Сентябрь айында дрондордун чабуулдарынан улам Орусиядагы эң ири алты мунай иштетүүчү заводдун үчөө өндүрүш көлөмүн олуттуу кыскартты же толугу менен токтотту. Бул тууралуу Reuters агенттиги күйүүчү май рыногундагы булактарга таянып билдирди.
Reuters маалыматына ылайык, Омск, Кириши, Танеко, Волгоград, НОРСИ жана Пермь мунай иштетүүчү заводдору Орусиядагы дизел өндүрүшүнүн болжол менен жарымын камсыздайт.
Агенттиктин булактарынын айтымында, Кириши мунай иштетүүчү заводу толугу менен токтогон. Ал эми Волгоград заводунда жана НОРСИде өндүрүш долбоордук кубаттуулуктун болжол менен төрттөн бир бөлүгүндө гана жүрүп жатат.
Reuters белгилегендей, АКШ менен Ирандын ортосундагы аскердик жаңжал дүйнөлүк күйүүчү май жеткирүүлөрүнө терс таасирин тийгизди. Мындан тышкары, украиналык дрондордун мунай иштетүүчү заводдорго соккулары Орусиядагы күйүүчү май өндүрүшүн азайтып, бийликти бензин менен дизелдин экспортун чектөөгө мажбур кылды.
Орусиялык аскерлер 15-сентябрга караган түнү Киевге жана Украинанын башка аймактарына чабуул коюшту.
Дрондор Дарница жана Голосеев райондорундагы май куюучу жайларга сокку урган.
Мэр Виталий Кличко дрон Оболонь районундагы кампага тийиши мүмкүн экенин айтты. Соломен районунда киши жашабаган турак жай кыйраган. Чабуулдардын кесепетинен бир адам каза болуп, дагы жетөө жараат алган.
Одесса облустук аскердик администрациясынын башчысы Олег Кипер аймактын жарандык инфратүзүмүнө жапырт чабуул болгонун кабарлады. Анын айтымында, турак үйлөр, логистикалык объектилер, порт жана транспорттук инфратүзүмдөргө сокку урулган. Жеке үйлөрдүн чатырлары, фасаддары, айнектери, ондогон гараждар жана автоунаалар зыян тартты. Адамдар арасында жабыркагандар жок.
Днепропетровск облустук аскердик администрациясынын башчысы Александр Ганжа Никополь районундагы орусиялык чабуулдардан эки адам жараат алганын билдирди.
Орусиянын Коргоо министрлиги Одесса облусунун Великая Балка айылында логистикалык борбор, ал эми Черноморск портундагы жүк ташуучу кеме жана паром жабыркаганын билдирди.
Мекеменин билдирүүсүндө орусиялык аскерлер Украинанын батыш аймактарындагы Европа өлкөлөрүнөн аскердик багыттагы жүктөрдү ташуу үчүн колдонулган темир жол инфратүзүмүнүн объектилерине сокку урууну уланткан.
Украинанын Өзгөчө кырдаалдар мамлекеттик кызматы Волында орусиялык соккудан кийин тепловоз өрттөнүп кеткенин, жабыркагандар жоктугун кабарлады.
Орусия 15-сентябрга караган түнү Украинага карай 200 учкучсуз учак учуруп, анын 187син Украина куралдуу күчтөрүнүн Аба күчтөрү атып түшүргөн. Маалыматты көз карандысыз булактар ырастай элек.
Украинанын президенти Владимир Зеленский АКШ сунуштаган энергетикалык инфраструктура объекттерине өз ара сокку урууну токтотуу демилгесин колдоого даяр экенин билдирди. Бирок, анын айтымында, бул үчүн Вашингтон Орусиянын согушту токтотууга чындап даяр экенине кепилдик бериши керек.
14-сентябрдагы видео кайрылуусунда Зеленский Украина чыңалууну азайтууга багытталган кадамдарды колдоого даяр экенин айтты. Ал эки тарап тең энергетикалык объекттерге сокку уруусун токтотсо деэскалациянын алгачкы кадамы болуп каларын белгиледи.
Ошол эле учурда украин лидери азырынча Москва согушту аяктоого чындап эле кызыкдар экенин көрсөткөн жок деген пикирин билдирди. Зеленский туруктуу жана адилеттүү чечим керек экенин белгилеп, өнөктөштөрдөн конкреттүү сунуштарды күтүп жатканын айтты.
Мындай билдирүү АКШ президенти Дональд Трамп Украина менен Орусия бири-биринин энергетикалык инфраструктурасына сокку урууну токтотууга макул болгонун жарыялагандан кийин жасалды.
Орусия бийлиги азырынча бул маалымат боюнча расмий комментарий бере элек.
Financial Times басылмасы Кремлге жакын булактарга таянып жазгандай, Орусиянын президенти Владимир Путин кыш келгенге чейин Украинанын энергетикалык объекттерине чабуулдарды токтотууну көздөбөй жатат. Басылманын маалыматына караганда, Кремль мындай жол менен Киевге басымды күчөтүүгө аракеттенүүдө. Августтун соңунда Орусиянын Коргоо министрлиги Украинадагы энергетикалык объекттерге жаңы жапырт соккулар даярдалып жатканын билдирген.
АКШ президенти Дональд Трамп Украина менен Орусия бири-биринин энергетикалык объектилерине сокку урбоону макулдашканын 14-сентябрда Truth соцтармагындагы баракчасына жазды.
“Дүйнөдөгү кара майдын баасынын өсүшү Орусия менен Украинадагы согуштан улам болуп жатат, Иран менен согушка байланыштуу эмес”, - деди Трамп.
Бирок Украина менен Орусиянын бийликтери мындай келишимге жетишкенин буга чейин расмий кабарлаган эмес.
Орусия коңшусу Украинага каршы толук масштабдуу согуш ачып, анын аймагын күн сайын дрон жана ракета менен аткылап келатканына бешинчи жыл болуп баратат. Соңку жылдары Орусиянын өзүнүн аймагы да бутага көп алынууда. Украина Орусиядагы чабуулдарга адатта комментарий бербейт, болгону, Москванын согуш машинасын токтотуу үчүн анын мунай жана аскердик продукция чыгаруучу ишканаларын жарактан чыгаруу керек деп эсептей турганын айтып калат.
