дарыгер Эрмек Исмаилов ыктыярчыларга жылуу кийинип, курсакты ток кармап, уйкуну кандырып алуу маанилүү экенин эскертти.

Кырдаалды эске алган элдик кошуун ич ара тартипти да иштеп чыгышкан.

Кубан Жумалиев аттуу "Фейсбук" колдонуучусу өкмөт үйүн талап-тоноодон сактап калуу үчүн элдик кошуунга ыктыярчылар керек экенин кабарлады.

Элдик кошуундун катарына Бишкектеги Жогорку окуу жайлардын окутуучулары да кошулду.

Кыргызстанда 5-октябрда парламент, президенттик администрация отурган имаратты жана УКМКны демонстранттар басып алышкан.

6-октябрдын түнү топтошкон шектүү адамдар ар кайсы мекемелердин, соода борборлорунун жанына барганы, бирок ыктыярдуу кошуундар талоончулук далалаттарына жол бербегени айтылган.

Пикирлерди көрүңүз (2)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG