Украина өкмөтү өлкөдө мобилизациянын жаңы эрежелерин сунуштап жатат. 2024-жылы Куралдуу күчтөрдүн катарына 400–500 миң адам чакырылышы күтүлүүдө.
1-январдан тартып Норвегиядагы курал чыгаруучулар аны Украинага түз сатууга укук алышты. Негизи Норвегиянын мыйзамдары согушуп жаткан өлкөлөргө курал-жаракты түз сатууга уруксат бербейт. Бирок бул жолу Украинага түз сатууга уруксат берилди.
Норвегиянын тышкы иштер министри Эспен Барт Эйде белгилегендей, Украинаны колдоо өлкөнүн гана эмес, жалпы Европа чөлкөмүнүн коопсуздугу үчүн маанилүү.
"Биз бул мыйзамсыз согуш узакка созуларын эске алышыбыз керек", – деди ал.
Норвегиядагы курал-жарак өндүргөн ишкерлердин согуш жүрүп жаткан өлкөлөргө куралды түз сатууга тыюу салган мыйзамдары Украинадан башка өлкөлөр үчүн күчүндө кала берерин норвегия өкмөтү маалымдады.
Норвегия Евробиримдиктин мүчөсү эмес, бирок Европа экономикалык аймагына карайт. НАТОго мүчө.
Орусия Украинага кол салгандан тартып, расмий Осло Москваны айыптап, Украинага финансылык жана аскердик жардам көрсөтүүгө кошулган. Норвегия Украинаны курал менен жабдып, аскерлерин машыктырып келет.
2023-жылы Норвегия Украинага жардам катары 11 млрд крондой (1 миллиард доллардан ашуун) акча берди. Мындан тышкары гуманитардык жардамдар да берилген.
1-январда Украинанын аймактарында бир нече жолу аба чабуулунан коргонууга чакырган сиреналар жаңырды.
Борбор калаага жана башка аймактарга "Шахед" дрону менен чабуул жасалганы кабарланды. Киевдин мэриясы абадан коргонуучу жабдуулар иштеп, жабыркагандар болбогонун маалымдады.
Сумы облусунда орусиялык учкучсуз учак эки кабат үйгө тийип, эки адам - 52 жаштагы аял менен 40 жаштагы эркеке киши мерт болгон. Дагы үч киши уранды алдынан куткарылды. Куткаруу иштери уланууда.
Украин аскерлеринин маалымдашынча, 1-январда өлкө аймагына 10 учкучсуз учак кое берилип, анын тогузу атып түшүрүлгөн.
Орусия Украинанын тылын дээрлик күн сайын "Шахед" дрондору менен аткылап келет. 1-январга караган түндө 90 дрон чабуул койгон, 87си атып түшүрүлгөн.
Одессада дрондун сыныгынан 15 жаштагы бала мерт кетип, дагы үч киши ооруканага жеткирилгенин облусутун аскердик администрация башчысы Олег Кипер билдирди. Чабуулдан кеминде үч көп кабаттуу үй жабыркаган.
Львов облусунда дрон чабуулунан полководец Роман Шухевичтин мемориалдык музейи күйүп кетти.
1-январга караган түнү Орусиянын армиясы Украинага дрондор менен чабуулун улантты. Одессада абадан атып түшүрүлгөн аппараттын сыныктары карапайым тургундардын үйүнө тийген. Бул тууралуу Одесса облусунун аскердик администрациясынын башчысы Олег Кипер Телеграм-каналы аркылуу билдирди. Анын жазганына караганда, шаардын бир нече бөлүгүндө өрт тутанды. Кеминде тогуз киши жабыркап, бир тургундун өмүрү кыйылды.
Днепрде дагы жардыруулар болгонун жергиликтүү басылмалар жазды. Николаев облустук аскердик администрациянын жетекчиси Виталий Ким Телеграмга дрон менен чабуулдар болгонун жазды.
Ал арада Донецк облусунун Орусия аннексиялап алган аймагынын “жетекчиси” Денис Пушилин украин тарап 1-январга караган түнү артиллериядан аткылаганын билдирди. Анын айтымында, төрт киши набыт болуп, ондон ашууну жараат алды.
Расмий Киев бул боюнча комментарий бере элек. Согуш маалында тараптардын билдирүүлөрүн көз карандысыз булактардан ырастоо мүмкүн эмес.