Украинанын Киев облусунун Бровары районунда украиналык Rozetka маркетплейсинин кампасына сокку урулду. Аталган компания 2-августка караган түнү кампага эки дрон тийгенин, жабыркагандар жок экенин кабарлады.
1-августта да компаниянын кампасына чабуулда бир киши каза таап, жетөө жараат алган.
2-августта Харьковдогу Коротыч кыштагында почта терминалы соккуга кабылды. Харьков облустук аскердик администрациясынын башчысы Олег Синегубовдун билдирүүсүндө, жүк ташуучу машинелер, контейнер жана башка жабдыктар күйүп кетти. Жергиликтүү Телеграм каналдар сөз "Новая почтанын" терминалы тууралуу жүрүп жатканын билдиришти. Соккудан бир киши каза болгон.
Орусиянын армиясы 2-августка оогон түнү Украинаны жалпы 133 дрон менен аткылаган. Украинанын армиясы 109 дрон атып түшүрүлгөнүн, 24ү 19 жерге тийгенин маалымдаган.
Ал эми жекшемби күндүз Орусия Запорожьени эки ирет башкарылуучу авиабомба менен аткылады. Запорожье облустук аскердик администрациясынын жетекчиси Иван Федоровдун маалыматына караганда, жер тамга тийген соккуда бир киши каза таап, экөө жараат алды. Шаарда көп кабаттуу турак жайга авиабомба тийип, 30дан ашык киши жараат алды.
Федоров Запорожье аймагында жалпы сегиз авиабомба ташталганын кошумчалады.
Запорожье дээрлик күн сайын Орусиянын авибомбалык соккусуна кабылып келатат.
20-июлдагы беш кабаттуу үйгө чабуулда 11 жаштагы кыз каза болгон. Андан кийинки күнү көп кабаттуу турак жайга сокку урулганда үч кишинин өмүрү кыйылган.
Украинанын учкучсуз учактары 2-августта Орусиянын Wildberries компаниясынын Самара шаарынын четиндеги Новосемейкинов кыштаганда жайгашкан кампасына сокку урду.
Соккудан кийин кампа өрттөнүп жатат.
Чабуул жана өрт болгонун Wildberries компаниясы жана Самара облусунун губернатору Вячеслав Федорищев ырастады.
Украиналык Supernova+ жана Еxilenova+ Телеграм каналдары жергиликтүү тургундардын кыштакта кампага соккудан кийин коюу түтүн асманга көтөрүлүп, күйүп жатканы тартылган видео-сүрөттөрдү жарыялады.
Бул июлдун ортосунан бери украиналык дрондордун соккусуна кабылган маркетплейстин тогузунчу кампасы.
Орусияда 1-августта эртең менен Уфа шаарына украиналык учкучсуз аппараттар чабуул жасаганын Башкырстандын башчысы Радий Хабиров билдирди:
"Уфага багытталган кезектеги дрон чабуулунун мизин кайтардык. Атып түшүрүлгөн дрондун кулаган сыныктарынан улам өнөр жай аймагында түтүн пайда болду".
Украиналык мониторинг каналдары шаардагы өнөр жай аймагында чыккан бир нече өрттүн сүрөттөрүн жана видеолорун жарыялашты.
"Аспекты" басылмасы окуя шаардын түндүк өнөр жай аймагында болгонун жазды:
"Жергиликтүү убакыт боюнча саат 10:30 чамасында мунай иштетүүчү заводдордун үстүнөн жарылууга окшогон үндөр угулуп, коюу түтүн чыга баштаган", - деп маалымдады басылма.
Башкырстанда дрон коркунучу тууралуу ишемби күнү жергиликтүү убакыт боюнча саат 09:35те жарыяланган. Ошол эле учурда Орусиянын Федералдык аба транспорт агенттиги (Росавиация) Уфа аэропортунун иши убактылуу токтотулганын билдирген.
Astra басылмасынын OSINT аналитиги өрттүн сүрөттөрү менен видеолорун талдап чыгып, кара түтүн "Башнефть-Уфанефтехим" мунай иштетүүчү заводун каптаганын аныктаган.
Astra басылмасынын маалыматына ылайык, бул ишкана жылына 8,2 миллион тоннага чейин мунайды кайра иштетет. Ошондой эле мотор майын, мунай коксун, суюлтулган газ, күкүрт жана жыт берүүчү углеводороддорду чыгарат.
"Башнефть" компаниясы түндүк өнөр жай аймагында бири-бирине абдан жакын жайгашкан үч мунай иштетүүчү: "Башнефть-Уфанефтехим", "Башнефть-Новойл" жана "Башнефть-УНПЗ" заводдорун башкарат.
Уфадагы мунай иштетүүчү заводдор буга чейин чабуулга 25-июнда кабылган.
Украинанын Орусиядагы мунай иштетүүчү ишканаларга соккулары уланууда. Мунун кесепетинен Орусияда күйүүчү май тартыштыгы башталган.
Орусия коңшусу Украинага каршы толук масштабдуу согуш ачып, анын аймагын күн сайын дрон жана ракета менен аткылап келатканына бешинчи жыл болуп баратат. Соңку жылдары Орусиянын өзүнүн аймагы да бутага көп алынууда. Украина Орусиядагы чабуулдарга адатта комментарий бербейт, болгону, Москванын согуш машинасын токтотуу үчүн анын мунай жана аскердик продукция чыгаруучу ишканаларын жарактан чыгаруу керек деп эсептей турганын айтып калат.
Орусиянын аскерлери 1-августка караган түнү Киевге жасаган жапырт ракеталык соккудан жабыркаган объектилердин бири шаар тургундарына медициналык жардам көрсөтүүнүн транспорттук камсыздалышына жооп берген «Киевмедспецтранс» коммуналдык ишканасы болду.
Бул тууралуу Киевдин мэри Виталий Кличко билдирди. Анын айтымында, ишкананын аймагына эки ракета түшкөн. Натыйжада тез жардам кызматынын беш автоунаасы толугу менен күйүп кетип, дагы 20сы жарактан чыкты. Кличконун айтымында, «Киевмедспецтранс» ишканасынын төрт имаратына зыян келтирилди.
Киевдеги ракеталык соккудан тогуз адам каза болуп, кеминде 30 жайкын тургун жаракат алган.
Орусиянын Коргоо министрлиги Киевге жана Киев облусуна чабуулдар «ракета жана учкучсуз учактарды чыгарууга байланыштуу заводдорго» коюлганын билдирди.
Москва согуш башталгандан бери көптөгөн далилдерге карабастан Украинадагы жарандык объектилерге сокку урганын четке кагып келет.