Бишкектин мэри Албек Ибраимов бир нече кылмыш иши боюнча шектүү катары камакка алынды. Мындан соң премьер-министр Мухаммедкалый Абылгазиев Ибраимовду кызматтан кетирүү жөнүндө буйрукка кол койду. Экс-президент Алмазбек Атамбаевдин бийликтеги акыркы кадры делген Ибраимовдун кызматтан кетиши менен "Бишкекке кандай мэр керек?" деген талкуулар башталды. Акыркы жылдары ар кыл сындардын бутасына айланган борбор калаа кандай өзгөрүүлөргө муктаж? Бул суроолор “Эксперттер талдайт” берүүсүндө талкууланды. Талкууга Кыргызстандын мурдагы премьер-министри Амангелди Муралиев, жергиликтүү бийлик боюнча эксперт Алмаз Кулматов жана Бишкек шаардык кеңешинин депутаты Рысбай Аматов катышты.