7-мартта Иракта өткөн парламенттик шайлоонун соңку жыйынтыгы бүгүн жарыяланаарын өлкөнүн Борбордук шайлоо комиссиясы билдирди. Шайлоонун буга чейин чыгарылган жыйынтыктарына ылайык, башкы эки атаандаш – мурдагы премьер-министр Аяд Аллави менен азыркы өкмөт-башчы Нури Ал Маликинин саясий партиялары – дээрлик бирдей эле добуштарга ээ болушкан эле. Ошондуктан Ички иштер министрлиги мунун айынан тополоң чыгып кетиши мүмкүн деп, шайлоонун акыркы жыйынтыктарын кийинчерээк жарыялоого чакырган. Ошого карабай, шайлоо комиссиясы жыйынтыкты бүгүн айтаарын билдирди.
