Орусия Днепр жана Житомирге сокку урду, бир нече кишинин өмүрү кыйылды

Орусиянын армиясы 23-апрелге караган түнү Украинанын Днепр шаарына сокку уруп, каза тапкандар үч кишиге жетти. Бул тууралуу шаардын мэри Борис Филатов билдирди.

Буга чейин Днепропетров облустук аскердик администрациясынын башчысы Александр Ганжа эки киши каза болуп, ону ар кандай жараат алганын, анын төртөө орточо оор абалда ооруканага жаткырылганын кабарлаган.

Бейтапканага түшкөндөрдүн экөө 9 жана 14 жаштагы кыздар.

Жергиликтүү бийлик соккунун кесепетинен көп кабаттуу турак жайдын жогорку кабаттарында өрт чыкканын маадымдаган.

Орусиялык аскерлер Житомир облусунун жарандык транспорттук инфраструктурасына да сокку уруп, бир аял каза тапканын дубандын аскердик администрациясынын жетекчиси Виталий Бунечко кабарлады.

Өткөн түнү орус армиясы Украинага 155 дрон учурган, анын 139у жок кылынган.

Орусиянын Коргоо министрлиги аткылоолор тууралуу комментарий бере элек.

Украина жана эл аралык уюмдар Орусиянын жарандык инфраструктурага жана жай тургундарга багытталган соккуларын согуш кылмышы деп эсептейт. Далилдерге карабай Москва муну танып, соккулар аскердик буталар урулуп жатканын айтып келет.

21-апрелге караган түнү Орусия Украинанын Сумы шаарына сокку урду. 15 киши жараат алды, арасында 13, 15 жана 17 жаштагы кыздар бар.

Баары ооруканага жаткырылганын Телеграм каналында Сумы облустук администрациясынын башчысы Олег Григоров билдирди.

Жапа чеккендердин көбү улгайган адамдар.

Сумы шаардык аскердик администрациясынын жетекчиси Сергей Кривошеенко маалымдагандай, чабуулда көп кабаттуу үйлөр, инфраструктура объектилери жана автоунааларга зыян келтирилген.

"Полиция медициналык жайлардын биринин чатырына сокку тийген фактыны каттады", — деп билдирди Украинанын Улуттук полициясы.

Украинанын Аба күчтөрү 21-апрелге оогон түнү орусиялык армия эки баллистикалык "Искендер" ракетасы, 143 учкучсуз аппарат менен чабуул койгонун маалымдады. 116 дрон атып түшүрүлгөн.

Евробиримдик Украинага 90 млрд евро насыя бөлүү боюнча акыркы чечимди 22-апрелде кабыл алууга ниеттенип жатат.

Бул тууралуу Еврошаркетке төрагалык кылып жаткан Кипрдин расмий өкүлдөрүнүн бири AFP агенттигине кабарлады.

Маалыматка караганда, насыя бөлүү үчүн керек болгон "акыркы элемент" биримдикке мүчө 27 мамлекеттин Туруктуу өкүлдөр комитетинин Брюсселдеги отурумунун күн тартибине киргизилет.

Франциянын президенти Эммануэл Макрон Польшада журналисттерге Венгрияда өткөн аптадагы шайлоодо Виктор Орбан жеңилгенден кийин насыяга коюлган бөгөт алынат деген оптимисттик маанайда турганын айткан.

Евробиримдикке мүчө өлкөлөрдүн тышкы иштер министрлери быйыл 23-февралдагы жолугушууда Орусияга каршы санкциялардын 20-пакети боюнча бир пикирге келе алган эмес. Венгрия Орусияга каршы санкциянын 20-пакетин жана Украинага насыяны бөгөттөгөн.

Венгрия, Словакия жана Чехия бул насыяга кепилдик берүүгө да макул болгон жок.

Өткөн жылдын декабрында насыя берүү чечими Евробиримдик өлкөлөрү Украинаны каржылоо үчүн Орусиянын эсеби жабылган активдерин колдонуу боюнча бир пикирге келе албай калгандан кийинки компромисстик кадам болгон.

Венгрия жана Словакиянын бийликтери Евробиримдиктин башка өлкөлөрүнүн Украинага колдоосун сынга алып, муну "тынчтыкты көздөө аракети" катары түшүндүргөн. Алардын бул позициясы эл аралык коомчулукта көп учурда "орусиячыл саясат" катары сыпатталып келет.

Орусиянын Кара деңиздин жээгинде жайгашкан Туапсе порту 20-апрелге караган түнү учкучсуз аппараттардын чабуулуна кабылды. Ушуну менен соңку жумада бул порт экинчи ирет бутага алынды.

Телеграм каналдарда жарыяланган күбөлөрдүн видеолоруна караганда, соккудан кийин портто өрт тутанган.

Бийлик өкүлдөрү чабуулдун натыйжасында бир адам каза болуп, бир адам жаракат алганын билдиришти.

ASTRA Телеграм каналы жазгандай, өрт Туапсе мунайды кайра иштетүүчү заводунун резервуарлар жайгашкан аймагында чыккан. Тактап айтканда, мунай сакталган цистерналар күйгөн.

Бул объект 16-апрелге караган түнү да чабуулга кабылган. Анда да өрт чыгып, анын түтүнү ондогон чакырым алыстан көрүнгөн. Өрттү өчүрүү иштери жакында гана аяктаган.

Краснодар крайынын губернатору Вениамин Кондратьев деңиз портундагы чабуу үчүн Украинаны күнөөлөп, ал жакта өрт чыкканын ырастады.

Ал ошондой эле дрон сыныктары шаардагы бир катар имараттардын терезелерин талкалаганын билдирди. Алардын ичинде мектеп, бала бакча, музей, чиркөө, көп кабаттуу турак жай жана газ түтүгү бар экени айтылды.

Туапседеги мунайды кайра иштетүүчү завод деңиз терминалы менен кошо Роснефть компаниясынын түзүмүнө кирет.

Бул компанияны Игорь Сечин жетектейт. Ал Владимир Путин менен жакын байланыштагы адам катары белгилүү.

«Настоящее Время» телеканалы белгилегендей, украин армиясы буга чейин да Туапседеги мунай инфраструктурасына 2025-жылдын март, ноябрь жана декабрь айларында сокку урган.

Орусиянын Коргоо министрлиги түн ичинде украиналык 112 дрон атып түшүрүлгөнүн билдирди.

Украин аскерлери бул соккулар боюнча комментарий берген эмес.