"Талибан" кыймылы Ооганстандын баш калаасы Кабулдун түндүгүндөгү Баграм аба базасын эч каршылыксыз ээлеп алды. Бул маалыматты 15-августта базанын командири, генерал Навидулла Мирзайе "Азаттыктын" ооган кызматына ырастады.
"Талибдер базага кирип келгенде ооган күчтөрү чыгып кетишти. Баграм аэропорту "Талибандын" көзөмөлүндө", - деп айтты генерал Мирзайе.
Баграм - Ооганстандагы эң ири аба базасы. Бул базада миңдеген адамдар камалган түрмө да бар.
Бул аскердик жайды 1980-жылдары советтик күчтөр курган. Ооганстандагы америкалык операциялар башталгандан бери АКШ менен НАТОнун күчтөрүнүн эң чоң базасына айланган. Куралдуу кагылыштар күчөп турган учурда бул базада он миңдеген аскерлер жайгашып турган эле.
Америкалык аскерлер жана алардын союздаштары Баграмды 2-июлда ооган коопсуздук күчтөрүнө өткөрүп берген.
АКШ аскерлерин ооган жергесинен дан чыгара баштагандан бери талибдер Ооганстандын көпчүлүк аймактарын басып алды. Учурда жоочулар баш калаа Кабулду курчап турушат. Бийликти өткөрүп берүү маселеси боюнча сүйлөшүүлөр өтүп жатканы кабарланууда.
Дагы караңыз
ТИМ: Кыргызстандын Ооганстандагы элчилиги кадимки тартипте иштеп жататКабул: "Талибандын" өкүлдөрү ооган өкмөтү менен сүйлөшөтПакистан Ооганстан менен чек арасындагы өткөрмө бекетти жапты"Талибан" Кабулга күч менен кирбей турганын билдирди Маршал Дустум Өзбекстандын Термез шаарына качты