Польшада эки кишинин өлүмүнө алып келген ракетанын жарылуусуна Украинанын абадан коргонуу системасы себеп болушу мүмкүн, бирок акыр-аягында ага мыйзамсыз согушту улантып жаткан Орусия жооптуу. Мындай билдирүүнү НАТОнун баш катчысы Йенс Столтенберг 16-ноябрда Брюсселдеги маалымат жыйында жасады. Столтенберг альянстын чукул жыйынан кийин белгилегендей, алдын ала анализ ракета атайлап атылбаганын көргөздү, иликтөө уланууда.
Орусия Украинага согуш ачкандан бери атмосферага глобалдык жылуулукту тездеткен 97 миллиондон ашуун тонна зыяндуу газ бөлүнүп чыкты. Мындай санды Украинанын Жаратылыш министрлиги БУУнун климаттагы өзгөрүүлөр боюнча саммитинде (COP27) келтирди.
Арасына украиналык жана эл аралык адистер кирген докладдын авторлору ошол газдын беш булагын бөлүп атаган. Алсак, согуш тилкесинде 6 миң өрт катталган. Бул былтыркы көрсөткүчтөн 122 эсе ашат. Өрт чалган жалпы аянт 486 миң гектарга жетет.
Чехия парламентинин төмөнкү палатасы Орусиянын режимин "террордук" деп тааныган резолюцияны кабыл алды. Парламенттин сайтындагы маалыматка ылайык, шейшембиде тиешелүү документ колго салынганда аны 200 депутаттын 129у жактырды, 14ү каршы болду, 57си добуш берүүгө катышкан жок.
Резолюцияда Орусиянын Украинага басып киргени, энергетикалык инфраструктурасына сокку урганы айыпталат, кошуна өлкөнүн кээ бир аймактарын аннексиялап алуу үчүн өткөрүлгөн референдумдардын жыйынтыктары таанылбасы айтылат.
АКШ президенти Жо Байден Польшага тийген ракета Орусиядан атылган деген ыктымалдык "төмөн" деп билдирди. Дүйнө державаларынын лидерлери менен чукул жыйында Байден толук иликтөө аяктамайынча, так бир нерсе айтууга болбой турганын белгиледи.
Шаршембиге караган түнү Польшанын президенти Анжей Дуда шашылыш кайрылуу жасаганда өлкө аймагына түшкөн ракета, сыягы Орусияда жасалган деп айткан. Бирок аны ким атканын далилдеген фактылар азырынча жок экенин, иликтөө уланып жатканын кошумчалаган.