Линктер

ЧУКУЛ КАБАР!
25-ноябрь, 2020 шаршемби, Бишкек убактысы 17:00

Камактагы саясатчы Жээнбеков бюджеттик кызматкерлерге кайрылды


Равшан Жээнбеков.

Камактагы оппозициялык саясатчы Равшан Жээнбеков 30-сентябрда мугалимдерге, дарыгерлерге жана укук коргоо органдарынын кызматкерлерине кайрылды.

Анда Жээнбеков бийликчил деген партиялар «Форма №2» аркылуу добуштарды ачык эле сатып алып жатканын, бюджеттик мекемелердин кызматкерлерин – мугалимдерди, дарыгерлерди жана укук коргоо органдарынын кызматкерлерин пайдаланып, административдик ресурсту колдонуп жатканын жазган.

Бийликчил партиялар мамлекетке көз каранды бюджеттик кызматкерлердин абалынан пайдаланып жатканын айткан.

Саясатчы дарыгерлерди, мугалимдерди, укук коргоо органдарынын кызматкерлерин бийликти ачык сындап чыгып, куугунтукка кабылып жаткандарды колдоого чакырган.

«Силер – жарансыңар, силер – «административдик ресурс» эмессиңер, силер – бийликтин менчиги эмессиңер, силердин өз атыңар, укуктарыңар жана эркиндигиңер бар. Билип койгула, бүгүн натыйжасыз жана коррупциялашкан бийлик силерге көз каранды болуп турат. Силер өзүңөр, жакындарыңар үчүн, жаңы, демократиялык Кыргызстан үчүн көп нерсени чечип коё аласыңар», деп жазылган Жээнбековдун кайрылуусунда.

Бийликчил деген партиялар добуштарды сатып алууну көздөп, шайлоочулардын паспортторун жапырт чогултуп, №2 форма аркылуу көз боёмочулукка барып жатканы тууралуу сын-пикир буга чейин да айтылган. Өткөн аптада «Бүтүн Кыргызстан», «Реформа» жана «Чоң Казат» партиялары басма сөз жыйынын өткөрүп, №2 форма аркылуу шайлоо даректерин өзгөрткөндөрдүн саны 500 миң кишиге жакындаганын айтып чыгышкан.

Борбордук шайлоо комиссиясынын (БШК) төрайымынын орун басары Абдыжапар Бекматов бул айыптоону куру доомат катары баалаган.

Ал эми президент Сооронбай Жээнбеков 26-сентябрда «Биринчи радиодогу» маегинде шайлоону калыс өткөзүүгө өзү умтуларын айтып, эки жолу күч менен бийлик алмашкан окуя бийликке сабак болушу керек экенин билдирген.

Жогорку Кеңештин мурдагы депутаты Равшан Жээнбеков Кой-Таш окуясы боюнча айыпталып, 2019-жылдын 12-декабрында камакка алынган. Ал Бишкектеги №1 тергөө абагында отурат. «Жарандык көзөмөл комитети» уюму аны саясий туткун деп тааныган. (NT)

Пикирлерди көрүңүз (3)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG