НАТОнун баш катчысы Йенс Столтенберг 27-ноябрда билдиргендей, Киев Москва басып алган аймактардын көбүн азырынча кайтара элек, бирок украин армиясы мурдагыдай эле орус күчтөрүн “чоң жоготууларга” учуратууда.
“Албетте, биз алар аймактарын тезирээк бошотуп алышын каалайт элек. Фронттун тилкеси ордунан жылбаса дагы, украиндер орус оккупанттарын чоң жоготууларга учуратууда”,- деди Столтенберг НАТОго мүчө мамлекеттердин тышкы иштер министрлеринин жыйынында. Ал ошондой эле альянс Украинаны узак мөөнөттө колдоону уланта берерин кошумчалады.
Британ чалгын кызматы украин Куралдуу күчтөрүнүн Башкы штабына таянып билдиргендей, быйыл ноябрь айында орус армиясы бир күндө 931 аскеринен айрылган.
Бул согуш башталгандан берки эң чоң көрсөткүч экени белгиленет. Бул санды башка булактардан бышыктоо мүмкүн эмес.
Соңку айда өлкө чыгышындагы Авдеевканын айланасындагы кармашта орус күчтөрү оор жоготууларга учураганын бир канча булак жазып чыккан.
Украинанын Куралдуу күчтөрүнүн Башкы штабы 27-ноябрдын таңында билдиргендей, Авдеевканын айланасында айыгышкан кармаш жүрүп жатат. Соңку бир суткада украин армиясы орус күчтөрүнүн 30 жолку чабуулунун мизин кайтарган.
“Жоокерлер оккупанттарды чоң жоготууга учуратуу менен татыктуу коргонуп турушат”,-деп жазылат Башкы штабдын билдирүүсүндө.
Буга чейин бир катар орусиялык Телеграм-каналдар жана блогерлер орус армиясы Авдеевкадагы өндүрүш аймагын толугу менен өз көзөмөлүнө алганын жазып, аны “тарыхый” окуя катары мүнөздөшкөн. Баш кеңсеси Вашингтондо жайгашкан Согушту иликтөө институту, орус армиясы Авдеевка менен Ясиноватая айылынын ортосундагы өндүрүш аймагында алдыга жылганын билдирип, толук көзөмөлгө алганы тууралуу маалыматтын далили жок экенин кошумчалады.
Маалыматты Орусиянын Коргоо министрлиги дагы бышыктай элек.
Украин күчтөрү калааны орус армиясынын курчап алышына жол бербөө аракетин көрүп жатат. Авдеевкага чабуулду орус күчтөрү 10-октябрда баштап, алгачкы күндөрү чоң жоготууларга учурганы маалым болгон. Баш кеңсеси Вашингтондо жайгашкан Согушту иликтөө институту орус армиясы жүздөн ашуун аскеринен жана жүздөн көп брондолгон техникасынан ажыраганын кабарлады.
Орусиянын көзөмөлүндөгү украиндердин Донецк шаарынан анча алыс эмес жерде жайгашкан Авдеевкада согушка чейин 30 миң киши жашаса, учурда алардын 1,5 миңдейи гана калган.
Орусиянын армиясы 27-ноябрга караган түнү Украинанын түштүгүндөгү Херсон жана Днепропетровск облустарын бутага алды. Соңку 24 сааттын ичинде орус армиясы Херсонду 56 жолу аткылап, бир карапайым тургун жараат алганын аймак башчысы Александр Прокудин Телеграм аркылуу билдирди.
Днепропетровск облусундагы Никополь шаары жана анын айлана-тегереги дагы жапырт аткылоого кабылганын аймактын губернатору Сергей Лысак кабарлады.
Херсон шаары былтыр күзүндө бошотулгандан бери Днепр дарыясынын сол жээгиндеги орус армиясынын аткылоосуна дээрлик күн сайын дуушар болуп келет.
23-ноябрда орус армиясы Чернобаевка айылын кассеталык снаряддар менен аткылап, кеминде үч жай тургун набыт болгон. Бир нече адам жараат алган. Ички иштер министри Игорь Клименко билдиргендей, Чернобаевкадагы аткылоодон 60тан ашуун турак жай жабыркаган.
25-ноябрга караган түнү Орусиянын Киевди аткылоосунан беш адам жараат алды, бирөө 11 жаштагы бала.
Бул тууралуу Киевдин мэри Виталий Кличко Телеграм-каналына жазды.
Мэрдин маалыматында, абадан чабуул тууралуу эскертүү алты саатка созулду. Бул аралыкта орусиялык дрондордун аткылоосунан Соломен районунда бала бакча өрттөнүп, үйлөрдүн айнектери күбүлүп түшкөн. Беш кабаттуу үйдө камалып калган эки аялды куткаруучулар чыгарган. Дрондун сыныгы ачык жерге кулап, өрт чыккан.
Ушундай эле дрон сыныктары Печора, Подольск райондорунда ачык жерге, ал эми Днепропетровск жана Голосеев райондорунда көп кабаттуу үйгө түшкөн.
Учурда куткаруу иштери жүрүп жатат.
Днепропетровск районунда беш киши жабыркаган.
Украин аскерлери 25-ноябрга караган түнү Орусиянын дрон чабуулу өзгөчө катуу болгонун белгилешти. 75 дрондун 71и атып түшүрүлдү.
60 чакты дрон Киевге багытталган. Шаар тургундары жана маалымат каражаттары да чабуул алты саатка созулганын маалымдашты. Чабуулдун натыйжасында шаардагы 77 көп кабаттуу үй жана 120 мекеме электр жарыгы жок калган.
Украин президенти Владимир Зеленский чабуул Голодомордун 90 жылдыгына туш келгенин белгиледи.
Киевге расмий сапар менен келген Латвиянын президенти Эдгар Ринкевичс бомбадан коргонуучу жайда түнөгөнүн, сүрөт таңкы саат 5те тартылганын Х социалдык тармагындагы баракчасына жазды.
Орусия Киевге чабуулун комментарийлеген жок.
Аскердик талдоочулар акыркы сутканы эске албаганда Орусия акыркы бир нече айдан бери Украинага ракета менен жапырт чабуул койбогонун, аны масштабы чоң чабуулга даярдап жатканын айтышууда.