Линктер

ЧУКУЛ КАБАР!
3-декабрь, 2020 бейшемби, Бишкек убактысы 23:16

Жалдагы чуулгандуу мушташ үчүн айыпталгандарга өкүм чыкты


Окуя болгон жерден тартылган видеодон алынган сүрөт. 28-август, 2019-жыл.

Бишкектин Ленин райондук соту 27-августта Жал кичирайонундагы чуулгандуу мушташ үчүн айыпталган эки бир тууганга өкүм чыгарды. Бул тууралуу Бишкек шаардык сотунун басма сөз катчысы Айсулуу Жаасынова «Азаттыкка» билдирди.

Соттун чечимине ылайык, бул иш боюнча айыпталган 34 жаштагы Жаныбек Бапышев Жазык кодексинин 39-130-беренеси («Киши өлтүрүү аракети») менен 10 жылга кесилди. Анын бир тууганы, 20 жаштагы Калысбек Сейитбеков ушул эле берененин негизинде 11 жылга эркинен ажыратылды.

Былтыр 28-августта Ахунбаев жана Курчатов көчөлөрүнүн кесилишиндеги мушташта эки адам мыкаачылык менен сабалган. Аларды сабаганы айтылган Жаныбек Бапышев менен Калысбек Сейитбеков окуя болгон учурда кармалып, кайра коё берилген.

Жабыркагандардын жакындары арыз жазган соң коомчулукта бул маселе чоң талкууга түшүп, кийин аларга издөө жарыяланган. 6-сентябрда изделип жаткан эки адам милицияга өздөрү келип, камакка алынган.

Кийинчерээк Улуттук коопсуздук боюнча мамлекеттик комитет (УКМК) бул ишке байланыштуу Чүй облустук ички иштер башкармалыгынын Криминалдык милиция кызматынын уюшкан кылмыштуулукка каршы күрөш бөлүмүнүн мурдагы кызматкери, соттолгондордун тууганы Казыбек Бапышовду кармаган.

Ага милицияда иштеп турган учурунда 28-августта окуя болгон жерге жетип барып, Бапышев менен Сейитбековду кармаган милиция кызматкерлерине тоскоолдук кылып, инилерин бошотуп кеткен деген айып коюлган.

Былтыр 23-декабрда Бишкектин Биринчи май райондук соту аны үй камагына бошоткон. (NT)

Пикирлерди көрүңүз (10)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG