2022-жылы Евробиримдиктин курамындагы мамлекеттерден Армения, Казакстан жана Кыргызстанга жөнөтүлгөн, жалпы баасы бир миллиард доллардан ашкан товарлар "Орусиядан транзит аркылуу өтүп жатканда жоголуп кеткен". Бул тууралуу Financial Times басылмасы жазды.
Маалыматтарга караганда, Орусия Украинага согуш ачканы Евробиримдиктен Орусияга транзит деген шылтоо менен эки миллиард долларлык товар кирген. Алардын арасында санкцияга кирген буюм-тайымдар, анын ичинде аскердик өндүрүштө колдонула турган учактардын компоненттери, оптикалык буюм-тайымдар, газ түтүктөрү бар. Бул товарлардын айрымдары андан ары Армения, Казакстан жана Кыргызстандагы компанияларга жөнөтүлмөк.
"Эмнеге бул мамлекеттерге дал ушул маалда бул товарлар керек болуп калды? Аймакта бул товарлар азыр кимге керек? Албетте, Орусияга", - деп билдирген аталган басылмага Эстониянын санкциялар боюнча министри Эрки Кодар.
Ошол эле маалда Орусия менен чектешкен, санкцияларды колдобогон мамлекеттерде дагы айрым товарлардын импорту кескин жогорулаган. Бул товарлар андан ары Орусияга жөнөтүлөрү кабарланган.
Евробиримдик Орусиянын санкцияларды айланып өтүүсүнө каршы күрөшөрүн билдирип келет.
Учурда шаркеттин лидерлери Орусияга каршы санкциялардын 11-айлампасын талкуулап жатышат. Бул жолу Москвага санкцияларды айланып өтүүгө көмөктөшкөн үчүнчү мамлекеттерге да чаралар көрүлүшү мүмкүн. Ага Борбор Азиядагы айрым мамлекеттер дагы кириши ыктымал экени кабарланууда.
Британия Украинага узак аралыктагы Storm Shadow канаттуу ракеталарын жөнөттү. Бул тууралуу Британиянын коргоо министри Бен Уоллес 11-майда парламент депутаттарынын суроолоруна жооп берип жатып айтты. Ал канча ракета жиберилерин тактаган жок.
«Storm Shadow ракеталары Киевге Украинанын суверендүү аймагына кирип алган орусиялык күчтөрдү сүрүп чыгарууга жардам берет», - деди Уоллес.
Украиналык генерал Александр Сырский билдиргендей, орусиялык күчтөр Бахмуттун айрым райондорунда эки чакырымга артка чегинди.
Генерал украин армиясынын натыйжалуу коргонуу операциялары "Вагнердин" жалданма аскерлерин жок кылган соң, алардын ордуна даярдыксыз күчтөр келгенин кошумчалады. Ал күчтөр украин армиясына туруштук бере албай, артка чегинүүгө аргасыз болушкан. Орусиялык эки рота толугу менен жок кылынганы маалымдалды.
Ал эми Орусия буга чейин аталган шаарда алдыга жылганын билдирген. Эки тараптын тең билдирүүлөрүн көз карандысыз ырастоо мүмкүн эмес.
10-майдын кечинде Кремлдин маалымат катчысы Дмитрий Песков Орусиянын Укрианага каршы "аскердик операциясы" абдан оор болуп жатканын, бирок айрым максаттар ишке ашканын билдирди.
Ал эми Украинанын президенти Владимир Зеленский 10-майдын кечинде жасаган кайрылуусунда өлкөсү толук куткарылмайынча, артка кайтпоого убада берди.