11-майга караган түнү Орусиянын Курск, Брянск жана Белгород облустарына дрон менен чабуул жасалганы кабарланды. Курск облусунун башчысы Роман Старовойт Телеграм-каналына анда Теткино айылындагы электрподстанция жабыркаганын, жарык берүү жарым-жартылай үзгүлтүккө учураганын жазды.
Брянск облусунун башчысы Александр Богомаз орус-украин чек арасынан 60 чакырым алыс Страродуб шаарындагы административдик имарат бутага алынганын айтты. Бирок кайсы имарат экенин тактаган жок. Baza Телеграм-каналы ал аскер комиссариаты жайгашкан жай экенин жазды.
Белгород облусунун жетекчиси Вячеслав Гладков 10-майда кечинде аймакта үч дрон жарылганын билдирди. Ал Телеграм-каналына алдын ала маалыматтарга караганда жараат алгандар жоктугун, эки жер там жана бир машина жабыркаганын жазды.
Согуш маалында бул маалыматтарды башка булактардан ырастоо мүмкүн эмес. Киев соңку дрон менен чабуулдарга байланыштуу комментарий бере элек.
Франциянын улуттук жыйынынын депутаттары "Вагнер" менчик аскердик компаниясын Европадагы террордук уюмдардын тизмесине киргизүү резолюциясына 9-майда добуш беришти.
Бул резолюция милдеттүү эмес, символикалык макамга ээ. Анын автору, бийликчил фракциянын өкүлү Бенжамин Хаддад бул резолюция Евробиримдикке мүчө 27 мамлекетти аталган уюмду террордук тизмеге кошоруна шыктандарырат деген үмүттө.
"Вагнерчилер кайда болбосун туруксуздук, зордук-зомбулук жайылтып жүрүшөт. Алар адамдарды өлтүрүп, кыйнап, тоноп, коркутуп, ошону менен бирге эч жазасыз калууда",- деди ал.
Украинанын президенти Владимир Зеленский француз парламентинин резолюциясын кубаттады.
Буга чейин Литванын сейми "Вагнерди" террордук уюмдардын катарына киргизген биринчи европалык парламент болуп калган.
Ушул жылдын апрель айында Евробиримдик "Вагнер" менчик кампаниясын санкциялык тизмеге кошкон. Ал эми жыл башында АКШ аны трансулуттук кылмыштуу уюм катары тааныган.
Орусиялык күчтөр Бахмут-Авдеевка-Марьинка согуш тилкесиндеги украиналык аскерлердин турумдарына 46 жолу ракеталык сокку урду. Бул тууралуу Украинанын куралдуу күчтөрүнүн башкы штабы 10-майдагы күнүмдүк баяндамасында маалымдады.
«Вагнер» менчик компаниясынын башчысы Евгений Пригожин анын жалданма жоочулары Бахмутта алдыга жылып баратканын билдирди. 9-майда ал Орусиянын Коргоо министрлигин жетиштүү курал-жарак менен камсыздабай жатканы үчүн дагы айыптады.
Ал ок-дарынын жетишсиздигинен Бахмутту толук өз карамагына алууга мүмкүн болбой жатканын кошумчалады.
Пригожин, «Вагнер» менчик компаниясы Батыштын санкциялык тизмесине киргизилген. АКШнын Финансы министрлиги 26-январда «вагнерчилерди» трансулуттук кылмыш уюмунун мүчөлөрү деп мүнөздөгөн.