Жогорку Кеңештин депутаты Дастан Бекешев түрмөдө, тергөө абагында жаткан адамдар мамлекеттик гимнди туура эмес ырдап же таң эрте аны аткарууга кечиккендер жазага тартылып жатканын билдирди. Бул тууралуу ал парламенттин 28-октябрдагы жыйынында айтты.
“Мен мамлекеттик гимнди сүйөм. Бирок таң атпай гимн ырдатып, туура эмес ырдагандарды жазага тартуу канчалык жыйынтык берет? Албетте, түрмө курорт эмес. Аны баарыбыз түшүнүп турабыз. Бирок мен адамгерчиликтүү мамиле болсо экен дейм. Алар бузуп ала турган эрежелер көп болууда”, - деди ал.
Жаза аткаруу мамлекеттик кызматынын төрагасынын орун басары Нурлан Сарчаев жабык жайларда жаткандарга гимн ырдатуу аларды мекенчилдикке чакыруунун жолу экенин айтты. Мындан тышкары гимнди туура эмес ырдаган деген негизде камактагы адам айып изоляторуна (ШИЗО) киргизилген окуялар жок экенин кабарлады.
Дастан Бекешев камактагылар аларга болгон мыйзамсыз же катаал аракеттер боюнча эч качан арыз жазбай турганын билдирип, Нурлан Сарчаев гимн боюнча талапты карап көрүшөрүн айтты. (BTo)