Кахов ГЭСиндеги жардыруу: суу каптаган конуштар
АКШ президентинин администрациясы Кахов ГЭСиндеги жардырууга ким жооптуу экенин так айта албайт. Мурдараак Кошмо Штаттардын эки расмий өкүлү жана Батыштын бир расмий булагы NBC News телеканалына гидроэлектр станцияга жасалган чабуулга Орусиянын ыктымал катышы тууралуу маалымат бар экенин айтышкан.
АКШнын Атайын кызматы айрым чалгын маалыматтарын ачыкка чыгаруунун үстүндө иштеп жатышат.
Ак үйдүн өкүлү Жон Кирби журналисттердин дамбанын кыйрашынын Украинанын контрчабуулуна тийгизген таасири тууралуу суроосуна жооп берип, кандайдыр бир божомол айтуу “эрте” деп билдирди. Ошол эле учурда ал апаат Украинанын энергетикалык коопсуздугуна олуттуу таасирин тийгизиши мүмкүн деп божомолдоду.
Кирби негизги көңүл суу ташкындан жабыркаган украиналыктарга, айыл, шаарларга буруларын, аларга жардам берилип жатканын белгиледи.
Кахов ГЭСиндеги дамба жардырылгандан кийинки алкачкы сааттарда бери дегенде 16 миңдей киши өз үйлөрүн таштап кетүүгө аргасыз болушкан. Мындай маалыматты шейшемби күнү БУУнун баш катчысы Антониу Гутерриш билдирди.
Дамба жарылганы тууралуу маалыматтан кийин буудай жана жүгөрүнүн баасы көтөрүлүп, бул дүйнөлүк айыл чарба соодасына зыян келтирет деген кооптонууну жаратты.
Украинанын расмийлери Херсон облусундагы Кахов ГЭСинин дамбасындагы жардыруудан улам он миңдеген адам коопсуз аймактарга көчүрүлгөнүн кабарлады. Днепр дарыясындагы дамбанын жардырылышына Киев менен Москва бири-бирин айыптап жатат.
Херсон облусунун губернатору Александр Прокудин 7-июндун таңында билдиргендей, дарыянын төмөн жагында суунун деңгээли дагы көтөрүлөрү күтүлүүдө.
"Биздин божомолубузда, жакынкы 20 сааттын ичинде суунун деңгээли дагы бир метрге көтөрүлөт",-деди Прокудин видеокайрылууда.
Ал Днепрдын оң тарабындагы Украина көзөмөлдөгөн аймактарда эки миңдей турак-жай суу алдында калганын кошумчалады.
Херсон облусунун Москва көзөмөлдөгөн бөлүгүндө орус бийлиги 7-июнда өзгөчө кырдаал абалын жарыялады. Бул тууралуу ТАСС маалымат агенттиги жазды.
Украинанын Херсон облусундагы Кахов ГЭСинин дамбасындагы жардыруудан кийин Новокахов шаарындагы жергиликтүү зоопарктагы жүздөгөн жаныбарлар сууга чөктү. Мекеменин директору Елена Навроцкая кызматкерлер эртең мененки саат 6да келген учурда зоопаркты суу каптап, "жаныбарлардын тарпы калкып жүргөнүн" билдирген.
Анын айтымында, 300дөй жаныбар, анын ичинде маймыл, павлин, енот, суур, тоту куш, фазан, пони сыяктуу жаныбарлар жана канаттуулар суу алдында калган. Учурда зоопарк жайгашкан "Казкова дiброва" эс алуу комплексин толугу менен суу басты.
Мекеме бул жайга жакын жерлер орусиялык аскерлер тарабынан миналангандыктан жаныбарларды сактап калууга мүмкүн болбогонун Фейсбук баракчасына жазды.
"Биз жарыксыз, жылуулугу жок, дайыма аткылоонун астында өтө оор кышты башыбыздан өткөрдүк. Ушундай коркунучтуу учурда дагы жаныбарлардын өмүрүн сактап калууга бүт аракетибизди жасадык. Бул абдан чоң кайгы жана жоготуу. Биз үчүн кайгырып жаткандарга ыракмат. Бирок бизге азыр жардамдын кереги жок болуп калды", - деди зоопарктын администрациясы.
Кахов ГЭСинин дамбасы 6-июнга караган түнү жардырылган. Днепр дарыясындагы ири дамбаны жардырганы үчүн Киев Москваны айыптаган. Кремль Кахов ГЭСиндеги жардырууга тиешеси жок экенин билдирген. Орус президентинин маалымат катчысы Дмитрий Песков Кахов ГЭСинин жардырылышын атайылап жасалган диверсия деп атаган.