Украин президенти Владимир Зеленский 3-январда борбор калаа Киевде өнөктөш Батыш өлкөлөрүнүн өкүлдөрү менен коопсуздук маселеси боюнча сүйлөшүү өткөргөнү жаткан чакта Орусия аба чабуулдарын улантты. Соңку маалымат боюнча, ишембиге караган түнү орус аскерлери Украинанын аймагына кеминде 95 согуштук дрон учурушту.
Украинанын Куралдуу күчтөрү билдиргендей, жалпысынан 80 учкучсуз учакты атып түшүрүү мүмкүн болду.
Ал эми жума күнкү соккудан өлкөнүн түндүк-чыгышындагы Харьков шаарында жараат алгандардын саны 31ге жетти, эки киши каза болду. Өлгөндөрдүн бири үч жашар наристе экени, аны уранды астынан алып чыгышканы маалымдалды.
Киевдеги жолугушууга Европа Биримдигине жана НАТОго мүчө 15 өлкөнүн өкүлдөрү катышат. Видео байланыш аркылуу АКШнын делегациясы да катышары кабарланды.
АКШ президенти Дональд Трамп Украинада тынчтык орнотуу боюнча сүйлөшүүлөрдө байкаларлык прогресс бар экенин, бирок Вашингтон сунуштаган, 20 пункттан турган планга Украина да, Орусия да макул болушу үчүн "өтө татаал жана курч бир-эки маселе бар болуп жатканын" жакында айткан. Бул маселелер Украинанын чыгыш тилкесиндеги аймактардын тагдырына жана азыркы тапта Орусиянын карамагында турган Запорожье атомдук станциясынын келечегине байланыштуу.
Зеленскийдин европалык лидерлер менен кийинки жолугушуусу 6-январга пландалууда.
Ал тапта Украинанын өзүндө жогорку бийлик өкүлдөрү арасында кадрдык жаңы дайындоолор жүрдү.
2-январда Зеленский буга чейин аскердик чалгын мекемесин башкарып келген Кирилл Будановду өзүнүн башкы жардамчысы - президенттик администрациянын башчысы кылып дайындады. Орусиянын Украинага каршы колдонуп жаткан аскердик мүмкүнчүлүгүн алсыратууга багытталган бир катар операцияларды ийгиликтүү ишке ашырганы айтылып жүргөн Буданов ноябрда жемкорлук боюнча иликтөөгө байланыштуу кызматын тапшырып кеткен Андрей Ермактын ордуна келди.
АКШ президенти Дональд Трамп Украинадагы согушту токтотууга багытталган тынчтык сүйлөшүүлөрү “туура багытта баратат” деп билдирди.
Флорида штатындагы Мар-а-Лаго резиденциясында АКШ лидери Дональд Трамп менен Украинанын президенти Владимир Зеленскийдин жолугушуусу аяктады. Жолугушуудан кийин эки президент журналисттердин алдына жакшы маанайда чыгышты. АКШ президенти Дональд Трамп Украинадагы согушту токтотууга багытталган тынчтык сүйлөшүүлөрү “туура багытта баратат” деп билдирди. Ал мындай билдирүүнү Украина президенти Владимир Зеленский менен эки саатка созулган сүйлөшүүлөрдөн кийин жасады. Эки президент бул убакыт ичинде европалык лидерлер менен телефондон сүйлөшүүгө да жетишишти.
Флоридадагы резиденциясында Зеленский менен бетме-бет жолугуп, европалык лидерлер менен видеоконференция өткөргөндөн кийин Трамп сүйлөшүүлөрдө илгерилөө бар экенин, бирок азырынча чечүүчү жыйынтыктар кабыла алына электигин белгиледи.
"Биз аябай жакындап калдык, балким абдан эле жакынбыз. Орусия [согуштун] бүтүшүн каалайт. Баары эле анын аякташын каалайт", — деди Трамп. Бирок cүйлөшүүнүн чоо-жайына токтолгон жок.
Украина президенти Владимир Зеленский АКШ менен Украинанын ортосунда коопсуздук кепилдиктери 100 пайызга макулдашылганын, ал эми АКШ, Украина жана Европа ортосунда коопсуздук кепилдиктери да дээрлик толук макулдашылганын билдирди.
Ал соңку апталарда америкалык жана украиналык делегациялар жетишкен прогрессти жогору баалай турганын белгиледи.
Трамп Донбасстын макамы тууралуу маселеазырынча татаал бойдон калып жатканын да белгиледи.
Франциянын президенти Эммануэл Макрон январь айынын башында "Каалоочулар коалициясы" деген ат менен таанымал Украинанын Европадагы өнөктөштөрү Парижде жолугарын билдирди. Ал Х социалдык тармагындагы баракчасына анда ар бир өлкөнүн Киевдин коопсуздугун камсыздоого кошкон "жеке салымы" талкууланарын маалымдады.
Аталган коалицияда Франция менен Британия негизги ролду ойнойт. Бул мамлекеттер согушту токтотууну, Киевдин коопсуздугуна бекем кепилдик болушуна аракет кылып келет. Анын негизинде Украинанын фронттон алыс аймагына аскер контингентин жайгаштыруу сунушу дагы айтылган. Орусия мындай шартты кабыл албай турганын бир канча жолу билдирген.
Жекшемби күнү кечинде Макрон башка европалык лидерлер менен чогуу АКШнын президенти Дональд Трамп жана Украинанын президенти Владимир Зеленскийдин жолугушуусуна онлайн катышкан. AFP маалымат агенттиги Макрон Зеленский менен өзүнчө да сүйлөшкөнүн билдирген.
АКШ менен Украина президенттеринин сүйлөшүүсүнө видео байланыш аркылуу катышкан Европа комиссиясынын төрайымы Урсула фон дер Ляйен дагы коопсуздукка кепилдик берүү маселесин көтөргөн. Ал "Европа украиналык жана америкалык өнөктөштөр менен ушул күнгө жетишилген прогрессти бекемдөө үчүн кызматташууну уланта берерин, бул жаатта коопсуздуктун темирдей бекем кепилдиги болушу шарт" экенин билдирген.
Трамп менен Зеленский 28-декабрда Флорида штатындагы АКШнын президентинин Мар-а-Лаго резиденциясында жолуккан. Андан кийин журналисттердин алдына чыкканда Трамп Украинадагы согушту токтотууга багытталган тынчтык сүйлөшүүлөрү “туура багытта баратат” деп билдирген.
Ишемби түнү Киев шаарына жана облусуна Орусиянын дрондорунун жана ракеталарынын жапырт чабуулунан 30 адам жараат алып, бирөө каза тапты. Он киши ооруканага жаткырылганын Киев шаарынын мэри Виталий Кличко билдирди.
Дарницкий районунда дрон 24 кабаттуу үйгө тийип, жогорку жана техникалык кабаттар талкаланды. Днепр районунда дагы бир дрон 18 кабаттуу турак жайга тийген.
Шаардын аскердик администрациянын башчысы Тимур Ткаченко Соломенский районундагы 18 кабаттуу жатакана да бүлгүнгө учураганын билдирди. Борбор калаанын башка райондору да аткылоого кабылып, өрт чыккан.
Чабуулдун кесепетинен шаарды жылуулук жана электр энергиясы менен камсыздоо үзгүлтүккө учураган.
"Учурда 2600дөн ашуун турак жай, 187 бала бакча, 138 мектеп жана социалдык тармакка тиешелүү 22 мекеме борборлоштурулган жылуулуктан ажырады", - деп билдирди Кличко.
Киев облусундагы чабуулдун кесепетинен 1978-жылы туулган аял киши каза таап, дагы бир адам жараат алган. Облустук администрациянын башчысы Николай Калашниктин айтымында, орусиялык армиянын соккулары инфраструктура объектилерине, ишканаларга, дүкөндөргө жана турак жайларга урулган.
Украинанын президенти Владимир Зеленский ишемби күнү эртең менен өлкөгө 500дөй орусиялык учкучсуз учуучу аппарат жана 40 ракета менен чабуул жасалганын билдирди. Бутага негизинен Киевдин энергетикалык жана жарандык инфраструктурасы алынган.
"Бул күндөрү көп суроолор болду. АКШ жана дүйнө коомчулугунун согушту токтотуу сунуштарына Орусиянын жообу кайда? Орусиянын өкүлдөрү узак сүйлөшүүлөрдү жүргүзүп жатат, бирок иш жүзүндө алардын ордуна “Кинжал” жана “Шахеддер” сүйлөп жатат. Путиндин жана анын айланасындагылардын чыныгы жүзү ушул. Алар согушту токтоткусу келбейт. Украинага көбүрөөк азап тарттырууну, дүйнөдөгү башка өлкөлөргө басымды күчөтүү үчүн болгон мүмкүнчүлүктү колдон чыгарбаганга аракет кылышат", - деп жазды Украинанын президенти Владимир Зеленский.
Орусиянын Коргоо министрлиги соккулар Украинанын Куралдуу күчтөрүнүн кызыкчылыгы үчүн иштеген энергетикалык объектилерге жана Украинанын аскердик-өнөр жай комплексине тиешелүү ишканаларга урулганын билдирүүдө.