Американын Борбордук чалгын кызматынын башчысы Уильям Бернс CBS News телеканалына курган маегинде Орусиянын армиясында бир эле адам ресурстарына байланыштуу эмес, башка дагы толгон-токой көйгөй бар экенин билдирди.
"Эгер ал 300 миң кишини мобилизациялай алса да, алардын көбү тийиштүү машыгуудан өткөрүлбөйт, жетиштүү курал-жабдык менен камсыздалбайт, материалдык-техникалык колдоого ээ болбойт", - деди Бернс.
Украинанын Куралдуу күчтөрү жума күнү Иранда чыгарылган "Мохажер-6" аталышындагы орус дронун Кара деңиздин үстүнөн атып түшүргөнүн билдирди.
Бириккен Улуттар Уюмунун (БУУ) Украинадагы аскердик кылмыштарды иликтеген эксперттеринен турган комиссиясы украин жергесине болгон сапарынын жыйынтыгын чыгарды. 23-сентябрда комиссиянын башчысы Эрик Мёсе жарыялаган баяндамада уруп-сабоо, кыйноо, сотсуз өлүм жазасына тартуу жана аскердик туткундарды кемсинтүү, аларга ырайымсыз мамиле жасоо сыяктуу кылмыштар аныкталганы белгиленди.
Украинанын полициясы Орусиянын аскерлери чегинген Изюм шаарынын жакасындагы массалык сөөк көмүлгөн жайдан өлүктөрдү эксгумациялоо иштерин аяктады. Бул тууралуу Украинанын полициясынын Башкы тергөө башкармалыгынын жетекчи орун басары Сергей Пантелеев атайын брифингде кабарлады.
Анын айтымында, мүрзөдөн жалпы 436 сөөк чыгарылды. Анын 202си аялдар, 189 эркектер жана бешөө балдар. 11 сөөк таптакыр талкаландыктан алардын жынысын аныктоо мүмкүн болгон эмес. Мындан сырткары ушул эле жайдан 21 дене аскерлерге тиешелүү экени аныкталды.