Европадагы Коопсуздук жана Кызматташтык Уюмунун байкоочулар тобу бүгүн Москвадан ушундай корутундусун жарыялашты.
“Жыйналуу, биригүү, ой-пикир билдирүү боюнча негизги укуктардын чектелиши саясий карым-катыштын мейкиндигин тарытты, бул чыныгы атаандаштыкты жок кылды, - деди ЕККУнун кыска мөөнөттүү байкоочулар миссиясынын башчысы жана атайын координатору Майкл Жорж Линк.
Орусия БШКсынын төрайымы Элла Панфилова билдиргендей, бюллетендердин 99,8% саналгандан кийин президент Владимир Путинге добуштардын 76,7% берилгени аныкталды. Бул Путиндин буга чейинки үч шайлоодон алгандарынан да жогору көрсөткүч.
Добуш берүүгө болсо расмий эсеп боюнча калктын 67,47% же 73,36 миллион киши катышкан. Компартиянын талапкери, 12% жакын добуш менен экинчи орун алган Павел Грудинин Орусиянын 18-марттагы саясий өнөктүгүн “КМШ аймагындагы эң ыплас шайлоо” деп мүнөздөдү.
Коңшу Украинанын президенти Петро Порошенко болсо аннексияланган Крымдагы шайлоонун жыйынтыгын “фальсификация” деп атады.
18- марттагы президенттик шайлоого сегиз талапкер катышты. Путинди сындап жүргөн оппозициячыл саясатчы Алексей Навальный шайлоого киргизилген эмес. (UE)