Рейтер агенттиги төрт булакка таянуу менен Казакстан июль–август айларында Орусияга гуманитардык жардам иретинде 50 миң тонна бензин жеткирүүгө макул болгонун жазды.
Ушу тапта Орусиянын бензинге болгон бир күндүк муктаждыгы болжол менен 110–115 миң тоннага жакын. Казакстан бере турган көлөм бир күндүк керектөөнүн жарымы гана деп белгилеген агенттик.
Буга чейин Рейтер Москва Казакстандан болжол менен 50 миң тонна АИ-92 бензинин сатып алуу боюнча сүйлөшүүлөрдү жүргүзүп жатканын жазган. Астана бул маалыматты төгүндөгөн.
Казакстандын Энергетика министрлиги Рейтердин суроосуна жазуу түрүндө жооп узатып, Орусиянын мамлекеттик органдарынан мунай өнүмдөрү жаатында гуманитардык жардам көрсөтүү боюнча кайрылуу түшпөгөнүн билдирген.
Ошол эле маалда министрлик орусиялык нафтанын негизинде иштеген "Конденсат" мунай иштетүүчү заводунан Орусияга бензин экспорттоо ыктымалдыгын жокко чыгарган эмес.
Министрлик экспорттоо мүмкүнчүлүгү Казакстандын ички рыногунун мунай өнүмдөрү менен камсыз болушуна жана "Татнефть" камсыз кылган чийки затка жараша болорун билдирген.
Рейтердин маалыматында, АИ-95 жана АИ-92 үлгүсүндөгү бензиндер Павлодар мунай-химия жана "Конденсат" заводдорунан алынышы мүмкүн.
Орусия өлкөдөгү күйүүчү май тартыштыгын азайтуу максатында бензинди Индиядан сатып ала баштаганын билдирди.
Рейтерге маалымат берген булактар Украинадагы согушка байланыштуу киргизилген санкциялар бензин ташууга жана төлөм жүргүзүүгө тоскоолдук жаратышы мүмкүн экенин эскертишкен.
Өткөн жекшембиде Орусиянын президенти Владимир Путин украиналык дрондордун өлкөдөгү мунай иштетүүчү заводдорго урган соккулары айрым аймактарда күйүүчү май тартыштыгына себеп болгонун моюнга алып, көйгөйдү чечүү үчүн чаралар көрүлүп жатканын билдирген.
Орусия шаршембиге караган түнү Украинанын май куюучу жайларына соккуларды улантты. Днепропетровск облусунда эле беш жайга дүрмөт тийгенин, өрт тутанганын, бир аял каза таап, үч киши жарадар болгонун губернатор Александ Ганжа кабарлады.
Орус Коргоо министрлиги бул украин армиясынын мунай иштетүүчү заводдорун аткылаганына жооп катары атайылап жасалган кампания экенин моюнга алды. 30-июнда мекеме украиналык 25 май куюучу жайга дрондордон сокку урганын, муну менен "украин армиясынын транспорттук логистикасын үзгүлтүккө учуратууну көздөгөнүн" билдирди.
Украина ошондой эле максат менен оккупацияланган аймактары менен аннексияланган Крымга бензин тартып бараткан машинелерди бутага алып келатат. Жарым арал күйүүчү май тартыштыгынан бир нече жумадан бери жапа чегүүдө.
Орус аскерлери мындан тышкары шаршембиде кошуна өлкөсүнүн энергетикалык инфраструктурасына чабуул койгону маалымдалды.
"Укрэнерго" компаниясынын Телеграм каналында айтылгандай, алты чөлкөмдө электр энергиясын чукул өчүрүүгө туура келди.
Херсон, Запорожье облустарын аткылоодон адам өмүрлөрү кыйылды.
Ал тапта 30-июндун кечинде украин президенти Владимир Зеленский Пензадагы аскердик заводго жана Уфадагы мунай иштетүүчү жайга сокку урулганын ырастады. Анын айтымында, Пензада Украинаны күн сайын аткылаган ракеталардын тетиктери чыгарылат.
Украинанын Куралдуу күчтөрүнүн жетекчиси Александр Сырский 30-июнда журналисттерге курган маегинде Орусиянын Брянск облусунан Украинанын Чернигов облусуна чабуул коюп жана андан ары Киевди карай жылуу коркунучу реалдуу экенин билдирди.
Анын айтымында, Орусиянын президенти Владимир Путин Башкы штабга мындай операциянын ар кандай варианттарын иштеп чыгууну тапшырган.
Сырский бул операция менен Орусия Украинанын аймагына тереңирээк кирип жана украин армиясынын бир бөлүгүн негизги багыттардан, айрыкча түштүктөн алаксытууну көздөп жатканын айтты.
"Алар аскерлеринин саны менен фронт тилкесин кеңейтип, бизди резервдерден ажыратууга аракет кылууда", - деди Сырский.
Маек учурунда Александр Сырский Орусияда Беларустун аймагынан чабуул жасоо варианты да барын айтты. Бирок Сырский Минск орусиялык күчтөргө Беларустун аймагын кайрадан аскердик плацдарм катары пайдаланууга макул болооунан күмөн санай турганын билдирди. Бул тууралуу РБК-Украина жазды.
Александр Сырскийдин айтымында, Беларус менен Украинанын чек арасына орнотулган ретрансляторлордун бири 29-июнда иштетилген.
"Алар азырынча демонтаждала элек. Кечээ бир ретрансляторлор иштетилди. Менимче, мындан ары иштетилбейт. Мен баарын айта албайм, бирок алар (беларус бийлиги) бул ретрансляторлор иштебеши керек экенин жакшы түшүнөт", - деген Сырский "Настоящее Времяга".
24-июнда Украинанын президенти Владимир Зеленский 22-июндан тартып Беларус менен Украинанын чек арасындагы орусиялык дрондорду багыттоого жардам берген ретрансляторлор иштебей калганын билдирди. Буга чейин Зеленский Минскиден бул жабдууларды алып салууну талап кылып, антпесе аларды жок кылуу чаралары көрүлүшү мүмкүн экенин эскерткен.