Линктер

ЧУКУЛ КАБАР!
30-Ноябрь, 2021 шейшемби, Бишкек убактысы 10:14

Камактагы Равшан Жээнбеков боор оорусу өтүшүп баратканын билдирди


Камактагы саясатчы Равшан Жээнбеков боорунда олуттуу көйгөй жаралганын билдирди. Бул тууралуу 21-октябрда анын "Фейсбуктагы" баракчасына жарыяланды.

"Саясий туткун катары менин ден соолугумдун абалы кармалган шарттан көз каранды экенин билдирем", - деп белгиледи Жээнбеков.

Маалыматты саясатчынын уулу Азат Равшан "Азаттыкка" бышыктап, атасы Бишкектеги жеке үч клиникага көрүнгөнүн, текшерүү уланып жатканын айтты.

"Диагноз боюнча боордун фиброзунун үчүнчү баскычына чалдыгыптыр, циррозго өтүп кетүү коркунучу бар экен. Бул өтө оор диагноз болуп саналат. Биздин мамлекетте бул ооруну дарылаган адистер аз экен", - деген Азат Равшан президент Садыр Жапаровго жана Улуттук коопсуздук боюнча мамлекеттик комитеттин башчысы Камчыбек Ташиевге кайрылып, атасынын дарылануусуна мүмкүнчүлүк берүүнү суранды.

Азат Равшандын кайрылуусун бул жерден угуңуз:

Жээнбековдун оорусу тууралуу буга чейин адвокаты Замир Жоошев да маалымдап, чет элден дарылануу зарылчылыгы жаралганын айткан.

Жаза аткаруу мамлекеттик кызматынан Равшан Жээнбеков саламаттыгын текшертип жатканын тастыкташты. Саясатчынын абалы дурус экенин, дарылоо зарылчылыгы дарыгерлердин тыянагына жараша болорун мекеменин басма сөз кызматы билдирди.

Аны камакка алган Улуттук коопсуздук боюнча мамлекеттик комитети маалымат бере элек.

Бишкектеги №1 тергөө абагында жаткан Равшан Жээнбеков 28-ноябрда өтүүчү парламенттик шайлоого бир мандаттуу округдан өзүнүн талапкерлигин көрсөткөн. Борбордук шайлоо комиссиясы (БШК) анын документтерин кабыл алган. Азырынча талапкер болуп каттала элек.

Равшан Жээнбеков мурдагы президент Алмазбек Атамбевди кармоо операциясындагы окуяларга айыпталып, 2019-жылдын 12-декабрында камакка алынган. Былтыр парламенттик шайлоодон кийинки башаламандык учурунда, 6-октябрдын түнүндө абактан бошотулган.

Сот саясатчы үй камагынын талаптарын бузганын жүйө келтирип, быйыл 5-августта кайра камоо чечимин чыгарган. Жээнбеков өзүнө коюлган айыпты куугунтук деп сыпаттаган. Жарандык коом аны саясий туткун деп мүнөздөп келет.

Facebook шеринеси

XS
SM
MD
LG