Былтыр 24-февралда Орусия Украинага басып кирип, кеңири масштабда согуш башталгандан бери Киевде биринчи жолу Евробиримдиктин бараандуу делегациясы катышкан саммит өттү. Батыш уруштун алгачкы күнүнөн тарта украин элине финансылык, аскердик жана саясий колдоосун улантууда. Москва европалыктардын Киевге көрсөтүп жаткан көмөгүн кескин сындап, украин армиясын жаңы курал-жарак менен жабдуу - жаңжалды дагы ырбатканы менен анын жүрүшүн өзгөртө албайт деп эскертүүдө.
Жума күнү Киевде Европа биримдигин Украина саммити башталарда абадан эскертүү берилип, бийлик жарандарды жакын жерлердеги баш калкалоочу жайларга барууга чакырды. Еврокомиссиянын башчысы Урсула фон дер Ляйен баштаган 15 комиссар Киевге бейшембиде келген.
“Европа биринчи күндөн тарта Украина тарапта турду. Анткени биздин континенттин келечеги азыр жазылып атканы түшүнүктүү”, – деди Еврокомиссиянын төрайымы.
"Силер өз тагдырыңар үчүн гана кармашып жаткан жериңер жок, биз аны билебиз. Бул жерде эркиндик үчүн, демократиянын авторитардык режимдерге каршы күрөшү жүрүүдө. Путин Украинаны жок кылам деп, Орусиянын келечегине тобокелге салып жатат", - деди Урсула фон дер Ляйен.
Киев европалык өнөктөштөрүнө Украинанын келечеги эркин жана бирикен Европа менен чогуу экенин такай белгилеп келет. Былтыр июнда Брюссел Киевге Евробиримдикке мүчөлүккө талапкер макамын берген.
"Орусия болгон күчүн топтоп, Украинага гана эмес, эркин Европага, эркин дүйнөгө каршы реванш алуунун аракетинде. Мындай душманды жеңүү үчүн майдандагы эрдик жетишсиз. Эркин, бейпил, бириккен Европаны биздин күчтүү институттар менен кура аларыбызга ишенели”, – деди Зеленский.
Самитте финансылык жана аскердик жардам, ошондой эле украин товарларын шаркеттин базарына чыгарууну кеңейтүү, Киевге энергетикалык каатчылыкты жабууга жардам берүү, Евробиримдиктин Орусияга каршы санкциялары, Москванын жоопкерчилигине байланыштуу маселелер кирет.
Бейшембиде Волгоград шаарында 80 жыл мурунку Сталинград салгылашуусундагы жеңишти эскерген иш-чара өттү. Ага катышкан президент Владимир Путин бул тарыхый окуядагы орус элинин каармандыгын эскерип, "Орусия Украинада жеңишке жетет" деп шыктандырды.
“Эми крест басылган немистердин "ЛЕОПАРД" танктары кайрадан бизди коркута баштады. Украин жергесинде Гитлердин жолдоочулары бандеровчулардын колу менен Орусияга каршы согушка даярданып атышат”, – деген Путин.
II Дүйнөлүк согуштун тарыхында Сталинград салгылашуусунда 1 миллиондой кишинин каны төгүлүп, Советтик кызыл армия фашисттердин мизин кайтарган.
Германия Украинага 88 даана "Леопард-1" танктарын экспорттоого уруксат берди. Бул тууралуу немис өкмөтүнүн басма сөз катчысы Штеффен Хебестрейт билдирди. Техниканын жалпы баасы 100 миллион евродон ашат. Rheinmetall өндүрүүчү компаниясынын кампасындагы танктар алдыдагы апталарда Киевге жеткирилет.
"Леопард 1" танктарын өндүрүү 1980-жылдардын ортосунда токтотулган, андан бери "Леопард 2" чыгарылат. "Леопард 1ди" дагы эле дүйнөнүн көптөгөн армиялары колдонот.
Süddeutsche Zeitung басылмасы жазгандай, эски үлгүдөгү "Леопард-1ге" ок-дарылар жетишсиз болуп калуу коркунучу бар. Украинага аскерий жардам көрсөткөн өлкөлөр бул көйгөйдү чечүүнү көздөп жатат.
Узакка созулган талкуулардан кийин январда Германия Украинага Бундесвердин запастарынан "Леопард-2" танктарын берүүгө макул болгон. Андан тышкары бул танктарды сатып алган Евробиримдиктеги өлкөлөрү кол кабыш кылмакчы. Ошентип Киев кеминде 112 даана немис танктарын алат.
Киев менен Берлин макулдашкандай, танктар дүйнөлүк коомчулук расмий тааныган украин-орус чек араларында жана Орусиянын аймагында колдонулбайт. Техника Украинанын аймагын бошотуу үчүн гана пайдаланылат. Андан тышкары, АКШ да Украинага "Абрамс" танктарынан 31ди берүүнү чечкен.
Кремль Батыштын Украинанын колдоп жатышы - "жаңжалды ырбатканы менен анын жүрүшүн өзгөртө албайт" деген турумду карманууда.
Жума күнү Киевде Евробиримдик-Украина саммити башталарда абадан эскертүү берилип, шаар бийлиги жарандарды жакын жерлердеги баш калкалоочу жайларга барууга чакырды.
Еврокомиссиянын башчысы Урсула фон дер Ляйен баштаган 15 комиссар Киевге 2-февралда келген. Жума күнкү жыйындардын күн тартибинде украин элине аскердик, финансылык жана саясий жактан колдоону көбөйтүү, Украинаны биримдикке кабыл алууга байланышкан маселелер бар.
Акыркы айлардагы орусиялык ракеталык соккулар Украинада ондогон карапайым калктын өлүмүнө себеп болуп, ызгаарда электр тармагына зыян келтирүүдө.
Москва Украинадагы жайкын тургундарды бутага алып жатканын далилдер жана көрсөтмөлөр болгонуна карабай четке кагып келатат.
Кремль Батыштын Украинанын колдоп жатышы - "жаңжалды ырбатканы менен анын жүрүшүн өзгөртө албайт" деген турумду карманууда.
Украина: Москва "Батыштын танктарын өрттөйбүз" деп коркутту
- автор Гүлайым Ашакеева
Украинанын Краматорск шаарында көп кабаттуу үй орус тараптын ракетасынан талкаланды. Калаанын борборунда бутага илинген үйдө кеминде үч киши набыт болуп, 20дан ашуун адам жараат алганы кабарланды. Киев соңку 24 саатта орус тарап алты ракета учуруп, анын төртөө шаардагы жарандык инфраструктурага тийгенин билдирди.
Краматорскинин бийлиги саат түнкү 9дан 45 мүнөт өткөндө Орусия тарап "Искандер-К" ракетасы менен атканын, бери дегенде көп кабаттуу сегиз үй зыян тартып, бирөө таптакыр кыйрап калганын билдирди. Урандынын алдында калгандарды издөө уланууда.
"Бул - шаардын борбору. Бул жерде карапайым эл жашайт, андыктан мындай аракеттерди кантип актайсың?" - деди урандыларды аралап жүргөн Донецкинин аймактык губернатору Павел Кириленко.
Өткөн айда Днепр шаарындагы көп кабаттуу үйгө орустардын ракетасы тийип, кеминде 44 киши набыт болгон. Краматорск мындан 14 ай мурун дагы кандуу чабуулга кабылып, шаардын темир жол вокзалында 57 бейкүнөө кишинин каны төгүлгөн эле.
Москва карапайым эл турган жерге сокку урганын мойнуна алган эмес.
Киев уруштун бир жылдыгын утурлай Украинанын чыгышында орус күчтөрү чалгын иштерин активдештирип, күчүн топтоп, кеңири масштабдагы чабуулга камынып жатканын жарыялады. Президент Владимир Зеленский кырдаал курч экенин белгиледи.
"Февралдан февралга чейин биз майтарылган жокпуз. Кол салуунун бир жылдыгына карай душман болгон аргасын кылууда. Мындай учурда бир муштумдай биригип, мамлекеттик кызыкчылыкты гана көздөшүбүз керек. Бул биздин колдон келет!" - деди Зеленский.
Орусия чабуулун күчөтүүгө камынып жатат деген маалда Киевдин Батыштагы өнөктөштөрү украин армиясына аскердик техникадан жана коргонууну бекемдөөгө көмөк көрсөтүүнү улантууда. Киев заманбап жабдылган танктарды ала баштады. Азырынча украин бийлиги сураган согуштук учактарды, истребителдерди берүүгө келгенде өнөктөштөр ортосунда орток пикир жок.
2-февралда Брюсселден аттанган Еврокомиссиянын башчысы Урсула фон дер Ляйен баштаган 10дон ашуун аткаминер Киевге келип түштү. Эртең бул жерде Евробиримдик-Украина саммити ачылат.
Кремль Украинага берилчү аскердик жардам "жаңжалды андан ары ырбатканы менен анын жүрүшүн өзгөртө албайт" деген позицияда.
"Атайын операциянын өтөсүнө чыгышына колунан келишинче түз же кыйыр жардам берүүгө дилгирлер бириккен. Канча танк экенине карабай, биз мурда айткандай эле, аларды өрттөшөт. Ал үчүн сый акы алышат" - деди Кремлдин өкүлү Дмитрий Песков.
Былтыр 24-февралда президент Владимир Путиндин буйругу менен орус күчтөрү Украинага басып кирген. Киев майданда 13 миңдей жоокери курман болгонун 2022-жылдын соңунда билдирген. Орусиянын Коргоо министрлиги акыркы жолу 21-сентябрда согушта 6000дей аскерин жоготконун маалымдаган. Былтыр ноябрда Пентагон орус армиясынын жоготуулары өлгөндөрдү жана жараат алгандарды кошкондо 100 миңдей деп эсептеген. Бул маалыматты көз карандысыз булактар бышыктай электигин эске салабыз.