Израилдин Коргоо армиясы (ЦАХАЛ) 3-мартта Ирандын борбору Тегеран менен Ливандын баш калаасы Бейрутка сокку урганын ырастаганын Би-Би-Си жазды.
“Учурда ЦАХАЛ бир эле маалда Тегерандагы жана Бейруттагы аскердик буталарга сокку урууда”, - деп жазылган билдирүүдө.
Соккулар израилдик аскерлер Бейруттун түштүк тарабындагы калктуу аймактарга жана ондогон айылга эвакуациялануу тууралуу “шашылыш эскертүүсү” берилгенден кийин жасалды.
ЦАХАЛ Иран бийлиги колдогон “Хезболла” тобуна тиешелүү кампаларды жана командалык борборлорду бутага алганын белгиледи.
Ушул эле күнү Ирандын мамлекеттик басылмалары АКШнын Бахрейндеги аскердик базасы Тегерандын ракеталык соккусуна кабылганын жазышты.
Ислам революциясынын сакчылар корпусуна байланышы бар Fars маалымат агенттиги жарыялаган тасмада ракеталардын толкуну алыскы буталарга сокку уруп жатканын көрүүгө болот.
Билдирүүдө Ислам революциясынын сакчылар корпусунун дрондор жана ракеталар менен жасаган чабуулу Бахрейндин Шейх-Иса районундагы авиабазанын командалык пунктун жана штаб имаратын талкалап, күйүүчү май кампаларынын жарылуусуна алып келгени айтылат.
АКШ бул соккулар тууралуу маалыматтарга комментарий бере элек.
Мунун алдында Кошмо Штаттардын Бахрейндеги аскердик базасынын аймагын түтүн каптаганы байкалган. АКШнын Мамлекеттик департаменти Бахрейндеги жана Жакынкы Чыгыштын бир канча өлкөсүндөгү жарандарын тез арада чыгып кетүүгө чакырган.
АКШ менен Израил 28-февралда Ирандын аймагына жасаган аба соккуларда Ирандын жогорку руханий лидери Али Хаменеи, Коргоо кеңешинин катчысы Али Шамхани, коргоо министринин бригадалык генералы Азиз Насирзаде жана Ислам революциясынын сакчылар корпусунун жетекчиси, генерал Мохаммад Пакпур өлгөнү ырасталган.
Ошондон бери жооп катары Иран Перс булуңундагы өлкөлөрдө жайгашкан америкалык аскер базаларына чабуулун улантып жатат.
АКШнын президенти Дональд Трамп Кошмо Штаттардын Сауд Арабиясындагы элчилигине жасалган чабуул жана америкалык аскер кызматкерлеринин өлүмүнө "жакында" жооп кайтарыларын айтты. Бул тууралуу ал NewsNation басылмасынын суроосуна жооп берип жатып билдирди.
АКШнын Куралдуу күчтөрүнүн Борбордук командачылыгынын (CENTCOM) маалыматына караганда, Ирандагы операция башталгандан бери алты америкалык аскер кызматкери каза болуп, дагы 18и жаракат алды.
Мурдараак New York Post гезитине америкалык президент "эгерде зарыл болсо" Иранга АКШнын жөө аскерлерин жөнөтүү ыктымалдыгын жокко чыгарган эмес.
Сауд Арабиясынын Коргоо министрлиги 3-мартта эртең менен Х социалдык түйүнүндөгү баракчасына АКШнын Эр-Рияддагы элчилигине учкучсуз эки учак менен сокку урулганын, бир аз өрт болгонун жана анча-мынча материалдык залака келтирилгенин жазган.
Ал тапта Кошмо Штаттардын Кувейттеги элчилиги "аймакта уланып жаткан чыңалууга байланыштуу" жаңы маалыматтар чыкканга чейин жабык болорун маалымдады.
АКШнын вице-президенти Жей Ди Вэнс Ирандын ядролук программасы боюнча жүрүп жаткан соңку сүйлөшүүлөр үзгүлтүккө эмне үчүн учураганы тууралуу түшүндүрмө берип, буга америкалык расмий өкүлдөрдүн Тегерандын билдирүүлөрү "күмөн жаратууда" деген тыянагы түрткү болгонун билдирди. Бул, анын айтымында, президент Дональд Трампты “Эпикалык каардануу” деген операцияны баштоого мажбурлады.
2-мартта Fox News телеканалына курган маегинде Вэнс америкалык чабармандар, анын арасында Стив Уиткофф, Марко Рубио жана Жаред Кушнер Женевада Иран санкциялардын токтотулушу үчүн өзүнүн өзөктүк программасын чектейт дегенге багытталган атайын сүйлөшүүлөрдү өткөрүшкөнүн айтты.
Тараптардын сүйлөшүүсү уранды байытуу маселесине келгенде туңгуюкка кептелгенин айткан Вэнс эмне үчүн Иран жер астында 70 фут тереңдикте объектилерди куруп, уранды тынч максатта колдонуудан жогору деңгээлге чейин байытып жатканы тууралуу суроо койду.
«Ирандыктар медициналык изотоп өндүрүп жатышына эч кимдин каршылыгы жок. Маселе уранды өзөктүк курал жасоого жарактуу кылып байытуучу фабрикалардын бар экендигинде», — деди ал.
Вэнс Трамп Кошмо Штаттардын "так аягы жана анык максаты жок көп жылдаган жаңжалга" аралашуусуна мүмкүнчүлүк бербесин, Вашингтон үчүн Иранда туруктуу, АКШ менен кызматташууга даяр, достук мамиледеги режимдин болушу маанилүү экенин кошумчалады.
Израилдин премьер-министри Биньямин Нетаньяху АКШ менен биргеликте Иранга жасаган соңку соккуларынан кийин жалпы Жакынкы Чыгыш аймагы узакка созулган жаңжал абалда калат деген кооптонууларды четке какты. Бул тууралуу Politoco басылмасы 3-мартта жазды.
"Согуш үзгүлтүксүз уланат деп айтып жатышканын угуп жатам. Чексиз согуш болбойт. Бул тез жана чечкиндүү аракет болот жана биз алгач Иран элине өз тагдырын көзөмөлдөөгө жана демократиялык жол менен шайланган өкмөтүн түзүүгө шарт түзөбүз", - деди Нетаньяху.
Шерине