Чех өкмөтү коронавирустун жайылышына бөгөт коюуга байланыштуу чектөөлөрдү Батыш Европадагы башка өлкөлөрдүн өкмөттөрүнө караганда ыкчамыраак кабыл алып, 12-мартта өлкө аймагына “чукул кырдаал” жарыялады.
Жума күнгө (13-мартка) карата COVID-19 вирусун жуктургандар Чехияда 170тей кишиге жетти, алардын баары дарыланууда.
Коронавирустун жайылышынын алдын алуу максатында Чехия 16-марттан тарта бардык чек ара бекеттерин жапмай болду.
Чех жарандары чет өлкөлөргө убактылуу чыгарылбайт. Туруктуу же убактылуу жашоого уруксаты бар чет өлкөлүктөрдөн башка болжолдуу келгиндер жакынкы мезгилде Чехия аймагына киргизилбейт.
