Линктер

ЧУКУЛ КАБАР!
16-Апрель, 2021 жума, Бишкек убактысы 13:06

Айсулуу Тыныбекова кезектеги алтынын жеңди (финалдагы видео)


Айсулуу Тыныбекова алтын медаль тагынды. Киев. 2021-жылдын 28-февралы. (Cүрөт Тыныбекованын "Фейсбуктагы" баракчасынан алынды).

Бүгүн 28-февралда Киев шаарында жыйынтыкталып жаткан күрөш боюнча эл аралык турнирде Айсулуу Тыныбекова 62 кг салмакта мелдешти жеңди.

Буга чейин Мээрим Жуманазарова менен Үзүр Жусупбеков баш байгени утушуп, алтын тагынышкан. Кыргызстандык балбандар 33 мамлекеттен келген 600дөй спортчулар арасында жакшы жыйынтык көргөзүшүүдө.

Бүгүн Айсулуу Тыныбекова 62 кг салмакта мелдешти жеңди. Ал финалда украиналык балбан Илона Прокопевнюкту 9:7 эсебинде утуп, алтын медаль тагынды.



Айсулуу Тыныбекова азыркы тапта Дүйнө чемпиону. Ал бул наамга эки жыл мурда Нур-Султан шаарында өткөн чемпионатта жеткен.

Экинчи дагы бир алтындын ээси Мээрим Жуманазарова 27-февралда кыз-келиндер күрөшүнөн 68 килограммга чейинки салмакта килемге чыгып, финалда канадалык Оливия Ди Баккону жеңди (1:1).

Ал финалдык таймашка чейин үч беттеш өткөргөн. Алгач 1/8 финалда украиналык Алла Черкасованы 6:5 менен, чейрек финалда польшалык Анжелика Виежчек-Кордусту (9:7), жарым финалда болгариялык Юлиана Яневаны 9:6 менен жеңип алган.

Мээрим Жуманазарова. Индиянын Нью-Дели шаарында. 2018-жыл, 18-июль. (Фото архивден)
Мээрим Жуманазарова. Индиянын Нью-Дели шаарында. 2018-жыл, 18-июль. (Фото архивден)

Грек-рим күрөшүнөн 97 килограммга чейинки салмакта килемге чыккан Үзүр Жусупбеков финалда күрөшпөй эле жеңишке жетти. Ал алгач болгариялык балбандар Кирилл Милов (6:5) менен Марян Мариновду (8:0) катары менен утуп, жарым финалда Үзүр Жусупбеков армениялык Олимпиаданын чемпиону Артур Алексанянды 7:5 менен жеңип алып, финалга чыкты (видеодо).

Үзүр Жусупбеков (солдон экинчи) алтын медаль тагынды. Киев шаары, Украина. 2021-жылдын 27-февралы
Үзүр Жусупбеков (солдон экинчи) алтын медаль тагынды. Киев шаары, Украина. 2021-жылдын 27-февралы

Финалда Үзүргө атаандаш болуп чыккан грузиялык Гиорги Мелия килемге чыкканы менен трамва алгандыктан күрөштөн баш тартып, кыргыз балбаны жеңүүчү деп жарыяланды.

Мелдештин расмий сайтындагы маалыматка таянсак, аталган балбандардан сырткары кыргызстандык спортчулар Айпери Медет кызы күмүш, Бекболот Мырзаназар уулу коло байгеге арзыды.

Бул күнү финалдык таймашта кыз-келиндер күрөшүнөн 76 килограмм салмакта кыргызстандык Айпери Медет кызы алтын байге үчүн күрөштө эстониялык Мае Эппге жеңилип, күмүш медаль тагынды. Бир күн мурда Медет кызы украиналык Анна Мельникти 10:0, чейрек финалда венгриялык Наде Бернадетти 2:0, жарым финалда канадалык Олимпиада чемпиону Эрика Вейбени 67 секундда далысын килемге басып, таза жеңишке жетип, финалга чыккан эле.

Кыргызстанды дүйнөгө таанытып келаткан кыздар - Айсулуу Тыныбекова, (оңдон экинчи), Мээрим Жуманазарова (солдон биринчи), Айпери Медет кызы (оңдон биринчи) машыктыруучу устаты Нурбек Изабеков менен. Сербия. Белград шаары. 2020-жылдын 12-18-декабры.
Кыргызстанды дүйнөгө таанытып келаткан кыздар - Айсулуу Тыныбекова, (оңдон экинчи), Мээрим Жуманазарова (солдон биринчи), Айпери Медет кызы (оңдон биринчи) машыктыруучу устаты Нурбек Изабеков менен. Сербия. Белград шаары. 2020-жылдын 12-18-декабры.

Эркин күрөштөн 57 килограммга чейинки салмакта күч сынашкан Бекболот Мырзаназар уулу коло байге үчүн таймашта грузиялык Роберт Дингашвилини 14:5 эсебинде жеңип алды.

Жоламан Шаршенбеков Бишкектеги мелдештердин биринде (солдо) 18.01.2021
Жоламан Шаршенбеков Бишкектеги мелдештердин биринде (солдо) 18.01.2021

Грек-рим күрөшүнөн 60 килограммга чейинки салмакта килемге чыккан Жоламан Шаршенбеков төрт атаандашын ишенимдүү жеңип, бүгүн алтын медаль үчүн ат салышат. ирандык Али Реза Нежати менен күрөшмөй болду.

Шаршенбеков мелдештин 1/16 финалында Алжирден келген Абдельджеббара Джеббарини 6:2 менен утту. Жоламандын кийинки атаандашы Грузиядан Дато Чхартишвили болду, кыргыз балбаны аны 10:0 менен таза жеңди.

Чейрек финалда Шаршенбеков Дүйнөнүн жана Европанын чемпиону болгариялык Иво Ангеловго үстөмдүк жасап, 5:0 менен кийинки айлампага чыкты.

Жарым финалда Жоламандын атаандашы украиналык Виктор Петрик болуп, аны кыргыз балбаны мөөнөтүнөн мурда 12:4 менен жеңип алды (видеодо).

Финалда бүгүн 28-февралда Шаршенбеков ирандык Али Реза Нежати менен күрөшмөй болду.

Күрөштүн ушул эле түрүнөн Кайрат Түгөлбаев (77 кг.) жана эркин күрөш балбаны Икромжон Хаджимуродов (61 кг.) 3-орун үчүн күчүн сынайт.

26-февралда башталган Украинанын балбандары жана машыктыруучуларынын элесине арналган грек-рим күрөшү, эркин күрөш жана кыз-келиндер күрөшү боюнча эл аралык мелдеш бүгүн, 28-февралда аяктайт. Ага 33 өлкөдөн 600гө жакын балбан катышууда. (KO/ECh/ZKo)

Пикирлерди көрүңүз (7)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.
XS
SM
MD
LG