КАРАКОЛ. Облустук билим берүү башкармалыгынын башчысы Доктургүл Кендирбаеванын маалыматына караганда, облуста 100 миң 328 мектеп окуучусу бар. Быйылкы окуу жылында жетилүү аттестатына 6 миң 945 бүтүрүүчү ээ болот. Мугалимдердин кесиптик деңгээлин көтөрүү боюнча Жетиөгүз районунда Американын ЮСАИД эл аралык агенттиги менен кызматташтык байланыш түзүлүп, аталган агенттиктен каржылык колдоолор келмекчи. Ал эми быйылкы окуу жылында 357 мугалим жетишпей, 133 окуучу мектепке тартылбай калган. Ошондой эле 23 мектептин директору ээлеген кызматтарынан бошотулуп, агартуу тармагынын 40ка жакын кызматкерине административдик чаралар көрүлгөн.
