Украинанын президенти Владимир Зеленский АКШ жана Европа Биримдиги аны Орусия менен сүйлөшүүгө барууга көндүрүп жатканы тууралуу маалыматтарды четке какты.
Ал 4-ноябрда Киевде Еврокомиссиянын төрайымы Урсула фон дэр Ляйен менен чогуу өткөргөн басма сөз жыйынында “азыр Орусия менен отуруп алып сүйлөшүү, ага кайсы бир нерселерди берүү деген болбойт”,-деп айтты.
Еврокомиссиянын төрайымы өз кезегинде Украинага жардам иретинде дагы 50 миллиард доллар бөлүү маселеси чечилип жатканын билдирди. Ал жетектеген уюм келерки аптада Орусияга каршы санкциялардын жаңы топтомун жарыяларын айтты.
Мунун алдында NBC News телеканалы Кошмо Штаттарындагы азыркы жана мурдагы эки таасирлүү аткаминерге шилтеме кылып АКШнын жана Европа Биримдигинин өкүлдөрү Украинанын Орусия менен тынчтык сүйлөшүүлөрү тууралуу талкууларды баштаганын жазган.
Ага ылайык, "айрым бир аялуу талкуулар" өткөн айда 50дөн ашык өлкө кирген Украинаны коргоо боюнча байланыш тобунун жолугушуусунда талкууланган.
Аталган телеканалдын булактары тынчтык мунасасына жетүү үчүн Киев эмнеден баш тарта алышы мүмкүн деген жагдайда сөз болгон. Ошол эле маалда НАТОго мүчө мамлекеттер Орусияын агрессиясын чектөө максатында Украинага "коопсуздуктун кайсы бир кепилдиктерин" сунуштоого даяр экенин билдирген.
NBC News каналынын билдиришинче, мындай талкуулар Вашингтон менен Брюсселдин согуш каатчылыкка кептелип, Киевге мындан ары керектүү жардам берилбей калат деген кооптонуулардан улам башталган.
Тынчтык сүйлөшүүлөрү тууралуу соңку маалыматтарга Кремл комментарий бере элек.
Ишемби күнү, 4-ноябрда кечинде Украинанын армиясы Керч кысыгындагы кеме курган “Залив” заводун ракеталар менен аткылады. Орусиянын Коргоо министрлиги анда бир кеме жабыркаганын ырастады.
Крымдын Москва дайындаган башчысы Сергей Аксеновдун билдиришинче, Керч районунда бир нече ракета атып түшүрүлдү, айрым сыныктар ошол заводдун аймагына кулады, бирок жабыркагандар болбогон жок.
Муну менен катар социалдык тармактарда заводду көздөй учурулган ракеталар жана тутанган өрт тартылган видеолор тарады.
Орусиянын Коргоо министрлиги заводду көздөй 15 ракета учурулганын, анын 13ү атып түшүрүлгөнүн маалымдады. Айрым украиналык булактарга караганда, ракеталардын саны мындан алда канча аз болгон.
Украинанын Абадан коргоо күчтөрүнүн кол башчысы Николай Олещук “Залив” заводуна тактикалык авиация аркылуу чабуул жасалганын айтты. Анын ырасташынча, ошол маалда “Калибр” үлгүсүндөгү ракеталарды алып жүргөн Орусиянын Кара деңиз флотунун заманбап кемеси болгон.
Орусия кандай кеме жабыркаганы тууралуу маалымат бере элек.
“Залив” Чыгыш Европадагы эң ири кеме куруучу завод болуп саналат. Бул жайда 2020-жылдан тартып Орусиянын Аскер-деңиз флоту үчүн кеме куруу иштери жүргүзүлөт.
Еврокомиссиянын төрайымы Урсула фон дер Ляйен 4-ноябрда Киевге келди. Ал бул сапарынын алкагында Жогорку Радада сөз сүйлөп, билдирүү жасайт. Аны темир жол вокзалынан Украинанын президенти Владимир Зеленский тосуп алды.
Аталган уюмдун башчысы сапарынын алдында Зеленский менен Украинаны Европа Биримдигине кабыл алуу, Киевди колдоо жана Орусияга каршы санкциялар маселесин талкууларын айткан.
Буга чейин ал Еврокомиссия камакка алынган орусиялык активдерди Украинаны кайра калыбына келтирүү иштерине жумшоонун үстүндө иштеп жатканын билдирген.
Урсула фон дер Ляйен камакка алынган орусиялык активдердин жалпы баасы 211 миллиард еврого жетерин маалымдаган.
Мындан туура бир жыл мурда Бириккен Улуттар Уюмунун Башкы Ассамблеясы Орусия Украинага репарация төлөшү керек деген резолюция кабыл алган. Аткарылышы милдеттүү эмес документти 193 мүчөнүн 94ү колдогон жана каршы добуш берген 14 өлкөнүн арасында Беларус, Куба, Иран, Зимбабве бар. 73 мамлекет, анын ичинде Кыргызстандын өкүлү калыс позицияны карманган.
Муну менен Башкы ассамблея Орусия Украинага согуш ачуу менен эл аралык мыйзамды бузду жана “укуктук кесепеттерди тартып, чыгымдын ордун толтурууга тийиш” деп тапкан. Документте зыяндын өлчөмүн жана кенемтени санап чыгуу үчүн атайын эл аралык механизм түзүү сунушу жазылган. Орусиянын БУУдагы өкүлү бул чечимди сынга алган.
Башкы ассамблеянын резолюциялары Коопсуздук кеңешинен айырмаланып, саясий гана мүнөзгө ээ. Коопсуздук кеңешинин туруктуу мүчөсү катары Орусия ал жакта өзүнө каршы документтерди өткөрбөй келет.