Украина жаңы чабуулдарга кабылды

Украинанын президенти Владимир Зеленский жекшембиге караган түнү Орусиянын чабуулдарында бери дегенде эки адам мерт болуп, ондогон киши жараат алганын билдирди. Ал Телеграм каналына жалпысынын 200дөн ашык дрон менен Сумы, Харьков, Днепропетровск, Запорожье, Хмельницк жана Одесса облустары бутага алынганын жазды.

“Ондогон адам, анын ичинде бир бала жараат алды. Азыркы убактарга карата эки адам мерт болгону белгилүү. Алардын туугандарына жана жакындарына көңүл айтам”, - деп жазды Зеленский.

Украин президентинин сөзүнө караганда, бул аптада Орусия Украинага 1300дөн ашык дрон, миңден көп башкарылган авиабомба жана ар кандай типтеги 30 чакты ракета менен аткылады. Ошондуктан анын өлкөсү көбүрөөк коргоого, айрыкча абадан коргонуу системасына муктаж болуп жатканын белгилеп, Орусия сүйлөшүү жараянын атайлап чоюп жатса ага чечкиндүү жооп болушу керектигин, “агрессорго” басым күчөтүлүшү зарылдыгын айтты.

Орусия соңку чабуул тууралуу комментарий берген жок.

Согуш маалында бул маалыматтарды бейтарап булактардан ырастоо мүмкүн эмес.

Украинанын энергетика министри Денис Шмыгал өлкөдө Орусиянын аба соккуларына же аткылоосуна кабылбаган бир да электр станция калбаганын билдирди.

«Өткөн жылы алар 612 жолу энергетика системасынын жайларын атайылап түрдүү курал менен бутага алган. Ушу тапта соккулар күчөп, күн сайын урулуп келатат. Украинадагы согуш маалында душмандын чабуулуна туш болбогон бир да электр станция калган жок. Миңдеген мегаватт электр энергиясын иштеп чыгуу үзгүлтүккө учурады», - деп айтты министр парламент депутаттары алдында сүйлөп жатып.

Шмыгал электр энергиясы менен камсыздоо чектелгени менен энергосистема бирдиктүү бойдон кала берүүдө деп кошумчалады.

Анын айтымында, эң оор абал Киев, Одесса, Днепропетровск, Харьков жана майданга жакын облустарда сакталууда.

Андан мурун Киев «Энергетикалык Рамштайн» чогултуп жатканын билдирген. Жыйында өнөктөштөрдөн орус армиясынын актылоолорунан жабыркаган энергетика тармагына кошумча жардам алуу маселеси талкууланарын украин тышкы иштер министри Андрей Сибига Фейсбуктагы постунда жазды.

Анын маалыматына ылайык, өлкө Норвегиядан газ жана жабдууларды сатып алуу үчүн 200 миллион доллар алды, алдыда энергетикалык колдоо жана абадан коргонуу тармагына жардам берүү тууралуу макулдашуулар күтүлүп жатат.

Алдыңкы күнү Украинанын Коопсуздук кызматы жылуулук сезону башталгандан бери Орусия энергетикалык жайларга 256 сокку урганын билдирген. Мекеме бул Кремлдин украин элин кырууга багытталган туруктуу саясаты экенин далилдейт жана андай аракеттерде адамзатка каршы кылмыштардын белгилери бар деп эсептейт.

Москва далилдерге карабай кошуна өлкөсүнүн аскердик жайларын гана бутага алганын айтып келет.

9-январда башкалаа Киев жапырт соккуга туш болгондо энергетикалык инфраструктура катуу жабыркаган. Шаардын жарымынын көбү караңгыга баткан. Азыркыга чейин жүздөгөн имаратка электр энергиясы бериле элек.

Мэр Виталий Кличко энергетикадагы мындай оор абал согуш башталгандан бери түзүлө электигин бейшембиде айтты.

Орусиянын украин энергетикасына чабуулдарын күчөткөнүн БУУ да сындаган.

Орус Тышкы иштер министрлигинин расмий өкүлү Мария Захарова теле алып баруучу Владимир Соловьёвдун Борбор Азияга тиешелүү айткан сөздөрү Москванын расмий позициясы эмес деп билдирди.

Захарова кеп журналисттин менчик каналдан айтылган жеке ой-пикири тууралуу экенин белгиледи. Анын айтымында, андай сөз билдирүү эмес, суроо түрүндө берилген жана айрымдар «Москванын позициясы» деген «чагымчыл таризде бурмалаган».

Тышкы саясий мекеменин өкүлү Орусиянын расмий позициясын ыйгарым укугу бар мамлекеттик адамдар гана айта аларын, буга чейин өлкө жетекчилиги Москва постсоветтик мейкиндиктеги өлкөлөр менен мамиле түзгөндө суверенитеттерин урматтоо принцибине таянарын кошумчалады.

10-январда Кремлдин таасирдүү пропагандачысы деп таанылган Соловьёв согуш Украинадан тышкары аймактарга да жайылышы мүмкүн экенин айтып, Борбор Азия менен Арменияны атаган.

14-январда Кыргызстандын президентинин басма сөз катчысы Аскат Алагөзов Соловьёвдун Борбор Азия тууралуу айткандарына комментарий берип, анын сөздөрүн этибарга албоого чакырып, сандырак сөздөрүнүн бири деп атады.

Чөлкөмдүн коомчулугунда анын сөзүн көз карандысыз өлкөлөрдүн эгемендигине шек келтирген билдирүү катары айыптаган талкуу жүрүүдө.

Соловьёв буга чейин да мурдагы советтик өлкөлөрдүн же КМШ мүчөлөрүнүн дарегине опузалаган учурлар болгон.

Орусиянын Рязань облусуна жасалган учкучсуз учак чабуулунан көп кабаттуу эки үй жабыркап, эки адам жаракат алганын аймактын губернатору Павел Малков билдирди.

Дрон сыныктары өндүрүш ишканалардын биринин аймагына түшкөнү да кабарланды.

Astra агенттиги дрон Рязандагы турак жай комплексинин бир үйүнө тийгенин ырастады.

"Орусия менен биргебиз" кыймылынын төрагасы Владимир Рогов украин армиясы Бердянскидеги электроподстанцияларга чабуул жасап, шаар жарыксыз жана суусуз калганын кабарлады. Ушундай эле маалыматты "Запорожье суусу" ишканасы билдирди. Украиналык Supernova+ каналы оккупацияланган Бердянскиде "Морозовская" подстанциясы күйүп жатканын жазды.

Запорожье облусунун оккупацияланган бөлүгүнүн Орусия дайындаган "башчысы" Евгений Балицкий Бердянск, Васильевск, Приморск муниципалдык аймактарында жана Бердянск шаарында жалпы 76 миң абонент жарыксыз калганын билдирди. Социалдык объекттерге кошумча жолдор менен электр энергиясы берилип жатканын өзүнүн Телеграм каналына жазды.

Орусия 16-январга караган түндө тогуз аймагынан жана аннексияланган Крымдын үстүнөн 106 учкучсуз учак жок кылынганын, ал эми Рязан облусунда 22 дрон атып түшүрүлгөнүн билдирди.

Украина бул маалыматтарды комментарийлеген жок. Согуш учурунда маалыматтарды тактоо мүмкүн эмес.