Украинанын көзөмөлүндөгү Запорожье шаарына 9-октябрга караган түнү жасалган кезектеги ракеталык катуу чабуулдун айынан кеминде 17 адам каза болгонун жергиликтүү бийлик билдирди.
Онго жакын жерде жарылуу болгонун, көп кабаттуу жана менчик үйлөр талкаланганын шаардык кеңештин катчысы Анатолий Куртев «Телеграмдагы» каналына жазды.
Орусиянын тергөө комитети Крым көпүрөсүндө 8-октябрда болгон жарылууда үч адам өлгөнүн билдирди. Маалыматта каза тапкандар жеңил автоунаада бараткан. Машине жанындагы жүк ташуучу автоунаа жарылганда күү менен сууга кулап түшкөн. Тергөө комитети жүк ташуучу автоунаанын ээси Краснодардын жашоочусу экенин аныктаган.
- Крым көпүрөсү, жарым аралды Москва 2014-жылы аннексиялап алгандан кийин орус президенти Путиндин буйругу менен 2018-жылы курулган. 2016-жылы курулуш долбоору 228 млн. долларга бааланган. Путин көпүрөнү ачуу аземине өзү келип катышкан, аны Орусиянын мамлекеттик каналдары түз көрсөткөн.
Орусия аннексиялап алган Крымдын Керч аймагындагы көпүрөдө 8-октябрда жарылуу болду.
Орусиянын президенти Владимир Путин Крым көпүрөсүндөгү бул окуяны «өзгөчө кырдаал» деп атап, өкмөттүк комиссия түзүүнү тапшырды.
"Крым темир жолу" ишканасы жүк ташыган поезддин арткы бөлүгүндө мунай куюлган цистерна күйгөнүн билдирди.
Украин президенти Владимир Зеленский Курил кыркасынын түштүк аралдарын таануу тууралуу жарлыкка 7-октябрда кол койду. Ага ылайык, Украина Итуруп, Кунашир, Шикотан жана Хабомаи аралдарын Жапониянын Орусия оккупациялап алган аймагы деп тааныйт. Өлкө парламенти – Жогорку Рада бул чечимди көпчүлүк добуш менен колдоду.
Зеленский дүйнө коомчулугун ошондой эле кадамга барууга чакырды жана Орусия оккупациялап алган бардык аймактар белгилүү бир убакыттан кийин баары бир бошотуларын айтты.