Орусиянын аскерлери өткөн түнү Киевге катуу сокку урду. Соңку расмий маалыматка караганда, кеминде 17 кишинин өмүрү кыйылды, ондогону жарадар болду. Жергиликтүү бийлик бардык райондордо кыйроолор болуп, 20дан көп турак жай жарым-жартылай ураганын билдирди. Куткаруучулар аман калгандарды издеп жатышат.
Нижегород облусунда бейшембиге караган түнү дрондордун чабуулунан бир адам каза болуп, төрт киши жаракат алды. Бул тууралуу облус губернатору Глеб Никитин билдирди.
Анын социалдык тармактагы билдирүүсүнө ылайык, түн ичинде абадан коргонуу күчтөрү аймактан 30 украиналык дронду атып түшүргөн. Алардын сыныктары өнөр жай объектисине жана бир нече турак жайга тийип, зыян келтирген.
ASTRA Телеграм каналынын маалыматына караганда, Кстово шаарындагы "Лукойл-Нижегороднефтеоргсинтез" мунайды кайра иштетүүчү заводуна чабуул болду. Бул ишкана 2026-жылдын апрель жана май айларында да дрон чабуулуна кабылган.
Украинанын коргоо министринин кеңешчиси Сергей Стерненко украиналык күчтөр Нижегород облусундагы ушул мунай заводуна кайрадан сокку урганын жана анын аймагында өрт чыкканын билдиргенин украиналык Exilenova+ жана Supernova+ мониторинг каналдары жазып чыкты.
Стерненконун айтымында, Кстоводогу заводдун кубаттуулугу жылына 17 миллион тонна мунайды түзөт. Ал Орусиядагы кубаттуулугу боюнча төртүнчү мунайды кайра иштетүүчү завод болуп саналат. Орус армиясын бензин менен дизел менен камсыздаган негизги ишканалардын бири.
ASTRA белгилегендей, "Лукойл-Нижегороднефтеоргсинтез" заводу Москва аймагын күйүүчү май менен камсыздоодо орчундуу орунду ээлейт. Ишкана 50дөн ашык түрдөгү продукцияны, анын ичинде автоунаа, авиация жана дизел, мунай битумун, парафин жана башка продукцияларды чыгарат.
Орусиянын Коргоо министрлиги түн ичинде абадан коргонуу күчтөрү 320дан ашык украиналык учкучсуз аппараттарды жок кылганын билдирди. Дрондор Астрахань, Белгород, Брянск, Волгоград, Воронеж, Калуга, Курск, Ленинград, Нижегород, Новгород, Орёл, Псков, Ростов, Саратов, Тамбов жана Тула облустарынын, ошондой эле Москва аймагынын, Краснодар крайынын, аннексияланган Крымдын үстүнөн жана Азов менен Кара деңиздеринин акваторияларында атып түшүрүлгөн.
Белгород облусунун бийлиги бейшемби күнү Малакеево айылындагы жер тамга дрон тийип, бир адам каза болгонун маалымдады. Облустук ыкчам штабдын билдирүүсүндө, каза болгон адамдын жубайы да жаракат алган.
- Украинанын Куралдуу күчтөрү Орусиянын кол салууларына жооп иретинде стратегиялык мааниге ээ ишканаларга тынымсыз чабуул коюп жатат. Reuters жазгандай, 2026-жылдын июнь айынын ортосунда украиналык дрондордун чабуулдарынын натыйжасында Орусиянын борбордук бөлүгүндөгү ири заводдор ишин токтотуп, өлкө бензин өндүрүшүнүн болжол менен төрттөн бир бөлүгүн жоготкон.
- Көпчүлүк аймактарда күйүүчү май тартыштыгы байкалып, сатууга чектөөлөр киргизилди.
Орусиянын армиясы Киевге сокку урду: каза болгондор жана жараат алгандар көп
2-июлга караган түнү Орусия Киевге ар кандай типтеги ракета жана сокку уруучу дрондор менен жапырт чабуул жасады. Акыркы маалыматтарга ылайык, 13 адам каза болуп, дагы 86 киши жараат алды.
Киев шаардык аскердик администрациясынын башчысы Тимур Ткаченко билдиргендей, чабуулдун кесепетинен шаардын бардык райондорунда 30дан ашуун жерде кыйроолор катталган.
Украинанын Өзгөчө кырдаалдар боюнча мамлекеттик кызматы 20дан ашык турак жайга зыян келтирилип, 15 жерде куткаруу иштери жүрүп жатканын билдирди.
Дарницкий районунда беш жана тогуз кабаттуу турак үйлөр жарым-жартылай кыйрап, 16 кабаттуу үйдүн үстүңкү кабаттары жана жеке турак жайлар жабыр тарткан.
Шевченковский районунда жети кабаттуу турак үйдүн чатыры жана мейманкананын имараты өрттөнүп, беш кабаттуу үй зыян тарткан. Голосеевский районунда 16 кабаттуу үйдүн техникалык кабатында өрт чыккан. Печерский районунда тогуз кабаттуу имарат кыйраган. Оболонский районунда кампанын аймагында өрт катталган. Святошинский районунда эки жеке турак үй жабыркаган. Деснянский районунда тогуз кабаттуу турак үй зыян тарткан.
Орусиянын Коргоо министрлиги Украинага "жарандык инфраструктурага каршы чабуулдарына жооп катары" сокку урулганын билдирди. Мекеменин маалыматына ылайык, чабуул үчүн абадагы, кургактагы жана деңиз базасындагы куралдар колдонулган.
"Киев жана Киев облусундагы аскердик-өнөр жай комплексинин ишканалары жана отун-энергетикалык комплекстин объектилери, Днепропетровск, Полтава, Черкассы, Чернигов жана Киев облустарындагы аскердик аэродромдордун инфраструктурасы бутага алынды", - деп айтылат министрликтин билдирүүсүндө.
The New York Times басылмасынын 1-июлда жарыяланган изилдөөсүнө ылайык, Орусия менен Украинанын согуштагы жоготуулары каза болгондор менен жарадарларды кошкондо 2 миллиондон ашты.
Изилдөө америкалык Center for Strategic and International Studies (CSIS) аналитикалык борборунун маалыматтарына негизделген.
Ага ылайык, Орусиянын жоготуулары болжол менен 1,4 миллион болсо, Украинаныкы 525 миңден 625 миңге чейин.
Изилдөөнүн авторлору жоготууларга карабастан, Орусиянын фронттогу кыймылы жайлап жатканын белгилешет. Бул маалда украин тараптын учкучсуз аппараттары Орусиянын аймагына чейин жетүүдө.
NYT басылмасынын маалыматында, 2026-жылдын башынан бери Орусия ай сайын 30–34 миң аскер кызматкеринен айрылууда. Бул көрсөткүч келишимдик негизде аскерлерди тартуу көрсөткүчүнөн жогору болууда.
Басылма 2024-жылдан бери биринчи жолу орус армиясы мурда басып алган жерлерге караганда көбүрөөк аймакты жоготконун жазган.
Москва дагы, Киев дагы өздөрүнүн согуштагы жоготуулары тууралуу расмий маалыматты жарыялашпайт жана негизинен каршы тараптын жоготууларына басым жасап келишет.
Орусиянын Коргоо министрлиги согушта каза болгон аскерлердин саны тууралуу акыркы маалыматты 2022-жылдын 21-сентябрында жарым-жартылай мобилизация жарыяланган күнү билдирген.