Украинанын Запорожье шаарындагы көп кабаттуу үйгө 2-мартта тийген ракеталык чабуулдан набыт болгондордун саны 11 кишиге жетти. Бул тууралуу өлкөнүн Өзгөчө кырдаалдар кызматы кабарлады. Мерт болгондордун арасында бир бала бар. Буга чейин уранды алдында калып каза болгон бир үй-бүлөнүн сегиз айлык кызы бар экени кабарланып жаткан.
Куткаруучулар 11 адамды аман-эсен алып чыккан, учурда куткаруу, урандыларды тазалоо иштери уланып жатат.
Орусия 2-мартка караган түнү Запорожьеге ракеталык чабуул жасаганда көп кабаттуу үйлөрдүн бири жарым-жартылай талкаланган. Жергиликтүү прокуратура калаа С-300 зениттик-ракета менен аткыланганын маалымдаган. Полиция согуштун эрежелерин жана мыйзам бузууга байланыштуу иликтөө баштады.
Запорожье облусунун эки жашоочусу орусиялык күчтөрдүн аткылоосунан каза таап, бирөө жарадар болду. Бул тууралуу аймактын облустук аскер администрациясы Телеграм-каналы аркылуу кабарлады.
"Гуляйпольская грома (украиналык аталыш-ред.) кайрадан душмандын аткылоосуна кабылды. Орусиялык артиллерия огунан эки жай тургун каза болду. Баскынчы үч ракетаны Новониколаев аймагына таштады. Анын бири айыл чарбага караштуу объектти талкалады", - деп айтылат билдирүүдө.
Херсон облусундагы Антоновка аймагында украиналык полициянын ыкчам-тергөө тобу орусиялык күчтөрдүн аткылоосуна кабылды. Алар отурган машинеге граната ыргытылган. Төрт полиция кызматкери жабыр тартып, ооруканага жеткирилген.
Бул тууралуу РБК-Украина Херсон облусунун полициясына таянып билдирди.
3-мартта орусиялык армиянын аткылоосунан Херсондо эки киши каза болгонун аймактын облустук аскер администрациясынан кабарлашкан.
"Орусиялык баскынчылар облустун аймагын 69 жолу аткылашты. Херсондун жай тургундар жашаган аймагына 460 жолу миномет, снаряд, РСЗО, артиллерия, танк жана учкучсуз учактардан аткылоо болду", деп айтылат маалыматта.
"Херсондун өзү төрт жолу аткылоого кабылды. Шаарда көп кабаттуу үйлөр жана коммуналдык кызматтар жабыркады", - деп билдирди облустук администрация.
Орусиянын коргоо министри Сергей Шойгу согуш жүрүп жаткан аймакка барып, Түштүк-Донецк багытындагы "Чыгыш" деп аталган аскер бөлүктөн кабар алды. Бул тууралуу аталган министрлик кабарлады. Анда Шойгу аскер бөлүктүн командири, генерал-лейтенант Рустан Мурадов баштаган жетекчилердин баяндамасын укканы, эрдик көрсөткөн жоокерлерге сыйлыктарды ыйгарганы жазылган.
Министрликтин Телеграм-каналына жарыяланган видеодон учакты, имарататтар, үйлөр талкалаган конуштун жанындагы аскер башчыларынын жыйынын көрүүгө болот. Анда видео качан, кайсы жерде тартылганы такталган эмес.
