Улуттук коопсуздук боюнча мамлекеттик комитеттин (УКМК) мурдагы төрагасы Абдил Сегизбаевдин иши боюнча күбө катары суракка чакырылган журналист Канат Каниметов 11-мартта УКМКда сурак берип чыкты.
Ал тергөөчүнүн суроолору күбөгө эмес, айыпталуучуга берилгендей болгонун "Азаттык" радиосуна билдирди:
"Менден негизинен өзүм жөнүндө, өзүмдүн ишим жөнүндө сурап атышты. Айрым суроолор кайталанып берилди. Андай суроолор күбөгө эмес, күбөдөн айыпталуучунун категориясына өткөрүлүүчү адамга бериле турган суроолор экенин юристим да тастыктады", - деди Каниметов.
Журналист Канат Каниметов УКМКга суракка 2015-2016-жылдарда Коомдук телерадио берүү корпорациясында иштеп жүргөн учурунда жарыялаган материалдарына байланыштуу чакырылганын кошумчалады.
30 жаштагы Канат Каниметов "Апрель" телеканалынын журналисти. Ага чейин КТРКнын "Ала-Тоо" маалымат программасында иштеген.(ZKo)
