Финляндия Украинага дагы 106 миллион евролук аскердик жардамын жөнөткөнү жатат. Бул тууралуу 21-декабрда өлкөнүн Коргоо министрлиги билдирди.
"Финляндия Украинага кыска мөөнөттүү дагы, узак мөөнөттүү дагы жардамын уланта берет. Бүгүнкү күнгө карата биз буга чейин берген аскердик курал-жарактын жалпы баасы 1,6 миллиард еврону түздү", – деди өлкөнүн коргоо министри Антти Хаккянен.
Жардамдын жаңы пакетинде эмнелер бар экени жана ал качан, кайсы жол менен жеткирилери тууралуу маалымат коопсуздук маселесинен улам ачык айтылбай турганы кабарланды.
Ал эми өлкөнүн Борбордук банкынын төрагасы Олли Рен Европа Биримдиги Украинага экономикалык жардам боюнча чечимге каршы чыккан Венгриянын ветосун айланып өтсө болорун билдирди. Анын айтымында, Евробиримдик Киевге убада кылган 80 миллиард еврону өзүнүн турукташтыруу фондунан жөнөтө алат.
"Мени Европанын ички чачыранды абалы жана Венгриянын ветосу кооптондурууда. Күтүп отура берген туура эмес. Евробиримдиктин калган 26 өлкөсү тез арада макулдашып, Венгриянын каршылыгын эске алуу менен «Б» планын даярдашыбыз керек. Эгер ал бул маселеде өзүнчө жолго түшкүсү келип жатса, анын макулдугун күтүү кажети жок", — деди Рен.
Өткөн аптада Евробиримдиктин саммитинде Украинаны жана Молдованы бул уюмга кирүү боюнча сүйлөшүүлөргө расмий түрдө чакыруу чечими кабыл алынган, бирок Украинага экономикалык жардам катары алдыдагы төрт жылга 50 миллиард евро бөлүү тууралуу келишимди беките албай калган. Буга Венгриянын премьер-министри Виктор Орбандын каршы добушу себеп болгон.
22-декабрга караган түндө Украинанын бир катар аймактарында аба чабуулунан коргонууга чакырган сиреналар жаңырды.
Киевдин Соломен районунда атып түшүрүлгөн дрондун сыныктары эл жашаган үйгө тийди. Кеминде эки адам жараат алганы, бир адам ооруканага жеткирилгени кабарланды. Маалыматты шаар мэри Виталий Кличко ырастаганын жергиликтүү басылмалар жазды.
Дрон сыныгы тийген үйдүн үстүңкү кабатында өрт чыгып, куткаруучулар өрттү өчүрүштү.
Көп өтпөй дрондун калдыктары Дарницкий, Голосеев райондорунда жер үйлөргө да тийгени айтылды.
Куткаруучулар кийинчерээк журналисттерге дрон сыныгы тийген көп кабаттуу үйдө үч батирдин дубалдары бузулганын көрсөткөн.
Украина 2022-жылдын февраль айынан бери Орусиянын толук масштабдуу кол салуусуна каршы күрөшүн улантып келет.
19-декабрдагы маалымат жыйынында украин президенти Владимир Зеленский Украина Европадагы өнөктөштөрү менен "өзгөчө байланыш" түзө алганын, алар каржылык жана аскердик колдоосун улантып жатышканын айткан.
Украин аскерлерине, өнөктөштөргө ыраазычылыгын билдирип, өлкөнүн экономикасы Батыштын жардамы менен туруктуулугун кармап турганын белгилеген. Аскердик мобилизация тууралуу суроого жооп берип жатып Зеленский бул өтө кылдат тема экенин айтты жана азыр согуш талаасында кармашып жаткан аскерлерге эс алууга мүмкүнчүлүк берүү керектигин кошумчалаган.
Саясий оппозиция толугу менен иш жүзүндө жок кылынып, Орусия жетилген авторитаризм деп аталган бийликтин чеңгелинде тургандыктан, өлкө март айындагы эч кандай атаандаштыгы жок президенттик шайлоого даярданууда. Владимир Путин анчалык ысы-чуусу жок эле дагы алты жылдык мөөнөткө ат салышып жатат.
Орусиянын президенти Владимир Путин Коргоо министрлигине быйылкы жылдын армияга күзгү чакыруу өнөктүгүн аскерге милдеттүүлөрдүн бирдиктүү реестри аркылуу жүргүзүү жана аскердик каттоого өзү барбаса деле тургузуу, чакыруу кагаздарынын электрондук түрүн иштеп чыгуу тапшырмасын берди. Бул тууралуу маалымат Кремлдин расмий сайтына жарыяланды.
Бирдиктүү реестр жана электрондук чакыруу кагаздары боюнча жооптуу деп коргоо министри Сергей Шойгу жана Санарип өнүктүрүү министри Максут Шадаев дайындалышты.
Тапшырманын аткарылышы боюнча маалыматын алар 15-январга, бирдиктүү реестр боюнча отчетун 1-ноябрга чейин берүүгө милдеттүү.
Быйыл 11-апрелде Мамлекеттик Дума Орусияда аскердик кызматка чакырууну жөнгө салуучу мыйзамга өзгөртүү киргизип, аскердик каттоонун бирдиктүү реестрин түзүү чечими кабыл алынган.
Бирдиктүү электрондук реестрде аскерге чакырылып жаткан адамдын жеке маалыматы, жашаган жери, аскердик-катоо кесиби тууралуу кабар камтылат.
Электрондук чакыруу кагазы жарандын «Мамлекеттик кызматтар» порталындагы виртуалдык жеке кабинетине жөнөтүлүп турат. Мындай чакыруу жөнөтүлгөндөн тартып ал адам аскер комиссариатына барганга чейин Орусиянын аймагынан чыгууга тыюу салынат.
Жаңы талап аскерге чакырылуучу курактагы орусиялыктар арасында кооптонуу жаратууда.
Чакыруу документи электрондук реестрде пайда болгондон же “Мамлекеттик кызматтар” порталына жөнөтүлгөндөн тартып ал окулдубу, жокпу, расмий түрдө жеткирилди жана тапшырылды деп эсептелет. Аскердик комиссариатка барбай калгандар үчүн административдик жоопкерчилик ошол учурдан тартып карала башталат.
Кыргызстандын жүз миңдеген жараны Орусияда мигрант болуп жүрөт. Мигранттарды Украинадагы согушка жөнөтүүнүн амалын табыш үчүн орус бийлиги түрдүү рейддерди уюштуруп, мыйзамдарын өзгөртүүдө.