НАРЫН. Бүгүн Нарын облусуна АКШнын Монтана штатынан делегация келди. «Азаттыктан» мурда кабарланып жүргөндөй, АКШнын Монтана штаты менен Нарын облусунун ортосунда экономикалык, социалдык, маданий жана башка багыттар боюнча байланыштар акыркы 3 жылдан бери уланууда. Курамы 5 адамдан турган америкалык делегация облус губернатору Аскар Салымбековдун кабыл алуусунда болуп, мындан аркы байланыштар тууралуу сүйлөшүүлөрдү жүргүздү. Учурда Монтана штатында нарындык 2 студент билим алышууда. Ал эми Монтана университетинин ректоруна Нарын мамлекеттик университетинин ардактуу профессору деген наам ыйгарылган.
