АКШнын Мамлекеттик катчысы Энтони Блинкен Кошмо Штаттар Орусияда абакта кармалып турган эки америкалык жаранды бошотууга байланыштуу орус тарапка олуттуу сунуш берилгенин билдирди. Бул тууралуу ал 27-июлда Мамлекеттик департаментте өткөн маалымат жыйынында айтты, бирок эмне сунуш экенин тактаган жок.
АКШ деңиз флотунун мурдагы аскери Пол Уилан менен баскетбол жылдызы Бритни Гринерге Орусияда тагылган айыптарда саясий өңүт бар деп эсептейт.
Блинкен бул эки америкалык боюнча сунуш бир нече апта мурда берилгенин жана бул тууралуу Орусиянын тышкы иштер министри Сергей Лавров менен сүйлөшүүгө даяр экенин айтты.
Еврошаркеттин соту орусиялык RT France телеканалына салынган тыюуну колдоду
Евробиримдиктин соту орусиялык RT France телеканалынын доо арызын четке какты. Мартта каналга “дезинформация тараткандыгы” үчүн тыюу салынган.
Шаркет Орусиянын Украинага каршы толук масштабдуу согушуна байланыштуу бурмаланган маалымат берүүдө деген негизде 1-марттан тарта орус мамлекеттик каражаттарын өз аймагында чектеген.
RT каналынын башкы редактору Маргарита Симоньян ошондо биримдикти сөз эркиндигин бузууда, согуш жөн гана “ыңгайлуу шылтоо” деп айыптаган.
Украин аскерлери Орусия көзөмөлгө алган Антонов көпүрөсүн аткылашты
Украин куралдуу күчтөрү 27-июлга караган түнү орус аскерлери ээлеп алган Херсонго жакын жердеги Антонов көпүрөсүн аткылагандан кийин ал жол жабык турат. Бул тууралуу облустун оккупациялык бийлигинин жетекчи орун басары Кирилл Стремоусов билдирди. Анын айтымында, сокку HIMARS системасынан урулган.
Ал эми украин командачылыгы сокку “өтө таамай” урулганын белгиледи.
Ошондой эле Днепр дарыясындагы темир жол көпүрөсүнө зыян келтирилгени маалымдалды.
Британиянын премьер-министри Борис Жонсон 26-июлда Украинанын президенти Владимир Зеленскийге сэр Уинстон Черчилл атындагы сыйлыкты тапшырды. Расмий Лондон сыйлык “Путиндин варвардык кол салуусуна туруштук берүүдөгү эрдик, моюн сунбоо жана ар-намыс” үчүн ыйгарылганын билдирди.
Премьердин кеңсесинде өткөн салтанатка Зеленский онлайн катышып, украиндер жана Европанын тарыхы оор күндө жардамга келгендерди эч качан унутпасын айтты. Президент ошондой эле курал-жарак менен көбүрөөк камсыздоого жана Орусияга санкцияларды күчөтүүгө чакырды.