Линктер

ЧУКУЛ КАБАР!
26-ноябрь, 2020 бейшемби, Бишкек убактысы 10:05

Коомдук уюмдардын чукул жыйыны үзгүлтүккө учурады


Ала-Тоо аянтындагы митингдин 3-күнү. Люстрацияны талап кылган жаштар. Бишкек. 2020-жыл.

Жарандык коомдун бир катар өкүлдөрүнүн жыйыны «техникалык себептерге байланыштуу үзгүлтүккө учураганын» жыйын өтүп жаткан Бишкектеги «Рамадан» мейманканасынын кызматкерлери «Азаттыкка» билдиришти.

Укук коргоочу Динара Ошурахунованын айтымында жыйын өтө көп кишилер келгенине байланыштуу үзгүлтүккө учурады.

«Жыйынды бардыгы түз эфир аркылуу көрсөтүп жатышкандыктан, ага келген адамдар да көбөйүп кетти, - деди ал. - Мейманкананын жетекчилиги аянттагы адамдар да келип, тополоң болбосун деп чочулап, бизден жыйынды токтотууну аябай суранды. Биз жыйыныбызды чукул жыйынтыктоого аргасыз болдук».

Динара Ошурахунова ошентсе да жыйын максатына жеткенин айтты. Анын сөзүнө караганда, жыйын өлкөдөгү кырдаалды турукташтыруу, кайра шайлоо процедураларына байланышкан маселелерди талкуулоо максатын көздөгөн. Жыйынга жарандык активисттер, айрым саясатчылар, ошондой эле Коопсуздук кеңешинин катчысынын орун басары Өмүрбек Суваналиев катышты. Ал өз сөзүндө Коопсуздук кеңеши учурдагы жалгыз легитимдүү бийлик экенин билдирди.

Легитимдүү бийлик катары саналып жаткан Жогорку Кеңеш эки күндөн бери кезексиз жыйынга чогула албай жатат. Президент Жээнбековдун Бишкекте экени айтылганы менен учурда ал эл алдына чыга элек. Ал 5-октябрда билдирүү жасап, акыркы аракеттерди бийликти басып алуу деп баалаган.

4-октябрдагы шайлоо жыйынтыгына нааразы болгон саясий партиялардын тарапкерлери 5-октябрда митингге чыгышкан. 6-октябрга караган түнү митингчилер парламент менен президенттик администрациянын имаратын, УКМКны ээлеп, камактагы бир топ саясатчыларды бошоткон. Милиция менен кагылышууда бир адам набыт болуп, жүздөгөн адам жаракат алган.

Бул окуялардын жыйынтыгында БШК акыркы парламенттик шайлоонун жыйынтыгын жараксыз деп тапкан. (ZKo)

Пикирлерди көрүңүз (2)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG