2-мартта Сауд Арабиясынын Энергетика министрлиги Рас-Танурадагы ири мунай иштетүүчү заводго жасалган чабуулдан кийин ишкананын иши жарым-жартылай токтотулганын билдирди.
Перс булуңунун боюнда, Сауд Арабиясынын чыгыш жээгинде жайгашкан Рас-Танура комплекси Жакынкы Чыгыштагы эң ири заводдордун бири болуп саналат жана өлкөнүн энергетика тармагында негизги ролду ойнойт.
Ал бир суткада 550 миң баррел мунай иштетет.
Буга чейин AFP агенттиги өз булагына таянып, Рас-Танурага жасалган чабуулдан соң заводдо өрт чыкканын кабарлаган.
Сауд Арабиясынын Коргоо министрлигинин өкүлүнүн айтымында, заводго эки дрон менен чабуул жасалган, бирок экөө тең абадан коргонуу күчтөрү тарабынан жок кылынган.
Рас-Танура дүйнөдөгү эң ири мунай портторунун бири болуп да эсептелет.
AFP агенттигине дагы бир булак билдиргендей, Сауд Арабиясынын борбору Эр-Рияд шаарына жакын жайгашкан аба базасына да ракеталар менен сокку урулган, бирок алар да абадан жок кылынган.
Бул база америкалык аскерлер жайгашкан объект болуп саналат жана акыркы үч күн ичинде үчүнчү жолу чабуулга кабылды.
Сауд Арабиясы Иранды катуу айыптап, өзүн коргоо, анын ичинде жооп кайтаруу чараларын көрүү укугун сактап каларын эскертти.
Буга чейин Сауд Арабиясынын мунай инфраструктурасына Иран колдогон хуси козголоңчулары да бир нече жолу чабуул койгон.
АКШ менен Израил Иранга аба соккуларын улантып, Иран өз кезегинде башка өлкөлөрдү бутага алып жаткан маалда, 2-мартта Brent үлгүсүндөгү мунайдын баасы 10% өсүп, баррелине болжол менен 80 долларга жетти.
Талдоочулардын божомолу боюнча, эгер жаңжал узакка созулуп, мунай инфраструктурасына соккулар уланып жана соода жолдору бөгөттөлсө, мунайдын баасы 100 доллардан жогору көтөрүлүшү мүмкүн. Бул 27-февралдан берки көрсөткүчкө салыштырмалуу болжол менен 37 % жогорулайт дегенди билдирет.
Соода булактарынын маалыматына ылайык, Тегеран Ормуз кысыгы аркылуу өткөн кемелерге эскертүү бергенден кийин танкерлердин ээлери жана ири мунай компаниялары бул кысык аркылуу чийки мунайды, күйүүчү майды жана суюлтулган жаратылыш газын ташууну токтоткон.
Дүйнөдө экспорттолгон мунайдын 20% ашыгы Ормуз кысыгы аркылуу өтөт.
Маалыматта айтылгандай, Ирандагы кризис Азия өлкөлөрүнүн өкмөттөрүн жана кара май иштетүүчү компаниялардын мунай корлорун, ошондой эле альтернативдүү жолдорду карап чыгууга мажбур кылды.
2-мартта Иран Сауд Арабиясынын чыгышындагы Рас-Танура шаарында жайгашкан Saudi Aramco компаниясынын мунай иштетүүчү заводуна чабуул койду. Рас-Танура комплексинде суткасына 550 миң баррелге чейин мунай иштете алган Жакынкы Чыгыштагы эң ири заводдордун бири жайгашкан жана ал сауд мунайы үчүн маанилүү экспорттук терминал болуп саналат.
1-марттын кечинде Американын үч F-15E истребители Кувейттин абадан коргонуу күчтөрү тарабынан жаңылыштык менен атып түшүрүлгөн. Бул тууралуу АКШнын Куралдуу күчтөрүнүн Борбордук командачылыгы 2-мартта билдирди.
Буга чейин күйүп жаткан учак жана андан парашют менен түшүп жаткан экипаж мүчөсү тартылган видео тараган. Ал эми Кувейттин аскерлери «бир нече» америкалык истребител кулаганын билдиришкен.
Окуя жергиликтүү убакыт боюнча таңкы саат 8дер чамасында болгон. Ал учурда учактар «активдүү согуштук аракеттерге» катышып, ирандык учактардын, баллистикалык ракеталардын жана дрондордун чабуулдарына туш болгон.
Буга чейин Кувейттин Коргоо министрлиги да бир нече учак кырсыкка учураганын билдирип, экипаж мүчөлөрү куткарылып, ооруканага жеткирилгенин маалымдаган.
АКШ менен Израилдин Иранга каршы биргелешкен операциясы үч күндөн бери уланууда. Азырынча АКШ тараптан кеминде төрт аскер кызматкери каза болгону кабарланды. Америкалык маалымат каражаттары жазгандай каза болгондордун үчөө Кувейтке жайгаштырылган бөлүктүн курамында болгон.
Иран абадан жасалган чабуулдарга жооп кылып, Перс булуңундагы АКШнын аскер объектилерин жана шаарларды дрондор жана ракеталар менен аткылоодо.
2-мартта дагы бир америкалык аскер Ирандын алгачкы соккуларында оор жаракат алып, кийин каза болгону маалымдалды. Анын кайсы жакта жаракат алганы так айтылган жок.
Ирандын президенти Масуд Пезешкиан Ислам революциясынын сакчылар корпусунун (IRGC) генералы Мажид Эбнолрезаны коргоо министринин милдетин убактылуу аткаруучу кылып дайындады.
Ал буга чейин 28-февралда Израилдин соккусунан каза болгон Азиз Насирзаданын биринчи орун басары болуп иштеген.
Бул тууралуу Пезешкиандын кеңсесинин байланыш жана маалымат боюнча орун басары Мохаммад Мехди Табатабаи социалдык тармактар аркылуу билдирди.
«Президент Пезешкиандын буйругу менен бригадалык генерал Сейед Мажид Эбнолреза коргоо министринин милдетин аткаруучу болуп дайындалды», — деп жазды ал X социалдык тармагында.
АКШ менен Израил 28-февралда Ирандын аймагына жасаган аба соккуларда Ирандын Жогорку руханий лидери Али Хаменеи, Коргоо кеңешинин катчысы Али Шамхани, коргоо министринин бригадалык генералы Азиз Насирзаде жана Ислам революциясынын сакчылар корпусунун жетекчиси, генерал Мохаммад Пакпур өлгөнү ырасталган.
Ошондон бери жооп катары Иран Перс булуңундагы өлкөлөрдө жайгашкан америкалык аскер базаларына чабуулун улантып жатат.
Шерине