30-сентябрга караган түнү Орусиянын Украинанын борбору Киевге жана анын айланасына жасаган ракета, дрон чабуулдарынан кеминде үч адам каза болуп, төрт киши жараат алды.
Курмандыктардын арасында Киевдин жанындагы Вышгород шаарында үйдүн урандылары астынан табылган бир бала бар.
Киев шаардык аскердик администрациясы менен мэр Виталий Кличконун маалыматына караганда, ракеталык соккулардан кийин шаардын бир катар райондорунда өрт чыккан. Святошино районунда жеке турак үйлөр күйүп, Голосеев районунда кампа өрттөнгөн. Оболонь районунда дүкөндөн өрт чыккан. Ал эми Соломенка районунда кампа имаратына сокку тийгени кабарланды.
Кличко борбор калаанын Шевченко районундагы батыш өлкөлөрүнүн элчиликтеринин биринин аймагынан да ракетанын сыныктары табылганын билдирди.
Украинанын Аскердик-аба күчтөрүнүн маалыматына караганда, Орусия түн ичинде Украинага каршы "Циркон"/"Оникс" ракеталарын, "Искандер-М"/С-400 баллистикалык ракеталарын жана 188 сокку уруучу учкучсуз аппаратты учурган. Алардын 86сы реактивдүү дрон болгон.
Украинанын абадан коргонуу күчтөрү беш баллистикалык ракета жана 155 дрон атып түшүрүлгөнүн маалымдады. Негизги сокку Киевге жана Киев облусуна багытталган.
Мындан тышкары шейшемби күнү кечинде орус дрондору Харьковдун үч районуна да чабуул жасаган. Шаар мэри Игорь Тереховдун айтымында, автоунаа жана жеке үйдүн терезелери жабыркап, бир бала катуу стресске кабылган.
Украинанын бир катар аймактарында, анын ичинде Киевде жана коңшу облустарда эң жогорку деңгээлдеги аба коркунучу режими жарыяланган бойдон турат.
Орусиянын армиясы 29-сентябрга караган түнү дагы Киев шаары жана Киев облусуна чабуул койду. Киевдин мэри Виталий Кличконун билдиришинче, Соломенск районунда ракетанын сыныктары турак үйдүн короосуна түшүп, шаардагы окуу жайдын корпусуна, административдик имараттын инфратүзүмүнө сокку урулду. Ушул эле райондогу эки жер там зыян тартты. Украинанын Өзгөчө кырдаалдар боюнча кызматы эртең менен орус армиясы Голосеев районундагы алты кабаттуу турак үйгө сокку уруп, бир киши жарат алганын кабарлады.
Киев облусунда жер там жана ага кошуна үйдүн чатыры күйдү, эки киши жараат алып ооруканага жеткирилди.
Кличко 28-сентябрдагы чабуул маалында эки киши каза болгонун, 26 адам ар кандай жараат алса, сегизи ооруканага жаткырылганын билдирди.
Одессанын шаардык администрация башчысы Сергей Лысактын билдиришинче, эртең менен жана кечинде Орусия калаанын инфратүзүмүнө чабуул коюп, үч жүк ташуучу автоунаа жок болду. Сегиз машине, имараттар зыян тартты. Облус боюнча сегиз киши жараат алды.
Украинанын Абадан коргонуу күчтөрү Орусия эки баллистикалык ракета жана 152 дрон менен чабуул жасады. Ракеталар жана 106 дрон атып түшүрүлгөнүн кабарлады.
Орусиянын Коргоо министрлиги Киевдеги соккулар "Фламинго" ракеталарын сактоо үчүн колдонулган деп болжолдонгон локомотив депосуна, ошондой эле "Бимобайл" жана "Парковый" маалымат борборлоруна жана Киев облусундагы "Белогородка" кампа комплексине тийгенин билдирди. Мындан тышкары, Одесса облусунда "Усатово" электр подстанциясы, дрондорду чыгаруучу жай, Измаилдеги порт инфраструктурасы, Одесса портундагы жүк ташуучу кеме жана Одесса портуна бараткан дагы бир жүк ташуучу кеме бутага алынганы айтылды.
Кийинчерээк Украинанын президенти Владимир Зеленский Киевде "Киев-Пассажирский" бекетиндеги депо, ошондой эле бизнес-борборлор жана маалымат борборлору жабыркаганын жазды.
29-сентябрга караган түнү Орусиянын аскерлери Киевге кайрадан ракета жана учкучсуз учактар менен сокку урду. Украинанын бийлиги билдиргендей, баллистикалык ракетанын сыныктары турак үйдүн жанына түшүп, дрондордун бири жолдун жүрүүчү бөлүгүнө кулаган.
Киев шаарынын мэри Виталий Кличконун маалыматына караганда, Соломенка районунда ракетанын сыныктары көп кабаттуу үйдүн короосуна түшкөн. Алгач өрт катталбаганы айтылганы менен кийинчерээк жакын жердеги окуу жайдын имараттарынын биринде өрт чыккан.
Ошондой эле Печерск районунда үч кабаттуу турак эмес имараттан өрт чыкканы кабарланды. Киев шаардык аскердик администрациясы дрондордун бири жолдун жүрүүчү бөлүгүнө кулаганын маалымдады.
Голосеев районунда болсо учкучсуз учактын сыныктары беш кабаттуу үйдүн чатырына түшүп, өрт чыккан.
Киев облусунун Буча районунда дагы дрон чабуулунун кесепетинен жеке турак үй жана коңшу үйдүн чатыры өрттөнгөн. Украинанын Өзгөчө кырдаалдар кызматынын маалыматына ылайык, өрт 300 чарчы метрден ашык аянтты каптаган. Куткаруучулар өрттү өчүрүүгө жетишип калган. Чабуулдан жабыркаган эки адам ооруканага жеткирилди.
Түнкү соккулар 28-сентябрда күндүз Киевдин борборуна жасалган чабуулдардын уландысы болду. Шаар бийлигинин маалыматына караганда, ошол күнү болгон чабуулдардан эки киши каза болуп, дагы 26 адам жараат алган. Алардын сегизи ооруканага жаткырылган. Биринин абалы оор деп бааланууда.
Каза болгондордун экөө тең украин Улуттук илимдер академиясынын имаратына урулган дрон чабуулунун курмандыгы болгон. Соккудан кийин ири өрт чыгып, имараттагы адамдардын айрымдары терезелер аркылуу сыртка чыгууга аргасыз болгон.
28-сентябрдагы дагы бир сокку Киевдеги "Добробут" медициналык борборунун имаратына тийген. Украин бийлиги Орусиянын соңку чабуулдарында жарандык объектилер бутага алынганын билдирүүдө.
Орусия бул маалыматтар боюнча комментарий бере элек.
Татарстандын башчысы Рустам Миннаханов "Борбор" ("Центр") жана "Түндүк" ("Север") аскер топторунун мурдагы командири Александр Лапин республиканын вице-премьер-министри болорун билдирди. Бул тууралуу Миннаханов Мамлекеттик кеңештеги жылдык кайрылуусунда билдиргенин ТАСС агенттиги жазды.
Лапин "атайын аскердик операциянын" катышуучуларына колдоо көрсөтүүнү көзөмөлдөйт (орус бийликтери Украинага толук масштабдуу бастырып кирип, согуш ачканын ушинтип атайт). Бул үчүн Татарстан өкмөтүнүн курамында өзүнчө ушундай бөлүм түзүлдү.
Лапин запастагы генерал-полковник, ар кайсыл жылдарда Сириядагы аскердик топтун штаб башчысы, "Борбор" жана "Түндүк" топторунун командири болуп иштеген. 2022-жылдын күзүндө ал Чеченстандын лидери Рамзан Кадыров жана ошол учурда "Вагнер" аскердик тобун жетектеген Евгений Пригожин менен жаңжалдашкан. Алар Лиман шаарын алдырганы үчүн Орусиянын Борбордук аскер округунун командачысы Александр Лапинди түздөн-түз күнөөлөшкөн. Көп өтпөй октябрда генерал-полковник Лапин кызматынан четтетилген.
2026-жылдын июнь айында украин соту Лапинди Украинанын аймактык бүтүндүгүнө жана кол тийбестигине кол салуу, ошондой эле агрессивдүү согушка даярдануу жана жүргүзүү деген айыптар менен сыртынан өмүр бою эркинен ажыраткан.
Тергөөнүн маалыматына ылайык, Лапин Беларус менен Орусиядан Сумы, Чернигов, Киев облустарына, ошондой эле Киевге сокку урууда орус армиясынын башында турган.
"2022-жылдын февраль-март айларында бул генерал формалдуу "кагаз жүзүндө" эле командир болгон эмес. Ал түздөн-түз басып алууну уюштуруп, ага баш ийген бөлүктөрдүн аракеттерин пландап, координациялап, буйруктарды чыгарып, аскердик аракеттерди уланышын камсыз кылган", - деп айтылат Украинанын Башкы прокуратуранын билдирүүсүндө.
Украин тарап орус армиясы баш калаа Киевди, мамлекеттик бийлик органдарын, аскер башкармалыктарын басып алып, өз көзөмөлүнө алууну максат кылганын белгилеген.