31-октябрда Украинанын абадан коргонуу системалары атып түшүргөн орусиялык ракета коңшу Молдованын айылына түштү. Бул тууралуу Молдованын Ички иштер министрлиги кабарлады.
Талкаланган ракета Наславче кыштагына кулаган. Бир нече үйлөрдүн терезелери талкаланды, тилекке жараша жабыркагандар жок.
Наславче - Молдованын түндүгүндө, Украина менен чек ара тилкесинде жайгашкан айыл.
Бириккен Улуттар Уюму (БУУ), Түркия жана Украина 31-октябрда украин данын экспорттоо боюнча макулдашуунун алкагында Кара деңизден 16 кеменин багытын макулдашты. Кемелер деңиздин Түркияга караштуу бөлүгүндө турат.
Reuters агенттиги кабарлагандай, бул макулдашуу Орусиянын катышуусуз кабыл алынды. Мунун алдында Москва украин портторунан азык-түлүк ташып чыгууга жол берген дан келишиминен чыгарын жарыялаган.
Украинанын Киев, Харьков, Запорожье, Кривой Рог, Марганец шаарлары соңку суткада кайрадан жапырт аткылоого кабылды. 30-октябрда жана 31-октябрдын таңында бүткүл республиканын аймагында аба айгайы (воздушная тревога) жарыяланды.
Украинанын абадан коргонуу системалары орус ракеталарынын көпчүлүгүн атып түшүрдү. Винница, Кировоград, Запорожье, Полтава облусунун аймагына атылган көпчүлүк ракеталар энергетикалык жана башка объектилерге тийди. Марганец шаарында ракета көп кабаттуу үйгө тийип, бир адам каза болду.
АКШнын президенти Жо Байден Украинанын дан экспортуна байланыштуу келишимдин Орусиянын чыгып жатышын айыптап, Бириккен Улуттар Уюмунун ортомчулугу менен түзүлгөн бул келишим ошол бойдон сакталышы керектигин билдирди.
"Орусиянын мындай кылуусуна эч кандай себеп жок. Алар ар дайым чектен чыккан аракеттерди жасоо үчүн кандайдыр бир шылтоо издеп, «ушуга мажбурлады» деп Батышты күнөөлөшөт", - деди Байден журналисттерге.