Даңазалуу маек уюштуруучу, сыналгы алып баруучу Ларри Кинг 23-январда Лос-Анжелес шаарында 87 жашында коронавирустун айынан дүйнөдөн кайтты. Ал “Си-Эн-Эн” сыналгы каналында 25 жыл бою өзүнүн калайык сүймөнчүгүнө айланган берүүсүн алып барган.
Лоуренс Харви Зейгер (Lawrence Harvey Zeiger; кийин Ларри Кинг - Larry King ысымын алган) 1933-жылы 19-ноябрда Бруклинде АКШга чет өлкөдөн көчүп келген жөөт келгиндеринин үй-бүлөсүндө туулган.
Ларринин энеси Женни Гитлиц – Беларустан, атасы Аарон Зейгер Австриядан журт которуп келишкен. Алардын тун уулу Ирвин 1932-жылы туулган, бирок алты жашында сокур ичегиден көз жумган. Ларриден кийин алардын үй-бүлөсүндө дагы бир уул – иниси Марти төрөлгөн.
Кинг өмүрүндө жети аялга үйлөнгөн. Үч башка аялынан 4 бала көргөн. Алардын экөөсү (65 жаштагы Энди менен 52 жаштагы Чайа) 2020-жылы каза болгон.
Кинг мырза COVID-19 илдетине кабылып, 2020-жылдын декабрынын акыркы ондугунда Лос-Анжелестеги ооруканага жаткырылган. Бул маалымат басма сөз каражаттарына 2021-жылы 2-январда гана белгилүү болгон.
Ал узак жылдар кант диабетинин азабын тартып жүргөн, 2019-жылы олуттуу инсультка да учураган эле. Ларри Кинг 23-январда Лос-Анжелес шаарындагы ооруканада 87 жашында көз жумган.
Маалыматка караганда, Ларри Кинг өзүнүн 60 жылдык журналисттик ишмердиги маалында миңдеген тарыхый инсандар, дүйнөлүк лидерлер, саясатчылар, өнөрпоздор менен ар кыл сыналгы каналдары үчүн маек алып барган.
Миллиондогон көрүүчүлөр анын “Си-Эн-Эн” сыналгы каналындагы “Ободо түз – Ларри Кинг” ("Larry King Live") берүүсүн 1985-жылдан 2010-жылга чейин кызыгуу менен көрүшкөн. Кинг мырзанын бул берүүсү 2010-жылы Гиннесстин рекорддор китебине алмаштырылгыс алып баруучунун эң узак мөөнөттүк шоусу катары киргизилген.
Маек маалында Кинг мырза өтө татаал саясий суроолорду жандуу талкуу түрүндө сунуштай алган жана көрүүчүлөрдүн суроолоруна жоопторду да уюштурган.
Анын айрым сынчылары Кинг мырза өз конокторуна “ыңгайлуураак” суроолорду алдын ала даярдап алат деп сындаган учурлар болгон. Кинг болсо өз коногунун бейнесин адатта көрүүчүлөр менен чогуу ачып келгенин айткан.
Андан тышкары ал өзүн кесипкөй журналист эмес, жөнөкөй киши катары кабыл алуу керектиги тууралуу билдирип келчү.
Ал өз милдетин тек гана маалыматты өз коногунан көрөрмандарына түз өткөрүп берчү арачылыкта көргөн.
Кинг “Хартфорд Курант” басылмасына 2007-жылы курган маегинде көрөрман өз бүтүмүн өз алдынча чыгарып алуусу абзел экенин айтып: “...Мен мында бүтүм жасоо үчүн отурган жокмун. Менин берүүм – жаңжал ширелген ток-шоу эмес. Ошентип, мен (өз конокторумду) жакшырааак бейнеде көрсөтүүгө тырышам”, – деп баса белгилеген.
“Си-Эн-Эн” сыналгы каналындагы “Ободо түз – Ларри Кинг” берүүсүнүн акыркы чыгарылышы 2010-жылы 16-декабрда обого чыккан. Анын эң соңку коногу – киноөнөрпоз жана саясий ишмер Арнольд Шварценеггер болгон.
2012-жылдан тартып Кинг мырза “Эми болсо – Ларри Кинг” (“Larry King Now”) берүүсүн орусиялыктар негиздеген “Ар-Ти Америка” (“RT America”) сыналгы каналында алып бара баштаган. Бул канал Кремлдин саясий үгүтүн чет өлкөлөрдө англис тилинде жүзөгө ашыруучу бир тараптуу медиа каражаттарынын бири катары таанымал.
Айрым сынчылары Ларри Кингди орусиялык бийликчил бир тараптуу медиа каражаты үчүн иштеп жатканыңыз кандай? деп сураганда, ал өзүнүн шоусунун редакциялык көзөмөлү өзүнүн гана колунда экендигин, орусиялык канал “Эми болсо – Ларри Кинг” шоусун тек гана обого чыгаруу үчүн келишим түзгөндүгүн, Путиндин дарегине карата сын пикирлерди өз берүүлөрүнөн эч бир жолу кесишпеген соң, өзүндө бул медиа шерикке карата эч кандай доомат жоктугун билдирген.
Кингдин маанилүү маектештеринин бири – Орусиянын президенти Владимир Путин болду. 2000-жылы 12-августта деңиз астында сүзүүчү “Курск” кемеси кыйроого учураган. Анын 118 деңизчиден турган экипажы толук набыт болгон.
14-августта эле бийликтер бүт деңизчилер өлгөнүн билишкен, бирок 16-августта жана 20-августта Путин деңизчилерди сактап калуу үчүн бардык аргалар жасалып жатат, деп жалган айткан. 22-августта ал Мурманск облусунда деңизчилердин жакындары менен жолукканда “аза күтүү” деген жөрөлгөнү шарттуу эле жарыялап жатышкандыктарын айтып тайсалдаган. Бул жыйындын жүрүшү тууралуу кийин “Коммерсант” басылмасы толук жарыялаган.
2000-жылы 23-августта бүткүл Орусия боюнча набыт болгон деңизчилерди эскерген аза күтүү күнү жарыяланган.
Ал эми 2000-жылы 8-сентябрда Путин Ларри Кингдин берүүсүнүн коногу болгон. Путин БУУнун Башкы жыйынынын салтанаттуу отурумуна катышуу үчүн Нью-Йоркко келген кези болчу.
Тасма. В.Путин жана Ларри Кинг. 2000-жылдын 8-сентябры.
Аскердик кеменин тагдыры тууралуу орусиялыктардын өздөрү чыныгы кырдаалды билбестен, жалган кабар менен тил эмизилип келген чакта, биринчи жолу Путин Ларри Кингдин кеменин тагдыры тууралуу суроосуна өзүнүн көз карашын билдирип: “Ал чөгүп кетти”, – деп жооп узаткан жана анын себеби кемедеги жарылуу болгондугун кошумчалаган.
1997-жылы Ларри Кинг айрым америкалык өнөрпоздор жана Голливуддун жетекчилери менен биргелешип ошол кездеги Германиянын канцлери Гельмут Коль мырзага кат жолдоп, бул өлкөдөгү сайентологдорду колдоого алган. Бул кат “International Herald Tribune” басылмасында жарык көргөн.
Ларри Кинг “Эмми сыйлыгына” (“Emmy Award”; 2011) жана башка кадыр-барктуу сыйлыктарга ээ болгон, айрым университеттердин ардактуу даражасына татыган.
Ал сыналгы берүүлөрдү жандуу алып баруудагы кайталангыс өнөр ээси катары журналистика тарыхында калмакчы.
