Социалдык тармактарда «Семетей» обсервациясында премьер-министр кеткенден кийин медициналык жабдууларды сыртка ташып чыгып жатканы тууралуу жарыяланган видео жалган экенин Өзгөчө кырдаалдар министрлиги кабарлады.

Министрлик тасмага түшүрүлгөн жүк ташуучу автоунаа кампадагы жабдыктарды «Семетей» госпиталынын реанимациялык бөлүмүнө ташып баратканын, кампада "CPAP" деген кошумча дем алдыруучу аппараттар болгонун билдирип жатат.

“Адистер жабдууларды текшерип көрүп, реанимациялык бөлүмгө орнотуп беришкен. Учурда ошол аппараттарды медицина кызматкерлери колдонуп, жарандардын ден соолугуна кам көрүп жатышат”, - деп жазылган маалыматта.

Өзгөчө кырдаалдар министрлиги жарандарды маалыматты тактабай туруп таратуудан карманууга чакырууда.

Бишкек

Оорукананын алдында жан берген бейтапты сактап кала албаганын айтып ыйлаган ыктыярчы кыз окуянын чоо-жайын “Азаттык” радиосуна айтып берди.

Өзүн София-Айдана Мурзаева деп тааныштырган кыз “Демилгечи жаштар борборунун” мүчөсү экенин, абалы оорлогон бейтап жардамга муктаж болуп жатканы тууралуу кабар 17-июлга караган түнү түшкөнүн, Ак-Ордо конушуна он мүнөткө жетпей барышканын билдирди.

“Эркек киши көчөдө экен. Сатурациясы 65ке түшүп калыптыр. Мен эки зымды улап, аппаратты жанындагы дүкөнгө сайдырдым. Медициналык билимим жок болгондуктан аны дарыгерлерге жеткирип, сактап калыш керек эле. Борбордогу ооруканага жеткирип, “Биздин балдар кычкылтек жаздыкчаларын алып келгенче 10-15 мүнөткө аппарат коюп тургулачы” деп сурандым. Анан Кантка болобу, башка жерге болобу, алып кетеримди айттым. Алар орун жок дешти. Орун жок окшойт. Бирок адамдын өмүрүн сактап калыш үчүн бир айласын тапса болот эле деп эсептейм”.

Ыктыярчы кыздын бул окуядан кийин “Мен аны сактап калмакмын, ортодо жети мүнөт жоготуп алдым” деп ыйлап жаткан видеосу социалдык түйүндөрдө тарап, кызуу талкууланып жатат.

Баткен облусунун Кадамжай районунун Бишкек шаарында эмгектенип, жашап жүргөн тургундары, Кадамжай коомунун мүчөлөрү, аталган райондун саламаттыкты сактоо тармагына 1 млн. 32 миң сомдук медициналык жабдуулар жана дары-дармектерди беришти. Анын ичинде 11 кычкылтек концентратору бар.

Исфана аэоропорту оңдолду

Жалал-Абад

Базар-Коргондун Арстанбап айылында 16-июлдагы сел кырсыгынын кесепетин жоюу жана чыгымдарын тактоо иштери жүрүп жатат. Район акими Бакыт Козуев 17-июлда "Азаттыкка" билдиргендей, сел ташкыны төрт үйдү бузуп кетти.

Ысык-Көл

Ишкер, жарандык активист Эрик Абдыкалыков Ысык-Көл облусундагы оорукана жана стационарларды кыдырып, коронавируска жана пневмонияга чалдыккан бейтаптарды дарылаган дарыгер жана медайымдарды сүрөткө тартып, кыскача өмүр-таржымалдарын жазып, социалдык тармактардагы баракчаларына бөлүшүп жатат. "Азаттык" автордун уруксатын алып, ак халатчан өмүр сакчыларын бир сүрөтбаянга топтоду.