Президенттерди куугунтукка алуу салтын токтотуу керек. Бул тууралуу президент Садыр Жапаров мамлекеттик резиденцияда өтүп жаткан басма сөз жыйынында мурдагы президент Сооронбай Жээнбековдун экс-президент статусу тууралуу берилген суроого жооп берип жатып билдирди.
“Экс-президент боюнча калат (Сооронбай Жээнбеков. ред) Биз президенттерди жоопко тартып, куугунтуктап, кубалаган салтты токтотолучу. Ошол үчүн экс-президент дегенди бергем. Чоң кылмыштары деле жок, бирок саясий жоопкерчилиги чоң”.
Кыргызстан эгемендүүлүк алгандан бери алтынчы президент иштеп жатат. Мурдагы президенттер Аскар Акаев менен Курманбек Бакиев 2005-2020-жылдардагы элдик толкундоолордон кийин бийликтен кулатылып, экс-президент статусунан ажыратылган.
Кыргызстанды 2011-2017-жылы башкарган Алмазбек Атамбаевдин экс-президент статусу 2019-жылы козголгон кылмыш ишинин негизинде алынган.
Учурда Кыргызстанды 2010-2011-жылы башкарган Роза Отунбаеванын жана 2017-2020-жылдары президент болгон Сооронбай Жээнбековдун экс-президент статусу бар.
Facebook шеринеси