Улуттук коопсуздук боюнча мамлекеттик комитет (УКМК) Түндүк-Чыгыш бажысынын бажылык тариздөө борборунун текшерүү тобунун инспектору (1995-жылы туулган Д.М.) кармалганын билдирди.
Атайын кызматтын маалыматында ал кызмат абалын кыянаттык менен пайдаланууга жана товарды туура эмес декларация кылууга шек саналып жатат.
УКМК инспектор Түндүк-Чыгыш бажысы аркылуу “кара металл” деген аталыш менен 98 жарыктандыруу мамысынан турган жүктү өткөргөнүн кабарлады. Жыйынтыгында бюджетке төлөнүүгө тийиш болгон милдеттүү бажы төлөмдөрү түшпөй, мамлекетке көп суммада зыян келтирилген. Шектүү УКМКнын тергөө абагына киргизилди.
Шектүүнүн адвокаты менен жакындары комментарий бере элек. (BTo)